header ads

Sponsor

នៅ​ថ្ងៃ​ច័ន្ទ​ទី​៣​កុម្ភៈ ប្រ​ធា​នា​ធិបតី​ហ្វី​លី​ពីន​លោក រ៉ូឌ្រីហ្គោ ឌូទើតេ បាន​ទទូច​ឱ្យ​ពល​រដ្ឋ​ហ្វី​លី​ពីន​ទាំង​អស់ បញ្ឈប់​ការ​ស្អប់​ខ្ពើម​ជន​ជាតិ​ចិន ទាក់​ទង​នឹង​ការ​ផ្ទុះ​ឡើង​នៃ​វីរុស​កូរ៉ូណា​ថ្មី​ដែល​មាន​ប្រភព​ចេញ​ពី​ទី​ក្រុង​វ៉ូហាន​ប្រទេស​ចិន​កាល​ពី​ខែ​ធ្នូ និង​កំពុង​បន្ត​ធ្វើ​ឱ្យ​មនុស្ស​ស្លាប់​កើន​ជាង​៣០០​នាក់ និង​ឆ្លង​ជំងឺ​ជាង​១៧.០០០នាក់​។

ការ​ផ្ទុះ​ឡើង​នៃ​វីរុស​នេះ បាន​បង្ក​ឱ្យ​មាន​ការ​ស្អប់​ខ្ពើម​ប្រទេស​ចិន​នៅ​ទូ​ទាំង​ពិភព​លោក ដូច​ជា​ហាង​មួយ​ចំនួន បិទ​ទ្វារ​មិន​ស្វាគមន៍​ភ្ញៀវ​ទេស​ចរ​ចិន និង​ការ​សើច​ចំអក​តាម​អ៊ិនធឺណែត​អំពី​ការ​​លក់​ដូរ​សាច់​សត្វ​កម្រ​ឬសត្វ​មិន​គួរ​បរិ​ភោគ​នៅ​ក្នុង​ប្រទេស​ចិន ដែល​គេ​យល់​ថា គឺ​ជា​ប្រភព​នាំ​ឱ្យ​មាន​កើត​មាន​វីរុស​កូរ៉ូណា​ថ្មី​ជា​ដើម​។

សាកល​វិទ្យា​ល័យ​អាដាម​សុន​នៅ​រដ្ឋ​ធានី​ហ្វី​លី​ពីន បាន​ស្នើ​ឱ្យ​និស្សិត​ចិន​ទាំង​អស់ ត្រូវ​នៅ​ឱ្យ​ឆ្ងាយ​ពី​គេ​រយៈ​ពេល​១៤​ថ្ងៃ ដើម្បី​ជា​ការ​ប្រុង​ប្រយ័ត្ន​អំពី​ការ​ឆ្លង​មេ​រោគ​ថ្មី​។ ប៉ុន្តែ​ការ​សម្រេច​នេះ​បាន​នាំ​ឱ្យ​មាន​ការ​រិះ​គន់​ហើយ​បាន​ធ្វើ​ឱ្យ​សាកល​វិទ្យា​ល័យ​ ពង្រីក​ការ​ដាក់​ឱ្យ​និស្សិត​និង​បុគ្គ​លិក​ទាំង​អស់ ដែល​បាន​ធ្វើ​ដំណើរ​ទៅ​កាន់​តំបន់​ដែល​មាន​វីរុស​រីក​រាល​ដាល ត្រូវ​នៅ​ដាច់​ដោយ​ឡែក​ពី​គ្នា​គេ​រយៈ​ពេល​១៤​ថ្ងៃ​ដូច​គ្នា​ដែរ​។

លោក ឌូទើតេ បាន​និយាយ​នៅ​ក្នុង​សន្និ​សីទ​សារ​ព័ត៌​មាន​មួយ បន្ទាប់​ពី​បាន​ជួប​ជា​មួយ​ភ្នាក់​ងារ​នានា​លើ​វីរុស​កូរ៉ូណា​នេះ​ថា​«​ប្រទេស​ចិន​បាន​ធ្វើ​ល្អ​ចំពោះ​យើង​។ យើង​ក៏​អាច​បង្ហាញ​ការ​អនុ​គ្រោះ​ដូច​គ្នា​ដល់​ពួក​គេ​ដែរ​។ បញ្ឈប់​សកម្ម​ភាព​ស្អប់​ជន​បរ​ទេស​នេះ​»​។

ទំនាក់​ទំនង​ចិន​-​ហ្វី​លី​ពីន តែង​តែ​មាន​ភាព​ល្អក់​កករ​ដោយ​សារ​ជម្លោះ​ដែន​សមុទ្រ​ខាង​ត្បូង ប៉ុន្តែ​ចំណង​ទាក់​ទង​នេះ​មាន​ភាព​កក់​ក្តៅ​វិញ ក្រោម​ការ​ដឹក​នាំ​របស់​លោក ឌូទើតេ ដែល​មិន​ចង់​បង្ក​ឱ្យ​មាន​ការ​ខឹង​សម្បារ​ដល់​ទី​ក្រុង​ប៉េ​កាំង ដោយ​សារ​ចង់​ទាញ​យក​ប្រាក់​កម្ចី​និង​ការ​វិនិ​យោគ​ពី​ចិន​។

លោក ឌូទើតេ បាន​និយាយ​ថា​«​វា​មិន​មែន​ជា​កំហុស​របស់​នរណា​ម្នាក់​ឡើយ​។ មិន​មែន​ជនជាតិចិន មិន​មែន​ជន​ជាតិ​ហ្វី​លី​ពីន​ហ្វី​លី​ពីន ហើយ​ក៏​មិន​មែន​ជា​នរណា​ដែរ​»​។

ប្រទេស​ហ្វី​លី​ពីន​បាន​ប្រកាស​កាល​ពី​ថ្ងៃ​អាទិត្យ​ថា ស្រ្ដី​ជន​ជាតិ​ចិន​ម្នាក់​បាន​ស្លាប់​ដោយ​សារ​ឆ្លង​វីរុស​កូរ៉ូណា​ថ្មី នៅ​ក្នុង​ប្រទេស​ហ្វី​លី​ពីន​។ ប្រ​ជា​ជន​ហ្វី​លី​ពីន បាន​ស្ដី​បន្ទោស​លើ​ជន​ជាតិ​ចិន ជា​អ្នក​បាន​នាំ​យក​វីរុស​នេះ មក​កាន់​ប្រទេស​របស់​ពួក​គេ​៕

ប្រភព​៖​CNA

ផ្ដល់សិទ្ធិដោយ៖ Khmernas

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post