(ខេត្តកណ្តាល)៖ នៅព្រឹកថ្ងៃចន្ទ ៧កើត ខែស្រាពណ៍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២៧ ខែកក្កដា ឆ្នាំ២០២០ នេះ បន្ទាប់ពីទទួលបានការស្នើសុំកិច្ចសហការពីសាខាគយ និងរដ្ឋាករកម្ពុជា មន្ត្រីសាខា ក.ប.ប ខេត្តកណ្តាល បាននាំយករថយន្តមន្ទីរពិសោធន៍ចល័ត របស់អគ្គនាយកដ្ឋាន ក.ប.ប សហការគ្នាត្រួតពិនិត្យការនាំចូលបន្លែ ដែលមានសារធាតុគីមីពុលពីបរទេសចូលមកព្រះរាជាណាចក្រកម្ពុជា ដែលនាំចូលតាមមាត់ច្រកទ្វាអន្តរជាតិជ្រៃធំ ស្រុកកោះធំ ខេត្តកណ្តាល។ក្នុងសកម្មភាពចុះត្រួតពិនិត្យ មន្ត្រីជំនាញបានដកយកគំរូបន្លែ ២០ គំរូ រួមមាន៖ ពោតបារាំង ក្រូចឆ្មាតូច ត្រប់ស្រួយ ប៉េងប៉ោះ ត្រសក់ ម្ទេសហាវៃ ស្ពៃក្តោប ដំឡូងជ្វា ផ្លែល្ពៅ ស្ពៃបូកគោ ផ្លែស៊ូ ផ្លែម្ទេស ផ្កាស្នោរ ក្រូចឆ្មា ឆៃថាវ ត្រប់វែង ពពាយ ត្រាវ ផ្កាគូឆាយ និងផ្កាខាត់ណា ដើម្បីស្វែងរកសារធាតុគីមីហាមឃាត់ដែលធ្វើអោយប៉ះពាល់ដល់សុខភាពប្រជាពលរដ្ឋ ។
* ជាលទ្ធផលមន្ត្រីជំនាញ ពុំបានរកឃើញភាពមិនប្រក្រតីណាមួយនៅក្នុងគំរូបន្លែទាំងនោះឡើយ៕
