ភ្នំពេញ ៖កាលពីវេលាម៉ោង៩និង៣០នាទី ព្រឹកថ្ងៃទី០៥ ខែធ្នូ ឆ្នាំ ២០១៩ មានហេតុការណ៍ដ៍អាក្រក់មួយបានកើតឡើង ដោយប្រធានប្រជាការពារសង្កាត់ផ្សារដើមគរម្នាក់បានស្លាប់ពេលបញ្ជូនទៅដល់មន្ទីរពេទ្យ ខណៈចុះរៀបសណ្ដាប់ធ្នាប់នៅផ្សារនាគមាស ហើយត្រូវសន្តិសុខផ្សារនាគមាស បើករថយន្តជ្រុលមកបុកផ្ទប់នឹងរថយន្តមួយគ្រឿងទៀតយ៉ាងពេញទំហឹង ស្ថិតនៅតាមបណ្ដោយផ្លូវលេខ២៣៤ ក្បែរផ្សារនាគមាស សង្កាត់ផ្សារដើមគរ ខណ្ឌទួលគោក រាជធានីភ្នំពេញ។
សពបុរសខាងលើ មានឈ្មោះ សុខ ហឿន អាយុ៥៤ឆ្នាំ មុខរបរជាប្រធានប្រជាការពារសង្កាត់ផ្សារដើមគរ។
ប្រភពព័ត៌មានពីអាជីវករផ្សារ ដែលបានឃើញហេតុការណ៍ បានឲ្យដឹងថា នៅមុនពេលកើតហេតុ គេ បានឃើញមន្ត្រីនៃគណៈបញ្ជាការឯកភាពសង្កាត់ផ្សារដើមគរសហការជាមួយគណៈកម្មាការផ្សារនាគមាស ចុះរៀបសណ្ដាប់ធ្នាប់នៅជុំវិញផ្សារ ដោយបុរសម្នាក់ជាប្រធានប្រជាការពារសង្កាត់បានបើករថយន្តកូរ៉េមួយតោនកន្លះរបស់សង្កាត់ មកឈប់នៅកន្លែងកើតហេតុ ហើយបានចុះពីលើរថយន្តចូលទៅបត់ជើង រួចបានដើរមកមុខរថយន្ត ស្របពេលនោះមានបុរសម្នាក់ជាសន្តិសុខផ្សារនាគមាសបានឡើងទៅបើករថយន្តនោះ ក៏ជ្រុលទៅបុកបុរសរងគ្រោះផ្ទប់ជាមួយរថយន្តមួយគ្រឿងទៀតដែលចតនៅខាងមុខពេញទំហឹង បណ្ដាលឲ្យរងរបួសធ្ងន់ធ្ងរ ត្រូវបានរថយន្តសាម៉ុយ ដឹកយកទៅសង្គ្រោះនៅមន្ទីរពេទ្យភ្លាមៗ ប៉ុន្តែដោយសារស្ថានភាពធ្ងន់ធ្ងរពេក ជនរងគ្រោះបានស្លាប់បាត់បង់ជីវិតពេញបញ្ជូនទៅដល់មន្ទីរពេទ្យ ចំណែកសន្តិសុខដែលឡើងបើករថយន្តត្រូវបានឃាត់ខ្លួនបានភ្លាមៗ។
ក្រោយកើតហេតុ សមត្ថកិច្ចមូលដ្ឋាន បានចុះមកដល់កន្លែងកើតហេតុសហការជាមួយសមត្ថកិច្ចជំនាញ ចុះវាស់វែងយករថយន្តបង្ក និងអ្នកបើកបរ ទៅកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំដោះស្រាយតាមច្បាប់ ចំណែកសពត្រូវបានធ្វើលិខិតប្រគល់ជូនសាច់ញាតិ ដើម្បីដឹកយកទៅធ្វើបុណ្យតាមប្រពៃណីជាតិ៕
