មនុស្ស២នាក់បានស្លាប់ និង៣នាក់កំពុងធ្វើការសង្រ្គោះបន្ទាន់នៅមន្ទីរពេទ្យក្នុង ស្រុកឱរ៉ាល់ ខេត្តកំពង់ស្ពឺដោយសារពុលត្រីកំពត។ នេះបើតាមការប្រកាសព័ត៌មានរបស់ស្នងការដ្ឋាននគរបាលខេត្តកំពង់ស្ពឺ នៅថ្ងៃទី២៦ ខែឧសភា។
ស្នងការខេត្តកំពង់ស្ពឺឲ្យដឹងថា មានមនុស្ស៥នាក់បានហូបត្រីកំពតជាមួយគ្នា ហើយមាន២ នាក់បានពុលស្លាប់ ចំណែក៣ នាក់ទៀតត្រូវបានជួយសង្រ្គោះទាន់ពេលវេលា។
បើតាមជនរងគ្រោះបានរៀបរាប់ថា ដំបូងឡើយពួកយើងបាននាំគ្នាយកត្រីដែលអូសបានយកមកធ្វើម្ហូបដូចសព្វមួយដង តែមិនដឹងថាត្រីកំពតនេះពុលនោះទេ។ ហើយអាចម៍ត្រីកំពតដែលធ្វើរួចត្រូវបោះចោលទៅលើដីបានធ្វើឲ្យមាន់៧ ក្បាល និងឆ្កែ១ ក្បាលស្លាប់ដោយពុលដូចគ្នា។
ស្នងការខេត្តកំពង់ស្ពឺ បានអំពាវនាវឲ្យពលរដ្ឋ ទូទាំងប្រទេសត្រូវប្រុងប្រយ័ត្នបំផុតចំពោះអាហារប្រចាំថៃ្ង ពិសេសករណីត្រីកំពត ព្រោះត្រីប្រភេទនេះបំពុលមនុស្សស្លាប់មិនតិចនាក់ទេកន្លងមក៕
ផ្ដល់សិទ្ធិដោយ៖ khmernas
