កម្ពុជា រកចំណូលបានជាង១០លានដុល្លារ ពីភ្ញៀវចូលទស្សនាអង្គរ នៅដើមឆ្នាំ២០២០

ភ្នំពេញ៖ ភ្ញៀវទេសចរបរទេសដែលមកទស្សនាអង្គរនៅខែមករា ឆ្នាំ២០២០ មានចំនួន២២២,៥៦១នាក់ ដោយថយចុះ ១៧.៨៩ភាគរយ បើប្រៀបធៀបទៅនឹងរយៈពេលដូចគ្នាឆ្នាំ២០១៩។  រីឯចំណូលពីការលក់សំបុត្រទស្សនារមណីយដ្ឋានអង្គរ ចំនួន ១០,៥៤៧,៣៣២ដុល្លារអាមេរិកនេះ ក៏មានការថយចុះ ១៤.៨១ភាគរយដែរ បើធៀបនឹងដើមឆ្នាំមុន។ នេះបើតាមគ្រឹះស្ថានអង្គរ ដែលបានចេញផ្សាយនៅថ្ងៃទី១ កុម្ភៈ។

គ្រឹះស្ថានអង្គរ បានផ្ដល់ទឹកប្រាក់ឧបត្ថម្ភជាង៤៤៥, ១២២ដុល្លារ ដល់មន្ទីរពេទ្យគន្ធបុប្ផា នៅខែមករា ផងដែរ។

កាលពីឆ្នាំ២០១៩កន្លងមក រមណីយដ្ឋានអង្គររកចំណូលបាន ៩៩,០៨៨,៨៩៤ដុល្លារ ពីភ្ញៀវទេសចរបរទេសជាង២,២លាននាក់ ដែលបានមកទស្សនាតំបន់អង្គរវត្ត ។ ចំណូលនេះ មានការថយចុះ ១៤,៨៥ភាគរយ បើធៀបនឹងឆ្នាំ២០១៨។ នេះបើតាមសេចក្ដីប្រកាសព័ត៌មានរបស់គ្រឹះស្ថានអង្គរ កាលពីខែមករា ឆ្នាំ២០២០កន្លងមក៕

ផ្ដល់សិទ្ធិដោយ៖ Khmernas