សង្គម
អាម៉ាប៉ាប៉ាញ៉ូសភ្នំពេញ ៖ សមត្ថកិច្ចនគរបាលចរាចរណ៍ម្នាក់ ខណៈកំពុងបំពេញភារកិច្ចសម្រួលចរាចរណ៍លើដងផ្លូវ ជូនក្បួនថ្នាក់ដឹកនាំបើកឆ្លងកាត់ ក៏មានយុវជនម្នាក់ជិះម៉ូតូយ៉ាងលឿន បេីកល្មើសបំពានមិនស្តាប់ការបញ្ជារបស់នគរបាល ឲ្យអែបខាងឡេីយ ហេីយថែមទាំងបើកបំបុកទាំងនគរបាលចរាចរណ៍ ប៉ើងខ្ទាត៥ម៉ែត្រ បណ្តាលឲ្យនគរបាលរូបនោះ រងរបួសបាក់ភ្លៅខាងស្តាំម្ខាង ចំណែកយុវជនខាងលើត្រូវបានសមត្ថកិច្ចឃាត់ខ្លួនបានផងដែរ ។
ករណីនេះកើតឡើងកាលពីវេលាម៉ោង ០៩ និង៣០នាទីព្រឹក ថ្ងៃទី២២ ខែមិថុនា ឆ្នាំ២០២០ នៅលេីកំណាត់ផ្លូវ៦០ម៉ែត្រ ជិតស្ពានថ្មព្រំប្រទល់ខណ្ឌដង្កោ ដែលស្ថិតក្នុងភូមិព្រែកតាឡុង៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
ប្រភពពីកម្លាំងដែលនៅកន្លែងកេីតហេតុបានអោយដឹងថា មន្ត្រីនគរបាលដែលរងរបួសបាក់ភ្លៅមានឈ្មោះ ម៉ាក់ សាម៉ុនសៅរ៍ម៉ា មានឋានៈជាអនុសេនីយ៍ត្រី ជាមន្ត្រីផ្នែកសណ្ដាប់ធ្នាប់ចរាចរណ៍ នៅប៉ុស្តិរដ្ឋបាលចាក់អង្រែក្រោម នៃអធិការដ្ឋាននគរបាលខណ្ឌមានជ័យ ។
បច្ចុប្បន្នត្រូវបានកម្លាំងនគរបាល និងកម្លាំងប្រជាការពារខណ្ឌមានជ័យ ជួយលេីកឡេីងរថយន្ត បញ្ជូនទៅសង្គ្រោះនៅមន្ទីរពេទ្យ ចំណែកយុវជនដែលបេីកម៉ូតូ បុកសមត្ថកិច្ចត្រូវបានសមត្ថកិច្ចឃាត់ខ្លួននាំមកសាកសួរ នៅស្នាក់ការប៉ុស្តិ៍ចាក់អង្រែក្រោម ដេីម្បីរងចាំដោះស្រាយគ្នានៅពេលក្រោយ ។