អាមេរិកផ្ដល់ជំនួយបន្ថែម ជាង១លានដុល្លារ ឲ្យកម្ពុជាដើម្បីប្រយុទ្ធប្រឆាំងជំងឺ កូវីដ ១៩

សហរដ្ឋអាមេរិកផ្ដល់ជំនួយចំនួន ១,៥លានដុល្លារដល់កម្ពុជាដើម្បីចូលរួមប្រយុទ្ធប្រឆាំងនឹងជំងឺ កូវីដ ១៩​កាលពីពីថ្ងៃទី ២៧ ខែ មេសា នៅទីស្តីការក្រសួងសុខាភិបាល។

លោក W. Patrick Murphy ឯកអគ្គ​រដ្ឋទូត​អាមេរិកប្រចាំកម្ពុជាបានសរសេរតាមបណ្ដាញសង្គម Twitterថា ៖ « ពិតជាមានកិត្តិយសណាស់ក្នុងការប្រកាសអំពីការចូលរួមវិភាគទានបន្ថែមរបស់សហរដ្ឋអាមេរិកចំនួន ១,៥ លានដុល្លារដើម្បីជួយដល់ប្រទេសកម្ពុជាប្រយុទ្ធប្រឆាំងនឹងជំងឺ កូវីដ១៩ » ។

លោកបញ្ជាក់ថា ចាប់តាំងពីផ្ទុះឡើងនៃជំងឺ កូវីដ ១៩មកសហរដ្ឋអាមេរិកបានផ្តល់ថវិកាជាង ៣.៥ លានដុល្លារដល់កម្ពុជាក្នុងការឆ្លើយតប និងទប់ស្កាត់ការរីករាលដាលនៅប្រទេសកម្ពុជា។

តាមរបាយការណ៍របស់ក្រសួងសុខាភិបាលឲ្យដឹងថា ត្រឹមថ្ងៃទី ២៨ ខែ មេសានេះចំនួនអ្នកឆ្លងជំងឺ កូវីដ ១៩ មានការថមថយខ្លាំង ខណៈដែរអ្នកកំពុងសម្រាកព្យាបាលនៅមន្ទីរពេទ្យសល់ត្រឹម ៣នាក់ប៉ុណ្ណោះ និងអ្នកឆ្លងសរុបត្រឹម ១២២នាក់៕

ផ្ដល់សិទ្ធិដោយ៖ khmernas