សង្គម
អាម៉ាប៉ាប៉ាញ៉ូសខេត្តកណ្តាល៖ កម្លាំងសមត្ថកិច្ចចម្រុះ របស់គណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក.) បានធ្វើការចុះបង្ក្រាបទីតាំងសិប្បកម្ម លីងកាហ្វេ និងសណ្តែកយីហោឈ្មោះ ថុន ណាត ស្ថិតនៅក្នុងភូមិត្រពាំងខ្ទឹម ឃុំក្រាំងម្កាក់ ស្រុកអង្គស្នួល ខេត្តកណ្តាល កាលពីដើមខែកក្កដាកន្លងទៅ ហើយសំណុំរឿងនេះ ត្រូវបានលោក ឯក ស៊ុនរស្មី ព្រះរាជអាជ្ញារងតំណាងអយ្យការអមសាលាដំបូងខេត្តកណ្តាល បានចេញដីកាសន្និដ្ឋានបញ្ជូនរឿងទៅជំនុំជម្រះផ្ទាល់ ក្រោយពីបានពិនិត្យសំណុំរឿងករណីក្លែងផលិតផលទំនិញ (លីងកាហ្វេនិងសណ្តែកផ្សំសារធាតុគីមី) នៅថ្ងៃទី ១៦ ខែកក្កដា ឆ្នាំ ២០២០។ នេះបើតាមគណៈកម្មាធិការប្រយុទ្ធប្រឆាំងផលិតផលក្លែងក្លាយផ្តល់ព័ត៌មានដល់សារព័ត៌មានខ្មែរណាស់ នៅថ្ងៃទី ២០ ខែកក្កដា។
ម្ចាស់សិប្បកម្មឈ្មោះ ថុន ណាត និងលួត លាង បានធ្វើសកម្មភាពលីងកាហ្វេ និងសណ្តែកលាយផ្សំដោយសារធាតុគីមីខុសច្បាប់ រួចហើយយកទៅលក់ទីផ្សារកម្ពុជា ដែលបង្កគ្រោះថ្នាក់មានហានិភ័យខ្ពស់ដល់សុខភាព។
ម្ចាស់សិប្បកម្មរូបនេះ បានឲ្យដឹងថា ខ្លួនបានបើកអាជីវកម្មនេះរយៈពេល២ឆ្នាំមកហើយ ដោយចេះរូបមន្តផ្សំតពីគេ និងវត្ថុធាតុដើមគ្រាប់កាហ្វេនាំយកមកពីផ្សារអូឬស្សី ១ខែ១តោន ដោយក្នុង១គីឡូ តម្លៃ ១៥០០០រៀល។
បើតាមម្ចាស់អាជីវកម្មឈ្មោះ ថុន ណាត បានសារភាពថា ក្នុងមួយថ្ងៃខ្លួនផលិតកាហ្វេបាន៥ឡ ក្នុង១ឡ មានទម្ងន់១២០គីទ្បូក្រាម ដោយបានលាយជាមួយ ស្រាស អំបិល សណ្តែក CARAMEL (ទឹកស្ករ ការ៉ាមែល) ប៊ីចេង ទឹកត្រី ស្ករអំពៅ ទឹកដោះគោ និងប៊ឺ ។ ពេលលក់ចេញទៅទីផ្សារ ក្នុង១គីទ្បូក្រាមតម្លៃ ២០,០០០រៀលទៅ៣០,០០០រៀល។ ក្នុង១ ថ្ងៃលក់បានចាប់ពី៥០គីទ្បូក្រាម ទៅ៧០គីទ្បូក្រាម។
គណៈកម្មាធិការអន្តរក្រសួង របស់គណៈកម្មាធិការប្រយុទ្ធប្រឆាំងផលិតផលក្លែងក្លា បានរកឃើញផលិតផលអន់គុណភាព និងខុសច្បាប់ជាច្រើនមុខរួមមាន ៖
គ្រាប់សណ្តែកសៀង ចំនួន៦០បាវ, គ្រាប់កាហ្វេលេខ១ ចំនួន០៦បាវ, គ្រាប់កាហ្វេលេខ២ ចំនួន១០បាវ, កាហ្វេលីងរួចចំនួន០៦បាវ, ម៉ាស៊ីនលាយប៊ឺរ ចំនួន០១គ្រឿង, ម៉ាស៊ីនលាយស្ករ ចំនួន០១គ្រឿង, កាហ្វេច្រកជាកញ្ចប់រួចចំនួន៣០កញ្ចប់, ប៊ឺរចំនួន០៦ធុង, មេក្លិនសំរាប់លាយកាហ្វេចំនួន១២ធុង, ទឹកត្រីចំនួន០៣ប៊ីដុង, ស្រាសចំនួន ០១កាន, កាហ្វេផលិតរួចចំនួន ១៤កញ្ចប់ (កាហ្វេខ្មែរធម្មជាតិ) ។ ក្រោយពីការត្រួតពិនិត្យរួច សមត្ថកិច្ចចម្រុះអន្តរក្រសួងពិនិត្យឃើញថា ទីតាំងសិប្បកម្មលីងកាហ្វេ និងសណ្តែកនេះមានកំហុសជាច្រើន៖ មិនមានលើកស្លាកយីហោរ ពុំមានចុះបញ្ជីផលិតផល(ចបផ) គ្មានវិញ្ញាបនបត្រត្រួតពិនិត្យគុណភាព នៅលើសំបកវិចខ្ចប់កាហ្វេមិនមានដាក់អាស័យដ្ឋាន និងរបៀបប្រើប្រាស់ នៅលើសំបកវេចខ្ចប់កាហ្វេដាក់កាហ្វេសុទ្ធ១០០% ដែលនៅក្នុងការវេចខ្ចប់នោះលាយសារធាតុផ្សំជាច្រើន និងទីតាំងគ្មានអនាម័យជាដើម។
ចំពោះទីតាំងសិប្បកម្ម និងវត្ថុតាង ដែលសមត្ថកិច្ចសម្រុះ របស់គណៈកម្មាធិការប្រយុទ្ធប្រឆាំងផលិតផលក្លែងក្លារកឃើញគឺពុំមានច្បាប់អនុញ្ញាតពីស្ថាប័នជំនាញពាក់ព័ន្ធនឹងការលាយផ្សំគីមី គ្រាប់ធញ្ញជាតិ និងសារធាតុផ្សេងៗ ចូលគ្នានោះទេ ដូច្នេះព្រះរាជអាជ្ញាបានសម្រេចផ្អាកអាជីវកម្ម និងឃ្លុំបេបិទទីតាំងជាបណ្តោះអាសន្ន៕
