ខេត្តកំពង់ស្ពឺ ៖ កាលពីម៉ោង១០ព្រឹក ថ្ងៃទី២៦ ខែមករា ឆ្នាំ២០២០ គ្មានគ្រោះថ្នាក់ចរាចរណ៍បង្កឡើងរវាងរថយន្តម៉ាកតាកូម៉ាមួយគ្រឿងបុករះម៉ូតូ៣គ្រឿង និងរថយន្ត១គ្រឿងផ្សេងទៀត ខណៈរថយន្តបង្កកំពុងធ្វើដំណើរទាំងគ្រួសារ ទៅស្តីដណ្តឹងកូនក្រមុំគេម្នាក់នៅខេត្តតាកែវ បណ្តាលឱ្យកូនកំលោះបានបាត់បង់ជីវិតនៅកន្លែងកើតហេតុ និងអ្នកដំណើរផ្សេងទៀតរងរបួសធ្ងន់-ស្រាលជាច្រើននាក់ បង្កឱ្យមានការភ្ញាក់ផ្អើលតាមបណ្ដោយផ្លូវជាតិលេខ៤១ តត្រង់ចន្លោះបង្គោលគីឡូម៉ែត្រលេខ២២ទៅលេខ២៣ ស្ថិតនៅមុខសាលាបឋមសិក្សាស្រង់ក្នុងភូមិស្រង់ ឃុំស្រង់ ស្រុកគងពិសី ។
ជនរងគ្រោះខាងលើនៅមិនទាន់ស្គាល់អត្តសញ្ញាណនៅឡើយទេគ្រាន់តែដឹងថាមានអាយុជាង២០ឆ្នាំ ហើយពេលនេះជនរងគ្រោះដែលរងរបួសធ្ងន់-ស្រាលកំពុងត្រូវបានបញ្ជូននៅសង្គ្រោះនៅមន្ទីរពេទ្យហើយ។
បើតាមសាក្សីឃើញហេតុការណ៍បានឲ្យដឹងថា មុនពេលកើតហេតុ គេបាគេបានឃើញរថយន្តម៉ាកតាកុមាពណ៌សពាក់ស្លាកលេខកំពង់ស្ពឺ2B2331 មួយគ្រឿងជិះគ្នា៩នាក់ បើកបរក្នុងទិសដៅពីជើងទៅត្បូង ក្នុងគោលបំណងទៅដណ្តឹងកូនក្រមុំរបស់គេនៅឯខេត្តតាកែវ លុះមកដល់ចំណុចកើតហេតុ ក៏បុករះជាមួយម៉ូតូចំនួន០៣គ្រឿង ហើយភ្លាមៗនោះដែរ រថយន្តបង្កមិនបានឈប់នោះទេ គឺបានបន្តទៅមុខ ដើមដើម្បីបើករត់គេចខ្លួនទៀត។
ប្រភពដដែលបន្តថា ស្របពេលរថយន្តបង្កកំពុងតែបើកគេចខ្លួននោះ ក៏ស្រាប់តែទៅបុកពីក្រោយរថយន្តម៉ាកហាយឡិនឌ័រមួយគ្រឿងផ្សេងទៀតធ្វើដំណើរស្របទិសគ្នា ដែលជិះគ្នា៥នាក់យ៉ាងពេញទំហឹងតែម្តង ធ្វើឱ្យរថយន្តបង្កម៉ាកតាកូម៉ាបែកកង់ខ្លួនឯងរេចង្កូតធ្លាក់ផ្លូវទៅខាងឆ្វេងដៃ ហើយបុកជាមួយរបងសាលារៀន បណ្តាលឱ្យក្រឡាប់ជាច្រើនត្រឡប់ ធ្វើបុរសម្នាក់ដែលជាកូនកំលោះទៅស្តីដណ្តឹងកូនក្រមុំគេនោះ បណ្តាលឱ្យបាត់បង់ជីវិតភ្លាមៗនៅនឹងកន្លែងកើតហេតុ ចំណែកសាច់ញាតិផ្សេងទៀតដែលរួមដំណើរនោះរងរបួសធ្ងន់-ស្រាល ។
ប្រភពដដែលបន្តថា ក្រោយពេលកើតហេតុ អ្នកបើករថយន្តបង្កបានបើកទ្វាររត់គេចខ្លួនបាត់ស្រមោលបន្សល់ទុកតែរថយន្ត និងជនរងគ្រោះនៅកន្លែងកើតហេតុ ។ ហើយសពបុរសម្នាក់ដែលត្រូវទៅស្តីដណ្តឹងកូនក្រមុំគេនៅខេត្តតាកែវនោះ ត្រូវបានគេដឹងថា រស់នៅស្រុកសំរោងទង ខេត្តកំពង់ស្ពឺ។
បើតាមសាច់ញាតិជនរងគ្រោះប្រាប់ថា អ្នកបើកបររថយន្តតាកូមានោះ ទើបតែទិញរថយន្តនោះទេ ហើយកូនរបស់គាត់ដែលបាត់បង់ជីវិតនោះ បានជួលរថយន្តនេះឱ្យដឹកទៅស្តីដណ្តឹងកូនគេនៅខេត្តតាកែវ តែចៃដន្យអាក្រក់ជួបហេតុការណ៍បែបនេះតែម្តង៕