header ads

Sponsor

ភ្នំពេញ​៖ រដ្ឋាភិបាល​បារាំង បានផ្តល់​ឥណទាន​សម្បទា​ន​សរុប​១១៨​លាន​អឺរ៉ូ​(​ប្រមាណ​១២១​លាន​ដុល្លារ​) ដល់​កម្ពុជា សម្រាប់​អនុវត្ត​គម្រោង​​ទឹកស្អាត និង​អប់រំ​ជំនាញ​។ លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញាវត្ថុ និងអ្នកស្រី  Ophélie BOURHIS នាយកទីភ្នាក់ងារបារាំងសម្រាប់អភិវឌ្ឍន៍(AFD) បានចុះហត្ថលេខាលើកិច្ចព្រមព្រៀងនេះ។ នេះបើតាមសេចក្តីជូនដំណឹងរបស់ក្រសួងសេដ្ឋកិច្ច។

ក្រសួងសេដ្ឋកិច្ច បានបញ្ជាក់ថា ថវិកាទាំង១២១លានដុល្លារនេះ ត្រូវបែងចែកជាពីរទៅតាមគម្រោងនីមួយៗ ដោយក្នុងនោះទឹកប្រាក់១០១លានដុល្លារ សម្រាប់គម្រោងសង់រោងចក្រប្រព្រឹត្តិកម្មទឹកស្អាតនៅបាក់ខែង ដំណាក់កាលទីពីរនេះ ដែលត្រូវអនុវត្តបន្តពីគម្រោងជំហានទីមួយ ក្នុងការសាងសង់ស្ថានីយ៍បូមទឹក ដែលមានសមត្ថភាពផលិតទឹកស្អាតបានជិត២០ម៉ឺនគូប ក្នុងមួយថ្ងៃ។ បើតាមក្រសួងសេដ្ឋកិច្ចដដែល ទឹកប្រាក់ទាំងនេះ ត្រូវចំណាយលើការបំពាក់បំពង់មេនាំទឹកស្អាត, បំពង់ចែកចាយ និងសម្ភារតភ្ជាប់បំពងផងដែរ។ ជាពិសេសការងារសាងសង់ ត្រួតពិនិត្យ និងគាំទ្រដល់ការពង្រឹងសមត្ថភាពមន្ត្រីរបស់រដ្ឋាករទឹកស្វយ័តក្រុងភ្នំពេញលើការងារលទ្ធកម្ម និងបណ្តាញចែកចាយទឹកស្អាតទៀតផង។

ជាមួយគ្នានេះ ទឹកប្រាក់ដែលនៅសល់ជិត២០លានដុល្លារទៀត ត្រូវយកទៅប្រើប្រាស់លើគម្រោងអភិវឌ្ឍន៍ជំនាញសម្រាប់ការប្រកួតប្រជែងនៅកម្ពុជា ដែលផ្តោតសំខាន់ទៅលើការកែលម្អនិងលើកកម្ពស់គុណភាពនៃការអប់រំបណ្តុះបណ្តាបច្ចេកទេស និងវិជ្ជាជីវៈកម្រិតក្រោយមធ្យមសិក្សា។ ជាពិសេសការលើកកម្ពស់ដល់ការសិក្សាផង ធ្វើការងារផង តាមបណ្តាឧស្សាហកម្មនានា  ព្រមទាំងពង្រឹងយន្តការគ្រប់គ្រងហិរញ្ញវត្ថុរបស់គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ(TVET)ឱ្យប្រកបដោយនវានុវត្តន៍ ផងដែរ។ នេះបើតាមក្រសួងសេដ្ឋកិច្ច និងហិរញ្ញវត្ថុ។

ក្រសួងសេដ្ឋកិច្ច បានបញ្ជាក់នៅក្នុងសេចក្តីជូនដំណឹងដូច្នេះថា៖«ការផ្ដល់ហិរញ្ញប្បទានដល់គម្រោងទាំងពីរខាងលើនេះ គឺបានឆ្លើយតបយ៉ាងជាក់ច្បាស់ទៅនឹងសេចក្តីត្រូវការជាអាទិភាពរបស់រាជរដ្ឋាភិបាលកម្ពុជា ក្នុងវិស័យអភិវឌ្ឍន៍ធនធានមនុស្សតាមរយៈការលើកកម្ពស់ចំណេះដឹង ជំនាញវិជ្ជាជីវៈ សមត្ថភាព និងសហគ្រិនភាព និងវិស័យអភិវឌ្ឍន៍ហេដ្ឋារចនាសម្ព័ន្ធទីក្រុង និងប្រជុំជនតាមរយៈការពង្រឹងសមត្ថភាពផ្គត់ផ្គង់ទឹកស្អាត និងបំពាក់ប្រព័ន្ធចែកចាយ និងផ្គត់ផ្គង់ទឹកស្អាត»។

គិតចាប់ពី​ឆ្នាំ​១៩៩៣ ដល់ ឆ្នាំ​២០១៩ រដ្ឋាភិបាល​ប្រទេស​បារាំង តាមរយៈ​ទីភ្នាក់ងារ​បារាំង​សម្រាប់​អភិវឌ្ឍន៍ បានផ្តល់​កម្ចី​ដល់​កម្ពុជា ចំនួន​៨០២​លាន​អឺរ៉ូ​(​ជិត​៨៩៩​លាន​ដុល្លារ​)។​ ក្នុងនោះ​មាន កម្ចី​ឥត​សំណង​ចំនួន​២០១​លាន​អឺរ៉ូ​(​ប្រមាណ​២២៥​លាន​ដុ​លា្ល​រ​) ឥណទាន​សម្បទាន​(Sovereign Loan) ចំនួន​៤៣៤​លាន​អឺរ៉ូ (​ប្រមាណ​៤៨៦​លាន​ដុ​លា្ល​រ​) និង​កម្ចី​គ្មាន​ការប្រាក់​(Non Sovereign Loan )​ចំនួន​១៦៧​លាន​អឺរ៉ូ​(​ប្រមាណ​១៨០​លាន​ដុល្លារ​)​។ សម្រាប់ហិរញ្ញាប្បទានពីបារាំងទាំងនេះ គឺផ្តោតទៅលើវិស័យសំខាន់ៗ ដូចជា ការអភិវឌ្ឍន៍វិស័យកសិកម្ម និងហេដ្ឋារចនាសម្ព័ន្ធជនបទ, បណ្តុះបណ្តាលជំនាញ និងគាំទ្រវិស័យផលិតកម្ម ព្រមទាំងធនាគារ និងគ្រឹះស្ថានហិរញ្ញវត្ថុ។ នេះបើតាមក្រសួងសេដ្ឋកិច្ច និងហិរញ្ញវត្ថុ៕

ផ្ដល់សិទ្ធិដោយ៖ KhmerNas

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post