កម្ពុជា អាចនឹងមានភ្លៀងធ្លាក់រាយប៉ាយ នៅតាមបណ្ដាខេត្តនានា ទូទាំងប្រទេស ដោយសារជ្រលងសម្ពាធខ្ពស់ពីប្រទេសចិន មានឥទ្ធិពលខ្សោយគ្របដណ្ដប់លើកម្ពុជា ចាប់ពីថ្ងៃទី ២៩ ខែមេសា ដល់ថ្ងៃទី ៥ ខែឧសភា។ នេះបើតាមសេចក្ដីជូនដំណឹងរបស់ក្រសួងធនធានទឹក និងឧតុនិយម នៅថ្ងៃទី ២៨ មេសា ឆ្នាំ ២០២០។
បើតាមសេចក្តីជូនដំណឹងដដែល សម្រាប់បណ្ដាខេត្ត នៅតំបន់វាល់ទំនាបកណ្ដាល សីតុណ្ហភាពអប្បរបរមា មានពី ២៥អង្សាសេ ដល់ ២៧អង្សាសេ និង សីតុណ្ហភាពអតិបរមា មានពី ៣៤ ដល់ ៣៧អង្សាសេ ហើយនឹងមានភ្លៀងធ្លាក់រាយប៉ាយ នៅភាគពាយ័ព្យ និងភាគខាងត្បូងពីកម្រតតិចទៅច្រើន។
រីឯនៅតំបន់ជួរភ្នំដងរែក និងខ្ពង់រាបឦសាន សីតុណ្ហភាពអប្បបរមាចាប់ពី ២៤ ដល់ ២៦អង្សាសេ និងសីតុណ្ហភាពអតិបរមាចាប់ពី ៣៣ ដល់ ៣៦អង្សាសេ និងមានភ្លៀងធ្លាក់រាយប៉ាយក្នុងកម្រិតតិច។ចំណែកនៅតំបន់មាត់សមុទ្រវិញ តុណ្ហភាពអប្បបរមាចាប់ពី ២៥ ដល់ ២៧អង្សាសេ និងសីតុណ្ហភាពអតិបរមាចាប់ពី ៣២ ដល់ ៣៤អង្សាសេ អាចនឹងមានភ្លៀងធ្លាក់រាយប៉ាយក្នុងកម្រិតតិច ទៅបង្គួរ។
ជាមួយគ្នានេះ ក្រសួងធនធានទឹក បានអំពាវនាវឲ្យប្រជាពលរដ្ឋបង្កើនការប្រុងប្រយ័ត្នឲ្យបានខ្ពស់ ចំពោះបាតុភូត ផ្គរន្ទះ និងខ្យល់កន្រ្តាក់ ដែលនឹងអាចកើតមានឡើង ជាពិសេសនៅតំបន់ជាប់មាត់សមុទ្រ ចាប់ពីថ្ងៃទី ២៩ មេសាដល់ ១ខែឧសភា៕
ផ្ដល់សិទ្ធិដោយ៖ khmernas
