Page Nav

HIDE

Grid

GRID_STYLE

Recent in Sports

FALSE

Classic Header

{fbt_classic_header}

Top Ad

Sponsor Sponsor

ភោជនីយដ្ឋាន “ឌីសេន ផាលេស” ស្ថិតនៅ​តាម​បណ្ដោយផ្លូវត្រសក់ផ្អែម បង្កភាពឈឺក្បាលដល់អ្នកដំណើរ ពេលឆ្លងកាត់ម្ដងៗ

អានផ្សេងទៀត

ភ្នំពេញៈ ភោជនីយដ្ឋាន “ឌីសេន ផាលេស” ស្ថិតនៅ​អគារលេខ១៩៥ តាមបណ្ដោយ​ផ្លូវលេខ៦៣(ត្រសក់ផ្អែម) កែងផ្លូវលេខ៣០២ ក្នុងសង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ បាន​បង្កការរំខានដល់អ្នកដំណើរយូរណាស់មកហើយ ព្រោះមាន​រថយន្តទំនើបៗ ត្រូវបានក្រុមសន្តិសុខរបស់ភោជនីយដ្ឋាននេះ រៀបចំឲ្យចតលើផ្លូវ។ ជាងនេះទៅទៀត នៅពេល រថយន្ត​ចេញចូល ឈប់ ឬ​ចូលហូបអាហារម្តងៗ ក្រុមសន្តិសុខ តែងតែចេញមកបិទផ្លូវ ដើម្បីឲ្យ​រថយន្តនោះ ចូលចត ដោយគ្មានគិតពីអ្នកដំណើរ ឬការ​កកស្ទះលើផ្លូវបន្តិចសោះឡើយ។

ជាក់ស្ដែង កាលពី​វេលាម៉ោង៩៖១០នាទីយប់ថ្ងៃទី៣០ ខែតុលា ឆ្នាំ២០១៩ មានបុរសជនជាតិចិនម្នាក់ បើករថយន្ត Mercedez បញ្ច្រាសផ្លូវវ៉ាជែងរថយន្ត ដែលចតលើផ្លូវនោះ  ហើយ​ក៏ជ្រុលចង្កូតមកបុកម៉ូតូសណ្ដោងរ៉ឺម៉ក បណ្ដាលឲ្យដាច់កង់ម្ខាង និងបុកប៉ះម៉ូតូមួយគ្រឿងទៀតផង។

បើតាមសម្ដីបុរសរងគ្រោះជាម្ចាស់ម៉ូតូសណ្ដោងរ៉ឺ​ម៉ក បានប្រាប់ឲ្យដឹងថា មុនកើតហេតុ រូបគាត់ បានបើកម៉ូតូសណ្ដោងរ៉ឺ​ម៉កមួយគ្រឿង ធ្វើដំណើរតាមផ្លូវ៦៣ ទិសដៅពីត្បូងទៅជើង ព្រមទាំងមានម៉ូតូរងគ្រោះមួយគ្រឿងទៀត  ម៉ាកហុងដាឌ្រីម ស៊េរី២០១៥ ពណ៌ខ្មៅ ពាក់ស្លាកលេខក្រចេះ 1B-4432 បានធ្វើដំណើរស្របគ្នាផងដែរ ខណៈនោះ​ស្រាប់តែមានរថយន្តមួយគ្រឿងម៉ាក Mercedez ពណ៌ទឹកប្រាក់ ពាក់ស្លាកលេខភ្នំពេញ 2AM-6381 បើកបរដោយបុរសម្នាក់ជាជនជាតិចិន ធ្វើដំណើរបញ្ច្រាសផ្លូវ និងវ៉ាជែងគេឯងទាំងស្ថានភាពស្រវឹង លុះមកដល់ចំណុចកើតហេតុ បានជែងរថយន្តចតលើផ្លូវ ហើយ​ក៏ជ្រុលចង្កូតមកបុកម៉ូតូសណ្ដោងរ៉ឺម៉ក បណ្ដាលឲ្យដាច់កង់ម្ខាង និងបុកប៉ះម៉ូតូខាងលើ រងការខូចខាតផងដែរ តែសំណាងល្អ  មិនបណ្ដាលឲ្យមនុស្សរងរបួសធ្ងន់ធ្ងរទេ។

ក្រោយកើតហេតុ សមត្ថកិច្ចមូលដ្ឋានបានចុះមកដល់ និងបានជួយសម្រួលចរាចរណ៍ ព្រមទាំងសម្របសម្រួលភាគីបង្ក និងភាគីរងគ្រោះឲ្យត្រូវរូវគ្នា ដោយភាគីរថយន្តបង្កព្រមសងថ្លៃខូចខាតទៅម្ចាស់រ៉ឺ​ម៉កសណ្ដោងចំនួន100$ និងភាគីខាងម្ចាស់ម៉ូតូរងគ្រោះចំនួន50$ ដើម្បីបញ្ចប់រឿងតែម្ដង។

បើតាមទ្រឹស្តី ក្នុងមេរៀនទេសចរណ៍ និងបដិសណ្ឋារកិច្ច បើភោជនីយដ្ឋាន ឬសណ្ឋាគារ ណា មិនមានចំណតត្រឹមត្រូវ សម្រាប់អតិថិជនរបស់ខ្លួនទេ គឺមិនអនុញ្ញាតឲ្យបើកអាជីវកម្មឡើយ ។ ប៉ុន្តែផ្ទុយពីទ្រឹស្តី រៀននៅសាលា អាជ្ញាធរ សមត្ថកិច្ច និងមន្ត្រីជំនាញ លែងគិតអស់ហើយ គឺមានតែក្រដាស ស្នើសុំនឹងស៊ីញ៉េឲ្យបើកភោជនីយដ្ឋាន សណ្ឋាគារ ឬសាលារៀន ដោយមិន ទាំងចុះពិនិត្យទីតាំង ពិសេស គឺទីតាំងចំណតយានយន្តនោះទេ ជាក់ស្ដែងដូចនៅ​ភោជនីយដ្ឋាន “ឌីសេន ផាលេស” ជាឧទាហរណ៍ស្រាប់៕

Sponsor