header ads

Sponsor

លោក រស់ សុវាចា មន្រ្តី​នាំ​ពាក្យ​ក្រសួង​អប់​រំ យុវ​ជន​និង​កីឡា បាន​ប្រាប់​សារ​ព័ត៌​មាន​ខ្មែរ​ណាស់​ថា និស្សិត​ខ្មែរ​ដែល​រៀន​នៅ​សាកល​វិទ្យា​ល័យ​ក្នុង​ទី​ក្រុង​វ៉ូហាន គឺ​មាន​ចំនួន​៨៩​នាក់ ប៉ុន្តែ​មាន​ចំនួន​៦៦​នាក់ បាន​ធ្វើ​ដំណើរ​មក​លេង​ប្រទេស​កម្ពុជា​ក្នុង​អំឡុង​ពេល​វិស្សម​កាល មុន​ពេល​មាន​ការ​ផ្ទុះ​វីរុស​ឆ្លង​នៅ​ក្នុង​ទី​ក្រុង​វ៉ូហាន​ទៅ​ទៀត​។

លោក​ថា​«​រូប​ខ្ញុំ​ផ្ទាល់ ត្រូវ​បាន​ថ្នាក់​ដឹក​នាំ​ក្រសួង​អប់រំ យុវ​ជន និង​កីឡា ចាត់​តាំង​ឱ្យ​ទាក់​ទង​ផ្ទាល់​ទៅ​ក្រុម​និស្សិត​យើង​នៅ​វ៉ូហាន ដោយ​មួយ​ថ្ងៃ​លើស​ពី​១​ដង ដែល​ខ្ញុំ​បាន​ទាក់​ទង​ផ្ទាល់​ទៅ​ប្អូន​និស្សិត​នៅ​ទី​នោះ ដើម្បី​តាម​ដាន​សុខ​ភាព​និង​លើក​ទឹក​ចិត្ត​ដល់​ពួក​គាត់​»​។

លិខិត​របស់​និស្សិត​ម្នាក់​រៀន​នៅ​វ៉ូហាន​បាន​ផ្ញើ​មក​លោក ហង់ ជួនណារ៉ុន នៅ​ថ្ងៃ​ទី​៣០​ខែ​មករា​នេះ បាន​បញ្ជាក់​ដែរ​ថា ការ​វិល​ត្រឡប់​មក​កម្ពុជា​វិញ​របស់​ក្រុម​និស្សិត​ទាំង​៦៦​នាក់ គឺ​ដើម្បី​មក​លេង​ស្រុក​កំណើត ក្នុង​ខណៈ​វិស្សម​កាល​រដូវ​រងា​ដូច​រាល់​ឆ្នាំ ហើយ​ត្រូវ​បាន​អនុញ្ញាត​ដោយ​សាលា​។ លិខិត​ដដែល​បន្ត​ថា ដោយ​សារ​ការ​ផ្ទុះ​ឡើង​វីរុស​ថ្មី ខាង​សាលា​បាន​ប្រកាស​លើក​ថ្ងៃ​វិស្សម​កាល និង​មិន​ទាន់​បាន​កំណត់​ថ្ងៃ ដើម្បី​ចូល​រៀន​វិញ​នៅ​ឡើយ​ទេ​។

នៅ​ថ្ងៃ​ទី​៣០​មករា សម្ដេច ហ៊ុន សែន បាន​បញ្ជាក់​ថា កម្ពុជា​នឹង​មិន​បញ្ជូន​និស្សិត​ខ្មែរ​ចេញ​ពី​ប្រទេស​ចិន ដោយ​សារ​តែ​ចិន​កំពុង​ផ្ទុះ​រីក​រាល​ដាល​ជំងឺ​រលាក​សួត​ដោយ​វីរុស​ថ្មី​នោះ​ទេ​។ សម្ដេច​ថា ការ​ធ្វើ​បែប​នេះ ព្រោះ​ចង់​ឱ្យ​និស្សិត​ខ្មែរ​នៅ​ទី​នោះ ត្រូវ​ចេះ​រួម​សុខ​ទុក្ខ​ជា​មួយ​ពល​រដ្ឋ​ចិន ហើយ​បើ​បញ្ជូន​ពួក​គេ​មក​ប្រទេស​វិញ នឹង​អាច​ធ្វើ​ឱ្យ​ចិន​លែង​ផ្ដល់​អាហា​រូបករណ៍​ដល់​និស្សិត​ខ្មែរ​នា​ពេល​ខាង​មុខ​៕

ផ្ដល់សិទ្ធិដោយ៖ Khmernas

Feature Ads

Previous Post Next Post
Sponsor