ភ្នំពេញ: មានករណីគ្រោះថ្នាក់ចរាចរណ៍ ដែលបង្កឡើងដោយរថយន្តមួយគ្រឿង សង្ស័យម្ចាស់ស្រវឹង បើកបុករបាំងថ្មពុះចែកទ្រូងផ្លូវ បណ្តាលឲ្យខូចខាត ចំណែកអ្នកបើកបររបួស កាលពីវេលាម៉ោង ៩និង៣០នាទីយប់ថ្ងៃទី ០៨ ខែធ្នូ ឆ្នាំ២០១៩ ត្រង់ចំណុចមុខបុរីញ៉ូថោន លើមហាវិថីសហព័ន្ធរ៉ុស្សី ក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ ។
មុនពេលកើតហេតុ គេឃើញ បុរសស្គាល់អត្តសញ្ញាណម្នាក់ វ័យជាង ៣០ឆ្នាំ ទំនងជាស្រវឹងស្រា បានបើករថយន្តម៉ាកកូរ៉ឡា ពណ៌ស ពាក់ស្លាកលេ ខភ្នំពេញ 1AO-5185 ធ្វើដំណើរពីកើតទៅលិច តាមបណ្តោយមហាវិថីសហព័ន្ធរ៉ុស្សី ក្នុងល្បឿនលឿនគួរសម។
លុះមកដល់ចំណុចកើតហេតុ រថយន្តខាងលើ បានព្យាយាមបើកវ៉ា រថយន្តនៅខាងមុខ ក៏ជ្រុលទៅបុកនឹងក្បាលព្រួញពុះចែកទ្រូវផ្លូវ បណ្តាលឲ្យរថយន្តក្រឡាប់ផ្ងារជើង ខ្ទេចផ្នែកខាងមុខទាំងស្រុង រីឯក្បាលព្រួញខ្ទាតចេញពីទីតាំងដើម រីឯអ្នកបើកបររបួស (បែកក្បាល) ភ្លាមៗនោះ ជនរងគ្រោះ ត្រូវគេឃើញមានបងប្អូន មកយកទៅពេទ្យ។
ក្រោយកើតហេតុ សមត្ថកិច្ចមូលដ្ឋាន បានមកដល់ រួចទាក់ទងទៅជំនាញ ចុះវាស់វែង និងស្ទួចយករថយន្តបង្ក បញ្ជូនទៅការិយាល័យចរាចរណ៍ជើងគោក នៃ ស្នងការនគរបាលរាជធានីភ្នំពេញ ដើម្បីចាត់ការតាមនិតីវិធី៕
