កាលពីថ្ងៃច័ន្ទ អធិកាបតីប្រទេសអាល្លឺម៉ង់លោកស្រី Angela Merkel បានជំរុញប្រទេសចិនបង្ហាញអំពីតម្លាភាពអំពីដើមកំណើតនៃវីរុសកូរ៉ូណាឬកូវីដ១៩ បន្ទាប់ពីលោកស្រីមានការព្រួយបារម្ភស្រដៀងគ្នានឹងលើកឡើងដោយប្រធានាធិបតីបារាំង នៅក្នុងការបង្ហាញការមិនពេញចិត្តចំពោះការដោះស្រាយរបស់ទីក្រុងប៉េកាំងជុំវិញការរោគរាតត្បាតវីរុសនេះ។
លោកស្រី Angela Merkel បានទាមទារប្រទេសចិនបញ្ចេញព័ត៌មានបន្ថែមអំពីវីរុសនេះ ដោយគូសបញ្ជាក់ពីកម្រិតនៃភាពមិនស្រួលសម្រាប់មេដឹកនាំអឺរ៉ុប ដែលជាទូទៅត្រូវបានគេមើលឃើញថា មិនសូវរិះគន់រដ្ឋាភិបាលចិនជាសាធារណៈ។
ទោះបីជាមានសម្ពាធអន្តរជាតិកើនឡើងបែបនេះក៏ដោយ ក៏រដ្ឋាភិបាលចិនបានបង្ហាញថា ខ្លួនទំនងជាមិនឱនក្បាលចំពោះសហរដ្ឋអាមេរិក ក្នុងការអនុញ្ញាតឱ្យមានដំណើរទស្សនកិច្ចស្រាវជ្រាវមួយ ទៅកាន់មន្ទីរពិសោធន៍សិក្សាអំពីវីរុសនៅទីក្រុងវ៉ូហានឡើយ ខណៈសហរដ្ឋអាមេរិកកំពុងស៊ើបអង្កេតអំពីលទ្ធភាពដែលវីរុសនេះអាចត្រូវបានគេបង្កើតឡើង ប៉ុន្តែត្រូវបានចិនបដិសេធ។
កាលពីសប្តាហ៍មុនប្រធានាធិបតីបារាំងលោក Emmanuel Macron ក៏បានថ្លែងអំពីកង្វះតម្លាភាពរបស់ប្រទេសចិន នៅក្នុងបរិបទនៃភាពខុសគ្នារវាងលទ្ធិប្រជាធិបតេយ្យខាងលិចនិងផ្តាច់ការរបស់ចិន។ កាលពីថ្ងៃអង្គារអ្នកនាំពាក្យក្រសួងការបរទេសចិនលោក Geng Shuang បាននិយាយថា ប្រទេសចិនបានពង្រឹងកិច្ចសហប្រតិបត្តិការអន្តរជាតិ ដើម្បីទប់ស្កាត់ការរាតត្បាតក្នុងលក្ខណៈបើកចំហរ តម្លាភាព និងទទួលខុសត្រូវ៕ ប្រភព៖ South China Morning