សាលាដំបូងរាជធានីភ្នំពេញ កាលពីថ្ងៃទី ៩ខែឧសភា បានសម្រេចឃុំខ្លួន លោកម៉ៃ តុលា អតីតអគ្គលេខាធិការរងសហព័ន្ធកីឡាបាល់ទាត់កម្ពុជា ក្នុងពន្ធនាគារព្រៃស។ ការឃុំខ្លួននេះ ត្រូវបានអ្នកនាំពាក្យសាលាដំបូងរាជធានីភ្នំពេញ អះអាងថា លោក ម៉ៃ តុលា ត្រូវបានចៅក្រមស៊ើបសួរ សម្រេចចោទប្រកាន់ពីបទរំលោភទំនុកចិត្ត ដោយអភិបាល តាមបញ្ញត្តិមាត្រា ៣៩២នៃក្រមព្រហ្មទណ្ឌ។ មានត្រា ៣៩៣ ដែលចែងថា ប្រសិនបើតុលាការរកឃើញថា ជនជាប់ចោទពិតជាបានប្រព្រឹត្តិដូចការចោទប្រកាន់មែន គឺនឹងត្រូវប្រឈមការផ្តន្ទាទោសដាក់ពន្ធនាគារពី ២ទៅ ៥ឆ្នាំ និងពិន័យជាប្រាក់ ពី ៤ទៅ ១០លានរៀល។
ការចោទប្រកាន់ និងការឃុំខ្លួន លោកម៉ៃ តុលា ត្រូវបានធ្វើឡើងក្រោយអតីតអគ្គលេខាធិការរងសហព័ន្ធបាល់ទាត់កម្ពុជារូបនេះ ត្រូវអង្គភាពប្រឆាំងអំពើពុករលួយ ហៅសួរ ហើយបញ្ចូនខ្លួនទៅសាលាដំបូងរាជធានីភ្នំពេញ កាលពីថ្ងៃទី ៨ខែឧសភា។
សូមរម្លឹកជូនថា លោកម៉ៃ តុលា គឺជាអតីតមន្ត្រីម្នាក់ ក្នុងចំណោមមន្ត្រីទាំង ៤នាក់ ដែលត្រូវសហព័ន្ធកីឡាបាល់ទាត់កម្ពុជា សម្រេចព្យួរការងារពាក់ព័ន្ធនឹងបាល់ទាត់អស់មួយជីវិត ដោយសារអំពើពុករលួយកិបកេងប្រាក់សហព័ន្ធពីការរៀបចំព្រឹត្តិការណ៍ Tiger Street Football ប្រមាណ ៦ម៉ឺនដុល្លារអាមេរិក តាំងពីឆ្នាំ ២០១៣មក៕
ប្រភព៖ ភ្នំពេញប៉ុស្តិ៍
ផ្ដល់សិទ្ធិដោយ៖ khmernas