លោក ហ៊ឹម យ៉ាន អគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោកបានថ្លែងនៅថ្ងៃទី៣០មេសាថា ពលរដ្ឋដែលប្រើប្រាស់រថយន្តបង់រំលស់ គឺត្រូវតែទៅសុំថតចម្លងបណ្ណសម្គាល់រថយន្តពីក្រុមហ៊ុនបង់រំលស់ រួចហើយយកទៅឱ្យខាងអាជ្ញាធរមូលដ្ឋានបោះត្រាទទួលស្គាល់ ទើបអាចរួចផុតពីការផាកពិន័យ នៅក្នុងការអនុវត្តច្បាប់ចរាចរណ៍តាមអនុក្រឹត្យថ្មីរបស់រដ្ឋាភិបាល។
លោកថា៖«រថយន្តបង់រំលស់ គឺមានបណ្ណសម្គាល់អស់ហើយចេញដោយក្រសួងសាធារណការ ប៉ុន្តែខាងក្រុមហ៊ុនគេរក្សាទុក។ ដូច្នេះយើងបានគិតដល់អំពីបញ្ហានេះ គឺយើងយកតែលិខិតបញ្ជាក់ ហើយមានអាជ្ញាធរមូលដ្ឋានប្រតាប់ត្រា គឺយើងទទួលស្គាល់បាន។ អ៊ីចឹង! អ្នកដែលមានរថយន្តបែបនេះ គឺស្នើសុំទៅក្រុមហ៊ុន ដើម្បីថតចម្លងបណ្ណសម្គាល់ ហើយយកបញ្ជាក់ជាមួយអាជ្ញាធរមូលដ្ឋាន ដោយប្រើរយៈពេលលឿនបំផុត ដោយគ្មានបញ្ហាលំបាកអីទេ»។
ប៉ុន្តែលោកបន្តថា សម្រាប់អ្នកបើកបររថយន្តឱ្យក្រុមហ៊ុន គឺត្រូវតែមានបណ្ណបើកបរ ហើយត្រូវបានលិខិតធ្វើអាជីវកម្មដែលជាលិខិតដើមដាក់តាមជាប់រថយន្ត៕
ផ្ដល់សិទ្ធិដោយ៖ Khmernas