រតនគិរី ៖ បុរសម្នាក់ដែលជាជនសង្ស័យចូលលួចទ្រព្យសម្បត្តិនៅក្នុងលំនៅឋានមួយកន្លែង ស្ថិតនៅក្នុងភូមិ៣ ឃុំត្រពាំងក្រហម ស្រុកកូនមុំ ខេត្តរតនគិរី កាលពីវេលាម៉ោង៣និង១៥នាទីទាបភ្លឺ ឈានចូលថ្ងៃទី១២ ខែតុលា ឆ្នាំ២០១៩ ខណៈនោះត្រូវម្ចាស់ផ្ទះគេទាន់ មិនរត់ទេ បែរជាទាញយកកាំបិតចាក់កូនម្ចាស់ផ្ទះបណ្តាលឲ្យរងរបួសធ្ងន់ រីឯចោរដែលចូលលួចនោះត្រូវបានម្ចាស់ផ្ទះតប តដៃវិញបណ្តាលឲ្យរងរបួសធ្ងន់ផងដែរ។
ជនសង្ស័យ ឈ្មោះ ជឿន តឿន ភេទប្រុស អាយុ៣៧ឆ្នាំ ជនជាតិខ្មែរ មុខរបរ មិនពិតប្រាកដ រស់នៅភូមិសង្កែ ឃុំឆែប ស្រុកឆែប ខេត្តព្រះវិហារ។
បើតាមលោកវរសេនីយ៍ត្រី រស់ វណ្ណា មេបញ្ជាការអាវុធហត្ថស្រុកកូនមុំបានឲ្យដឹងថា លំនៅឋានលោកស្រី ហេង ផេង ត្រូវបានចោរចូលមកលួចទ្រព្យសម្បត្តិ តែលួចមិនទាន់បានផង ខណៈនោះ កូនម្ចាស់ផ្ទះដឹងទាន់ក៏ចុះមកមើល ស្រាប់តែចោរនោះបានយកកាំបិតចាក់មកលើកូនម្ចាស់ផ្ទះបណ្តាលឲ្យរបួសធ្ងន់ មានឈ្មោះ យ័ន សុផល ភេទប្រុស អាយុ២៩ឆ្នាំ ជនជាតិខ្មែរ មុខរបរកសិករ ត្រូវជាកូនម្ចាស់ផ្ទះ ត្រូវបានសាច់ញាតិដឹកបញ្ជូនទៅព្យាបាលនៅមណ្ឌលសុខភាពស្រុកកូនមុំ។
ក្រោយកើតហេតុកម្លាំងអាវុធហត្ថស្រុកនិងកម្លាំងនគរបាល មូលដ្ឋានចុះមកអន្តរាគមន៍ធ្វើការឃាត់ខ្លួនជនសង្ស័យយកមកសួរនាំដើម្បីរៀបចំកសាងសំណុំរឿងបញ្ជូនទៅអយ្យការអមសាលាដំបូងខេត្តចាត់វិធានការទៅតាមផ្លូវច្បាប់៕
