(សៀមរាប)៖កាលពីល្ងាចថ្ងៃទី២៨ ខែមករា ឆ្នាំ២០២០ យ៉ាងហោចណាស់មានមនុស្ស ២នាក់ត្រូវកម្លាំងនគរបាលខេត្តសៀមរាប ឃាត់ខ្លួនយកទៅសាកសួរ បន្ទាប់ពីពួកគេបានបង្ហោះវីដេអូ និងផ្សព្វផ្សាយ ព័ត៌មានមិនពិត អំពី វីរុស កូរ៉ូណានៅលើបណ្តាញទំនាក់ទំនងសង្គម Facebook បង្កឲ្យមហាជនមានការយល់ច្រឡំ។
សមត្ថកិច្ច បញ្ជាក់ថា ការឃាត់ខ្លួនពួកគេយកទៅសាកសួរ ព្រោះពួកគេបានបង្ហោះវីដេអូ ក្នុងគោលបំណងផ្សាយព័ត៌មានមិនពិតអំពីការឆ្លងជម្ងឺផ្លូវដង្ហេីម វីរុសកូរ៉ូណា ដោយអះអាងថា មានករណីឆ្លងវីរុស កូរ៉ូណា ចំនួន ៤ករណី នៅក្នុងសណ្ឋាគារប៉ាស៊ីហ្វិក ខេត្តសៀមរាប។
ជាមួយគ្នានេះ កាលពីថ្ងៃម្សិលមិញ រដ្ឋបាលខេត្តសៀមរាប ក៏បានចេញសេចក្ដីបំភ្លឺមួយ ដោយបានបញ្ជាក់ថា ពុំមានករណីឆ្លងជម្ងឺផ្លូវដង្ហើម វីរុស កូរ៉ូណា កេីតឡេីងនៅសណ្ឋាគារណាមួយ ក្នុងខេត្តសៀមរាបនោះទេ។
ទោះជាយ៉ាងណា សមត្ថកិច្ច នៅមិនទាន់អាចបញ្ជាក់ថា តើមនុស្សទាំងពីរ នាក់នេះនឹងត្រូវអប់រំណែនាំ ឬកសាងសំណុំរឿងបញ្ជូនទៅតុលាការនោះទេ?
បើយោងតាមមាត្រា ៤២៥ នៃក្រមព្រហ្មទណ្ឌ បានចែងថា បទក្លែងព័ត៌មាន ត្រូវផ្ដន្ទាទោសដាក់ពន្ធនាគារពី ១ឆ្នាំ ទៅ ២ឆ្នាំ និងពិន័យជាប្រាក់ពី ២លានរៀលទៅ៤លានរៀល៕