សង្គម
អាម៉ាប៉ាប៉ាញ៉ូសអាជីវករមួយចំនួន ដែលកំពុងរស់នៅ និងប្រកបអាជីវកម្មច្រកឡែម ឬដូង ព្រំដែនកម្ពុជា-ថៃ បានរអ៊ូរទាំថា ពួកគាត់កំពុងមានបញ្ហាជីវភាព ព្រោះអាជ្ញាធរមិនអនុញ្ញាតឲ្យចូលទៅលក់ដូរដូចមុន។ នេះបើតាមការបញ្ជាក់ប្រាប់របស់អាជីវករនៅព្រឹកថ្ងៃទី ២៧ ខែមិថុនានេះ។
អាជីវករបាននិយាយប្រាប់សារព័ត៌មានខ្មែរណាស់តាមរយៈសារអេឡិចត្រូនិចដូច្នេះថា« អ្វីដែលចង់ឲ្យអាជ្ញាធរជួយសំខាន់បំផុតគឺជួយសម្រួលតាមព្រំដែននឹងតែម្តង ព្រោះរាល់អាជីវករ និងពលករ គឺវេទនាណាស់ មិនមានលុយក្នុងខ្លួនទេ ព្រោះបិទតាំងពីខែបីរហូតដល់ឥឡូវ ហើយពេលនេះក៏បន្តបិទទៀត ចំណែកធានាគារមិនសម្រាកឲ្យយើងទេដោយគ្រាន់តែសុំពន្យាពេលក៏មិនបាន ទាំងការជួលបន្ទប់ ជួលតូបក៏គេអត់យោគយល់ដែរ ដោយឡែកយើងត្រូវចំណាយការចាយវាយរាល់ថ្ងៃ បើនៅតែបែបនេះគឺមានស្លាប់។ ចំណែកពលករក៏ដូចគ្នា ខ្លះត្រូវចូលទៅធ្វើការ ដើម្បីយកប្រាក់កម្រៃផ្តល់ទៅគ្រួសារដើម្បីផ្គត់ផ្គង់ជីវភាព ហើយពេលស្ថានភាពចឹងទៅ គឺវេទនាដូចគ្នា»។
អាជីវករ ដែលសុំមិនបញ្ចេញឈ្មោះរូបនេះ បានសំណូមពរដល់អាជ្ញាធរកម្ពុជា ជួយដោះស្រាយ និងសម្រួលជាមួយអាជ្ញាធរថៃជាបន្ទាន់ ឲ្យពួកគាត់អាចចូលលក់ដូរបានវិញ ដើម្បីជួយដល់ជីវភាពពួកគាត់ ដែលកំពុងជួបការលំបាកខ្លាំងនាពេលសព្វថ្ងៃនេះ។
សូមបញ្ជាក់ថា អាជ្ញាធរកម្ពុជា ថៃ បានបិទច្រកព្រំដែនដើម្បីទប់ស្កាត់ការរីករាលដាលជំងឺកូវីដ១៩ ចាប់តាំងពីអំឡុងខែ មិនាមកម្លេះ។
ទោះយ៉ាងណាអាជីវករ បានអះអាងថា ទំនិញថៃ នៅតែបន្តដឹកចូលកម្ពុជា តាមច្រកឡែមនេះ ធម្មតា ប៉ុន្តែអាជ្ញាធរថៃ មិនអនុញ្ញាតឲ្យអាជីវករខ្មែរចូលលក់ដូរក្នុងទឹកដីថៃនោះទេ៕