ភ្នំពេញ៖ ក្រសួងសាធារណការ និងដឹកជញ្ជូន រកប្រាក់ចំណូលបានជាង៤៨,៥ពាន់លានរៀល ដែលស្មើប្រមាណ១១,៨៩លានដុល្លារ នៅក្នុងឆ្នាំ២០១៩ ។ នេះជាប្រាក់ចំណូលចូលរដ្ឋ។របាយការណ៍បូកសរុបលទ្ធផលការងារឆ្នាំ២០១៩ របស់ក្រសួងសាធារណការ និងដឹកជញ្ជូន បានរៀបរាប់ថា ប្រាក់ចំណូលបានមកពីការលក់លេខចុះបញ្ជីយានយន្ត បានជាង១,៥លានដុល្លារ និងការពិន័យ ការដាក់ទណ្ឌកម្មពិន័យ បានជាង១,៣លានដុលា្លរ។
របាយការណ៍ដដែល បានបន្ថែមថា សហគ្រាសសាធារណៈ ក៏បានផ្ដល់ចំណូល១,១លានដុលា្លរដល់ក្រសួងផងដែរ។ ក្រៅពីនេះ ក៏មានចំណូលពីការត្រួតពិនិត្យគុណភាពផលិតផល និងការគោរពបទដ្ឋាន មានជាង៣៥ម៉ឺនដុលា្លរ, ចុះយានយន្ត និងជលយាន មាន១០ម៉ឺនដុល្លារ, ការផ្តល់ប័ណ្ណបើកបរគ្រប់ប្រភេទ មានជាង៨ម៉ឺនដុល្លារ និងពីការជួលសម្ភារបរិក្ខារ មធ្យាបាយដឹកជញ្ជូន និងគ្រឿងចក្រមាន៤,៨ម៉ឺនដុល្លារទៀតផង។ ដោយឡែកផលពីការបង្កើតសហគ្រាសជិត៤២ម៉ឺនដុល្លារ, ការជួលដី និងអាគារ ជាង២០ម៉ឺនដុល្លារ,ផលផ្សេងៗ និងផលពិសេសមានជាង៦,២លានដុល្លារ និងប្រាក់ចំណូលបដិភាគក្នុងនិងក្រៅប្រទេសមាន ២លានដុល្លារ ផងដែរ។ នេះបើតាមរបាយការណ៍ក្រសួង។
បើតាមក្រសួងសាធារណការ ចំណូលទាំងនេះ បានមកពីការពង្រឹងការត្រួតពិនិត្យ និងចាត់វិធានការផ្លូវច្បាប់លើរថយន្តកែច្នៃខុសលក្ខណៈបច្ចេកទេស និងយានដ្ឋានជួសជុល កែច្នៃ និងដំឡើងគ្មានច្បាប់អនុញ្ញាត ។ ជាពិសេសការចូលរួមនិងធ្វើយុទ្ធនាការកាត់បន្ថយគ្រោះថ្នាក់ចរាចរណ៍តាមរយៈការចែកមួកសុវត្ថិភាព ការបិទចំណាំងផ្លាត ផ្លាកសញ្ញាចរាចរណ៍ និងគំនូសសញ្ញាចរាចរណ៍នានាជាដើម៕
ផ្ដល់សិទ្ធិដោយ khmernas