ភ្នំពេញ៖ ពលរដ្ឋមិនត្រូវប្រមូលផលផ្លែសំរ៉ងតាមវិធីរំលំដើមឡើយ ព្រោះវានាំឱ្យប៉ះពាល់ដល់ធនធានធម្មជាតិ និងបរិស្ថាន។ នេះជាការអំពាវនាវមន្ត្រីឧទ្យានុរក្សនៃឧទ្យានជាតិវីរ:ជ័យ ភូមិសាស្ត្រខេត្តស្ទងត្រែង ក្រោយពីឃើញពលរដ្ឋនាំគ្នារំលំដើមសំរ៉ង ដើម្បីប្រមូលផល។
មន្ត្រីឧទ្យានុរក្សនៃឧទ្យានជាតិវីរ:ជ័យ បានបញ្ជាក់ថា ការប្រមូលផលផ្លែសំរ៉ង មានតាំងពីដូនតាមក ដោយប្រើប្រាស់ជាលក្ខណៈគ្រួសារប៉ុណ្ណោះ ហើយការប្រមូលផល គឺធ្វើតាមរបៀបរើសផ្លែសំរ៉ងទុំជ្រុះ។ ប៉ុន្តែចាប់តាំងពីអំឡុងឆ្នាំ១៩៩៩មក នៅពេលផ្លែសំរ៉ង មានតម្រូវការទីផ្សារខ្ពស់ ជាហេតុធ្វើឱ្យប្រជាជ កាប់រំលំដើម ដើម្បីប្រមូលបានផ្លែច្រើនទាន់ចិត្ត ដោយមិនរង់ចាំវាជ្រុះ ទើបបណ្តាលឱ្យដើមសំរ៉ងធំៗកាន់តែថយចុះពីមួយឆ្នាំទៅមួយឆ្នាំ។ មន្ត្រីឧទ្យានុរក្សក៏ធ្លាប់បានផាកពិន័យលើជនដែលផ្តួលរំលំដើមសំរ៉ងផងដែរ។
ផ្អែកតាមការផ្តល់ព័ត៌មានពីគណៈកម្មការសហគមន៍តំបន់ការពារធម្មជាតិអូរទុង បានឱ្យដឹងថា ទីផ្សារ ផ្លែសំរ៉ង មានលក្ខណៈងាយស្រួលបំផុត ពោលគឺដល់រដូវប្រមូលផល មានឈ្មួញក្នុងស្រុកមកចាំប្រមូលទិញនៅក្នុងសហគមន៍តែម្តង ដែលមានតម្លៃចន្លោះពី៣៥០០០រៀលទៅ៤៥០០០រៀល ក្នុងមួយគីឡូក្រាម អាស្រ័យទៅតាមគុណភាពនៃផ្លែសំរ៉ង។ នេះបើតាមក្រសួងបរិស្ថាន។