ប្រជាជនអាមេរិកចំនួន៤,៤លាននាក់ផ្សេងទៀត បានដាក់ពាក្យស្នើសុំអត្ថប្រយោជន៍ពីបាត់បង់ការងារធ្វើកាលពីសប្តាហ៍មុន ខណៈការប៉ះពាល់សេដ្ឋកិច្ចរបស់ប្រទេសដោយសារជំងឺរាតត្បាត នៅតែបន្តកើនឡើង។
ពាក្យសុំថ្មីៗនេះ បាននាំឱ្យមានចំនួនអ្នកបាត់បង់ការងារធ្វើសរុបនៅសហរដ្ឋអាមេរិកចាប់តាំងពីពាក់កណ្តាលខែមីនាមកបានកើនដល់២៦,៤លាននាក់។
សេដ្ឋវិទូបានព្រមានថា ពិភពលោកកំពុងប្រឈមមុខនឹងការធ្លាក់ចុះយ៉ាងខ្លាំង ចាប់តាំងពីមហាវិបត្តិសេដ្ឋកិច្ចក្នុងទសវត្សឆ្នាំ១៩៣០ ។
នៅសហរដ្ឋអាមេរិក សេដ្ឋកិច្ចត្រូវបានរំពឹងថានឹងធ្លាក់ចុះ៥,៩% នៅឆ្នាំនេះ នេះបើយោងតាមមូលនិធិរូបិយវត្ថុអន្តរជាតិ។ ក្នុងរយៈពេលតែប្រាំមួយសប្តាហ៍មកនេះ ការកើនឡើងនៃអ្នកបាត់បង់ការងារធ្វើ បានកើនលើសចំនួនការងារដែលត្រូវបានបង្កើតឡើង ក្នុង រយៈពេលជិតមួយទសវត្សមកនេះ។
ជាការឆ្លើយតប រដ្ឋាភិបាលសហរដ្ឋអាមេរិក បានអនុម័តថវិកាជួយសង្គ្រោះជាង២ទ្រីលានដុល្លារ ដើម្បីគាំទ្រដល់អ្នកបានបាត់បង់ការងារធ្វើ និងដើម្បីបង្កើនការចំណាយក្នុងចំណោមវិធានការណ៍ផ្សេងៗទៀត៕
ប្រភព៖BBC
ផ្ដល់សិទ្ធិដោយ៖ khmernas