អាជ្ញាធរនៅរដ្ឋធានីប៉េកាំងបានដាក់បំរាមការធ្វើទេសចរណ៍ ហើយបានបិទតំបន់រស់ នៅរបស់ប្រជាជនចំនួន១១កន្លែង និងបិទផ្សារធំៗលក់បោះដុំ៦កន្លែងទៀត ចាប់ពីថ្ងៃសៅរ៍ទី១៣មិថុនានេះ ដើម្បីទប់ស្កាត់ការរាលដាលនៃជំងឺកូវីដ១៩។
វិធានទាំងនេះបានធ្វើឡើងភ្លាមៗ បន្ទាប់ពីបានរកឃើញករណីឆ្លងជំងឺកូវីដ១៩ជាចង្កោមថ្មីមួយ នៅក្នុងផ្សារលក់បោះដុំដ៏ធំមួយនៅក្នុងទីក្រុងប៉េកាំង ដែលបង្កឱ្យមានការភ័យព្រួយអំពីការកើតឡើងរលកថ្មីនៃការឆ្លងរាលដាលនៅក្នុងប្រទេសចិនឡើងវិញ។
លោក Chu Junwei មន្រ្តីម្នាក់នៅខណ្ឌFengtaiដែលស្ថិតនៅភាគនិរតីទីក្រុងប៉េកាំង បានប្រាប់សន្និសីទកាសែតមួយថា ខណ្ឌFengtaiត្រូវបានដាក់ក្នុងភាពអាសន្ន បន្ទាប់ពីមានមនុស្សចំនួន៤៥នាក់ក្នុងចំណោម៥១៧នាក់ដែលត្រូវបានធ្វើតេស្តនៅឯផ្សារលក់បោះដុំឈ្មោះ Xinfadi មានវិជ្ជមានជំងឺកូវីដ១៩ ថ្វីត្បិតគ្មាននរណាម្នាក់បានបង្ហាញរោគសញ្ញាក្ដី។
អ្នកនាំពាក្យទីក្រុងប៉េកាំងក៏បានលើកឡើងថា អ្នកជំងឺកូវីដ១៩ចំនួន៦នាក់ ត្រូវបានគេរាយការណ៍នៅក្នុងទីក្រុងប៉េកាំងកាលពីថ្ងៃសុក្រ បន្ទាប់អ្នកទាំងនោះបានធ្វើដំណើរទៅកាន់ផ្សារXinfadi ។ មន្រ្តីនេះបន្តថា ទីក្រុងបានផ្អាកព្រឹត្តិការណ៍កីឡានានា ការធ្វើទេសចរណ៍ឆ្លងខេត្ត ហើយក្នុងនោះសាលារៀននិងសាលាមត្តេយ្យជិត៩កន្លែងក៏ត្រូវបានបិទ។
មន្រ្តីចិនបានបញ្ជាក់ថាដែរថា ក្រៅពីមានមនុស្សត្រូវបានធ្វើតេស្ដវិជ្ជមានជំងឺកូវីដ១៩ ក្នុងនោះ អាជ្ញាធរក៏បានរកឃើញវីរុសនេះស្ថិតនៅលើក្ដារបន្ទះសម្រាប់កាប់សាច់មួយ ដែលត្រូវបានគេប្រើសម្រាប់ធ្វើត្រីសាម៉ុនដែលបាននាំចូលមកក្នុងផ្សារXinfadi ខណៈផ្សារនេះត្រូវបានគេដឹងថា ជាកន្លែងផ្គត់ផ្គង់បន្លែនិងផ្លែឈើប្រហែល៩០%នៅក្នុងទីក្រុងប៉េកាំង។
ការរកឃើញករណីឆ្លងជាចង្កោមនៅទីក្រុងប៉េកាំងនេះ បាននាំឱ្យមានការព្រួយបារម្ភអំពីការកើតឡើងរលកទី២នៃឆ្លងជំងឺកូវីដ១៩នៅក្នុងប្រទេសចិន ខណៈប្រទេសជាច្រើនហាក់ចាប់ផ្ដើមទប់ស្កាត់បានការរីករាលដាលជំងឺនេះ។
ជំងឺកូវីដ១៩ ត្រូវបានគេរាយការណ៍ជាលើកដំបូងនៅឯទីផ្សារអាហារសមុទ្រមួយ នៅទីក្រុងវ៉ូហានខេត្តហ៊ូប៉ីភាគកណ្តាលរបស់ប្រទេសចិនកាលពីខែធ្នូ មុនវាបានរាលដាលនៅទូទាំងពិភពលោក។
មន្រ្តីនៅមជ្ឈមណ្ឌលគ្រប់គ្រងជម្ងឺ(CDC)នៅទីក្រុងប៉េកាំងបាននិយាយថា តាមការការវិនិច្ឆ័យបឋមបង្ហាញថា ករណីឆ្លងទាំងនេះ អាចមានទំនាក់ទំនងជាមួយបរិស្ថានដែលមានភាពកខ្វក់នៅក្នុងទីផ្សារ ឬត្រូវបានឆ្លងបន្ទាប់ពីមានទំនាក់ទំនងជាមួយមនុស្សដែលឆ្លង៕
ផ្ដល់សិទ្ធិដោយ khmernas
