header ads

Sponsor

ភ្នំពេញ៖ ក្រសួងវប្បធម៌ និងវិចិត្រសិល្បៈ បានស្នើសុំថវិកាពីមូលនិធិ​ឯកអគ្គរដ្ឋទូត​សហរដ្ឋអាមេរិកចំនួន៧៥.០០០ដុល្លារ ដើម្បីបន្តអនុវត្តគម្រោង​អភិរក្សវត្ថុជាតិពន្ធុសតវត្សទី២០​ ក្នុងដំណាក់កាលទី២ចាប់ពីដើមឆ្នាំ២០២០នេះ។

លោកជំទាវ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈបានចុះហត្ថលេខា​ទទួលថវិកាពីឯកអគ្គរដ្ឋទូតអាមេរិក នាព្រឹកថ្ងៃទី១៦ ខែ មករាឆ្នាំ២០២០ នៅសារមន្ទីរ​ទួលស្លែង។

នៅក្នុងពិធីនេះ លោកជំទាវ ភឿង​ សកុណា បានលើកឡើងអំពីទុក្ខលំបាករបស់ប្រជា​ពល​រដ្ឋ​នៅក្នុងរបបប្រល័យពូជសាសន៍ ប៉ុល ពត ដូច្នេះថា«ប្រជាពលរដ្ឋមានខោអាវ​តែមួយសម្រាប់ ប៉ះរហែកដាច់រយ៉េរយៃ។ ខោអាវនេះ បង្ហាញឲ្យឃើញថា ភាពក្រលំ​បាកនៅក្នុងសម័យនោះ បុគ្គលម្នាក់ៗ មានភាពឈឺចាប់នូវទិដ្ឋភាពក្នុង​សារមន្ទីរគុកទួល​ស្លែង»។

លោកជំទាវបន្ថែមដូច្នេះថា«យើងបន្ត អភិរក្សខោអាវ ក៏ដូចជារបស់ប្រើប្រាស់ធ្វើទា​រុណ​កម្ម និងខ្នោះ​ដែលវាខូចខាត ដើម្បីទុកឲ្យបងប្អូន ជំនាន់ក្រោយដែលជាភស្តុតាង​កុំឲ្យមានរបបប្រល័យពូជសាសន៍វិលមកជាថ្មីក្នុងប្រទេសរបស់យើង»

សូមជម្រាបថា សារមន្ទីរបានអនុវត្តការងារអភិរក្សវាយនភណ្ឌចំនួន៨៣៦វត្ថុ បំណែក​ក្រ​ណាត់ចំនួន ២១កេស និងការរៀបចំទុកដាក់វាយនភណ្ឌទាំង​អស់នៅក្នុងឃ្លាំសរុប​ចំនួន៦៧កេស ក្នុងដំណាក់កាលទី១ ដែលឯកអគ្គរដ្ឋទូតអាមេរិកយល់​ព្រមផ្ដល់​ថវិកា​ចំនួន ៥៥.៥០០ ដុល្លាអាមេរិកក្នុងឆ្នាំ២០១៨៕ អត្ថបទ៖ ញឹក សំអូន

ផ្ដល់សិទ្ធិដោយ៖ KhmerNas

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post