លោក នេត្រ ភក្ត្រា រដ្ឋលេខាធិការនិងជាមន្ត្រីនាំពាក្យក្រសួងបរិស្ថានអះអាងថា ក្រុមការងារចម្រុះដែលដឹកនាំដោយព្រះភិក្ខុ ប៊ុន សាលួត ព្រះមេគណខេត្តឧត្តរមានជ័យនិងជាប្រធានព្រៃសហគមន៍សង្ឃរុក្ខវ័ន បានចុះពិនិត្យសពសត្វទន្សោងដែលត្រូវបានប្រទះឃើញស្អុយរលួយកាលពីថ្ងៃទី២០មិថុនា ហើយបានសន្និដ្ឋានថាសត្វទន្សោងនេះ អាចត្រូវបាញ់គេគ្រាប់កាំភ្លើងព្រោះបានរកឃើញថាមានបាក់ឆ្អឹងជំនីចំនួន២ កាំនៅផ្នែកខាងឆ្វេង។
សាកសពសត្វទន្សោងនេះត្រូវបានដឹកមកកាន់ទីស្នាក់ការសហគមន៍ព្រៃសង្ឃរុក្ខវ័ន ដើម្បីធ្វើពិធីបង្សុកូលឧទ្ទិសកុសលតាមបែបពុទ្ធសាសនា រួចហើយនឹងកប់ទន្ទឹមនឹងសាកសពទន្សោងដែលបានងាប់កាលពីថ្ងៃទី២៤ ខែឧសភាកន្លងទៅ។
លោក នេត ភក្ត្រា បញ្ជាក់ថា នេះជាសត្វទន្សោងទី៦ ហើយដែលងាប់នៅក្នុងព្រៃសហគ មន៍សង្ឃរុក្ខវ័នក្នុងរយៈពេល៦ខែចុងក្រោយនេះ។ សត្វទន្សោងទី៥ ដែលបានរកឃើញកាលពីថ្ងៃទី២៤ ខែឧសភា និងបានស្លាប់ដោយការជាប់អន្ទាក់របស់ព្រានព្រៃក្រោយពីការខិតខំជួយសង្គ្រោះជីវិតសត្វទន្សោងនេះពីពេទ្យសត្វខណៈទន្សោងញីឈ្មោលផ្សេងទៀតចំនួន ៤ ក្បាលបានស្លាប់ដោយជាប់អន្ទាក់ និងដោយសារអន្ទាក់ឆក់កាលពីដើមឆ្នាំ ២០២០។
លោកបន្តថា ចាប់តាំងពីខែមករាដល់ខែមិថុនានេះ សត្វទន្សោងយ៉ាងហោចចំនួន១០ ក្បាលហើយដែលបានរកឃើញថា ងាប់ក្នុងតំបន់ការពារធម្មជាតិរបស់កម្ពុជា ដែលក្នុងនោះ១ក្បាលរកឃើញងាប់ដោយជាប់អន្ទាក់នៅក្នុងខេត្តកំពង់ស្ពឺ ៦ក្បាលងាប់ដោយជាប់អន្ទាក់និងបាញ់ក្នុងដែនជម្រកសត្វព្រៃសង្ឃរុក្ខវ័នក្នុងខេត្តឧត្តរមានជ័យ និង២ក្បាលក្នុងតំបន់ជាប់នឹងដែនជម្រកសត្វព្រៃភ្នំព្រេចដោយសារការបាញ់ សម្លាប់ និងកូនទន្សោងញី១ក្បាលរកឃើញស្លាប់ក្នុងដែនជម្រកសត្វព្រៃលំផាត់ ក្នុងខេត្តមណ្ឌលគិរីដោយសារតែជាប់អន្ទាក់។
ឯកឧត្តម នេត្រ ភក្ត្រា បានឱ្យដឹងថាតាមរបាយការណ៍សិក្សារបាយប្រជាជនសត្វទន្សោង នៅក្នុងប្រទេសកម្ពុជាមានចន្លោះពី ២៧០០ ទៅ ៥៧០០ ក្បាល។ ចំនួននេះបានធ្វើឱ្យប្រទេសកម្ពុជា ជាកន្លែងដែលមានវត្តមានសត្វទន្សោងច្រើនជាងគេនៅលើពិភពលោក ខណៈចំនួនសត្វទន្សោង សរុបនៅលើពិភពលោកត្រូវបានគេប៉ានស្មានថាមានចន្លោះពី ៥៩០០ ទៅ ១១០០០ ក្បាលតែប៉ុណ្ណោះ៕
