ចំនួនគ្រោះថ្នាក់ចរាចរណ៍ បានធ្លាក់ចុះយ៉ាងខ្លាំង គិតត្រឹមតែ២សប្តាហ៍ប៉ុណ្ណោះ បន្ទាប់ពីច្បាប់ស្តីពីការហាមការបើកបរពេលស្រវឹងត្រូវបានដាក់ឱ្យអនុវត្ត។ នេះបើយោងតាមការលើកឡើងរបស់លោក ឡេ ស៊ុនឌុក អនុប្រធាននាយកដ្ឋាននគរបាលចរាចរណ៍នៃក្រសួងសន្តិសុខសាធារណៈវៀតណាម(MoPS)។
ថ្លែងនៅក្នុងសន្និសីទសារព័ត៌មានមួយ ដែលរៀបចំឡើងដោយគណៈកម្មាធិការជាតិសុវត្ថិភាពចរាចរណ៍ នៅទីក្រុងហាណូយកាលពីថ្ងៃទី១៦ខែមករា លោកបានបញ្ជាក់ថា គ្រោះថ្នាក់ចរាចរណ៍ចំនួន៣២២បានកើតឡើងនៅទូទាំងប្រទេស ចាប់ពីថ្ងៃទី១ ដល់ថ្ងៃទី១៥ខែមករា ដោយបានសម្លាប់មនុស្សចំនួន២៤៩នាក់ និងរងរបួសចំនួន១៥៨នាក់។
លោកបន្តថា ចំនួនគ្រោះថ្នាក់បានធ្លាក់ចុះ៣១លើកឬ៩ភាគរយ ខណៈចំនួនអ្នកស្លាប់បានថយចុះចំនួន៣៨នាក់ឬ១៣ភាគរយ បើប្រៀបធៀបនឹង២សប្តាហ៍មុន។
ប៉ូលីសចរាចរណ៍វៀតណាម បានផាកពិន័យអ្នកបើកបរចំនួន៦.២៧៩នាក់ ក្រោមឥទ្ធិពលនៃគ្រឿងស្រវឹង និងប្រមូលប្រាក់បានជាង២១ពាន់លានដុង(៩០៧.៧៥០ដុល្លារ) ក្នុងរយៈពេលកន្លះខែដំបូងនៃខែមករា។
ច្បាប់នេះត្រូវបានរឹតបន្តឹងជាពិសេសសម្រាប់មន្ត្រីរាជការនិងកងកម្លាំងប្រដាប់អាវុធ ហើយក្នុងអំឡុងពេលពីរសប្តាហ៍កន្លងមកនេះ មិនមានគ្រោះថ្នាក់ទាក់ទងនឹងគ្រឿងស្រវឹងធ្ងន់ធ្ងរទេ។
លោក Nguyen Xuan Phuc នាយករដ្ឋមន្រ្តីវៀតណាមបានចេញសេចក្តីណែនាំមួយ ស្តីពីការពង្រឹងការអនុវត្តច្បាប់ ស្តីពីការបង្ការគ្រោះថ្នាក់ដោយសារគ្រឿងស្រវឹង និងអនុក្រឹត្យរបស់រដ្ឋាភិបាលលេខ១០០/២០១៩ ស្តីពីការពិន័យរដ្ឋបាល ចំពោះការរំលោភលើផ្លូវថ្នល់និងផ្លូវដែក ដែលបានចូលជាធរមានកាលពីថ្ងៃទី១ខែមករា។
យោងតាមបទប្បញ្ញត្តិថ្មីរបស់ប្រទេសវៀតណាមនេះ អ្នកបើកបររថយន្តនឹងត្រូវពិន័យរហូតដល់៣០-៤០ លានដុងឬស្មើរ១.២៩៧ ទៅ១.៧២៩ដុល្លារ និងព្យួរប័ណ្ណបើកបរក្នុងរយៈពេល២២ទៅ២៤ខែ ប្រសិនបើពួកគេរកឃើញថា បានបើកបរក្រោមឥទ្ធិពលនៃគ្រឿងស្រវឹង។
ចំពោះអ្នកបើកបរទោចក្រយានយន្ត អាចប្រឈមនឹងការផាកពិន័យរហូតដល់៦-៨លានដុងឬស្មើរនឹង២៥៩ទៅ៣៤៦ដុល្លារ ហើយប័ណ្ណបើកបររបស់ពួកគេត្រូវបានដកហូតក្នុងរយៈពេល២២-២៤ខែសម្រាប់ការប្រើគ្រឿងស្រវឹង៕
ផ្ដល់សិទ្ធិដោយ៖ KhmerNas