បុរសអាយុ៦៥ឆ្នាំម្នាក់ ត្រូវបានសង្គ្រោះជាបន្ទាន់នៅមន្ទីរពេទ្យនៅពីថ្ងៃសុក្រនេះ បន្ទាប់ពីបរិភោគត្រីក្រពតដែលគាត់ចាប់បាននៅក្នុងទឹកមួយកន្លែងនៅទីក្រុងហុងកុង។
ក្រោយមានរយៈពេល២ម៉ោងបន្ទាប់ពីចម្អិន ហើយបរិភោគសម្រាប់អាហារថ្ងៃត្រង់នៅផ្ទះនៅថ្ងៃព្រហស្បតិ៍ មុខរបស់បុរសនោះចាប់ផ្ដើមស្ពឹកស្រពន់ ខ្លួនប្រាណចុះខ្សោយ ហើយបេះដូងចុះខ្សោយ។ នេះបើយោងតាមនាយកដ្ឋានសុខាភិបាលទីក្រុងហុងកុង។
មន្រ្តីបាននិយាយថា ត្រីក្រពតនេះមានផ្ទុកសារធាតុពុល neurotoxin ដែលអាចបណ្តាលឱ្យស្លាប់ ហើយវាមិនត្រូវបានគេស្គាល់អំពីប្រភេទថ្នាំដែលបន្សាបសារធាតុពុលនេះឡើយ។
មជ្ឈមណ្ឌលការពារសុខភាពរបស់នាយកដ្ឋានសុខាភិបាលកំពុងស៊ើបអង្កេតលើការសង្ស័យពុលនេះ ហើយបានក្រើនរំលឹកដល់ពលរដ្ឋហុងកុងកុំឱ្យបរិភោគត្រីក្រពត។
អ្នកនាំពាក្យមជ្ឈមណ្ឌលនេះបាននិយាយថា សរីរាង្គរបស់ត្រីក្រពត ដូចជាថ្លើម ពង និងស្បែក គឺមានសារធាតុពុល tetrodotoxinខ្ពស់ ថ្វីត្បិតត្រីនេះត្រូវចម្អិនឱ្យឆ្អិនយ៉ាងណាក៏ដោយ៕
ប្រភព៖scmp
ផ្ដល់សិទ្ធិដោយ៖ khmernas