ការ​ប្រើ​សម្ដី​ប្រមាថ​សមត្ថកិច្ច​ គឺ​អាច​ជាប់​ពន្ធ​នា​គារ​ ពី១​ថ្ងៃ​ទៅ​៦ថ្ងៃ ​

នាយកដ្ឋាននគរបាលចរាចរណ៍ និងសណ្ដាប់ធ្នាប់សារធារណៈនៃអគ្គស្នងការនគរបាលជាតិ បានអះអាងនៅថ្ងៃទី៣ខែឧសភាថា ការប្រើប្រាស់ពាក្យសម្ដីប្រមាថ ធ្វើឱ្យប៉ះពាល់កត្តិយសសមត្ថកិច្ច ដែលអនុវត្តច្បាប់ គឺជាបទល្មើសមួយ ដែលអាចជាប់ពន្ធនាគារពី១ថ្ងៃ ទៅ៦ថ្ងៃ។

ការបញ្ជាក់ពីនាយកដ្ឋាននេះ បន្ទាប់ពីមានស្រ្តីម្នាក់ជាអ្នករួមដំណើរនៅក្នុងរថយន្តម៉ាកព្រុសមួយគ្រឿង បានLiveតាមគណនីហ្វេសប៊ុកឈ្មោះ Ravy Khmer ដោយបានប្រើពាក្យសម្តីប្រមាថ និងសរសេរលើCaptionថា«ចោរស្របច្បាប់ មិនបាច់និយាយក៏គេដឹង» ដែលជាការប្រព្រឹត្តិល្មើសនឹងមាត្រា៧៣ ការរំលោភលើរាងកាយ កិត្ដិយស សេចក្ដីថ្លៃថ្នូរ របស់មន្ត្រីអនុវត្តច្បាប់ចរាចរណ៍ផ្លូវគោកដែលកំពុងបំពេញភារកិច្ច ត្រូវផ្តន្ទាទោសតាមក្រមព្រហ្មទណ្ឌជាធរមាន(មាត្រា៥០២ បទប្រមាថ ត្រូវផ្ដន្ទាទោសដាក់ពន្ធនាគារពី ១ថ្ងៃ ទៅ ៦ថ្ងៃ។

ស្រ្ដីរូបនោះបានLive វីដេអូ បន្ទាប់ពីខឹងមន្រ្តីនគរបាលចរាចរណ៍នៅខេត្តកំពង់ធំ ដែលបានផាកពិន័យរថយន្តរបស់នាងចំនួន១៥ម៉ឺនរៀល ខណៈនាងអះអាងថា ដោយសារតែខូចភ្លើងអំបូលមួយ។ ស្រ្ដីរូបនេះ ត្រូវមន្រ្តីព្រមានអនុវត្តតាមច្បាប់ ប្រសិនបើមិនចូលខ្លួនមកដោះស្រាយជាមួយសមត្ថកិច្ចចំពោះការប្រើប្រាស់សម្ដីប្រមាថនេះទេ៕

ផ្ដល់សិទ្ធិដោយ៖ khmernas