តាមរយៈទំព័រហ្វេសបុកលោក ហេងឡុង បានបង្ហោះមុននេះបន្តិចយ៉ាងដូច្នេះថា៖ ព័ត៌មានមរណៈភាព ខ្ញុំបាទក្នុងនាមជាប្រធានក្រុមប្រឹក្សាភិបាលរបស់សមាគមសិល្បករខ្មែរ សូមចូលរួមរំលែកទុក្ខដ៏ក្រៀមក្រំបំផុតដែលលោកពូ សាន ម៉ៅ បានទទួលមរណៈភាពនៅម៉ោង៦ល្ងាចនៅឯមន្ទីរពេទ្យប្រទេសថៃ។ ព័ត៌មានបន្ថែមខ្ញុំបាននឹងជូនដំណឹងនាពេលក្រោយ😭😭😭
គួររំលឹកផងដែរថា តារាកំប្លែង លោកធូ ចំរ៉ុង ហៅនាយ សាន ម៉ៅ បានធ្លាក់ខ្លួនឈឺធ្ងន់ភ្លាមៗ និងត្រូវបានក្រុម គ្រួសារដឹកបញ្ជូនទៅសង្គ្រោះបន្ទាន់ ដោយសារជំងឺបេះដូង និងទឹក ក្នុងសួត ធ្ងន់ធ្ងរ កាលពីថ្ងៃទី១៧ ខែមីនា ឆ្នាំ២០១៨ ខណៈលោកមានជំងឺប្រចាំកាយផង គឺជំងឺលើសជាតិស្ករ ផងដែរ។ បន្ទាប់មក ក្រុមគ្រួសាររបស់លោកក៏បានសម្រេចបញ្ជូនលោកទៅបន្តការព្យាបាលនៅប្រទេសថៃ ។
កន្លងមកបើតាមតារាសម្តែងប្រុសលោក អ៊ឹម ជីវ៉ា បាននិយាយថា ស្តាប់អារម្មណ៍នាយ សាន ម៉ៅ មានអារម្មណ៍ថាក្ដុកក្ដួលណាស់ យប់មិញនាយ សាន ម៉ៅ បានប្រាប់ខ្ញុំដោយសំឡេងខ្សាវៗថា នាយបានមកសម្រាកនៅមន្ទីរពេទ្យមានរយៈពេល ២ ថ្ងៃហើយ តែមិនហ៊ានប្រាប់ឲ្យគេដឹងទេ ព្រោះកុំឲ្យខ្មាសគេ កុំឲ្យគេដៀលថាសិល្បៈពេលឈឺប្រកាសរកជំនួយ។