header ads

សង្គម

អាម៉ាប៉ាប៉ាញ៉ូស

លោក ម៉ូតេហ្គី តូស៊ីមីសឺ រដ្ឋមន្រ្តីការបរទេសជប៉ុនបានលើកឡើងថា ប្រទេស​កម្ពុជា​មាន​ធន​ធាន​មនុស្ស​ប្រៀប​ដូច​ជា​កំពូល​នៃប្រាសាទអង្គរវត្ត និងប្រាសាទអង្គរធំ ដែលត្រូវ​បាន​​ទ្រ​​ដោយ​ថ្ម​រឹង​មាំ​ដាក់​បន្តុប​លើ​គ្នា​ជា​ច្រើន​ដើម្បី​ឲ្យ​ខ្ពស់​។ ម៉្យាងវិញទៀត ដូច​គ្នា​នឹង​យុគ​សម័យអង្គរដែលបានរីកចម្រើនលូតលាស់ ដោយសារ​ការ​រួម​រស់​ជា​មួយ​គ្នា និង​ការ​លាយ​បញ្ចូលគ្នារវាងសាសនាហិណ្ឌូ និងព្រះពុទ្ធសាសនា ប្រទេសកម្ពុជាមានប្រវត្តិ និង​ប្រពៃ​ណី​ទទួល​យក​វប្បធម៌ គំនិតខុសៗគ្នា និងធនធានមនុស្សផ្សេងៗគ្នាផងដែរ។

លោកថា៖«ប្រទេសជប៉ុននឹងបន្តផ្តល់ការគាំទ្រដើម្បីឲ្យប្រទេសកម្ពុជា អាចដើរលើមាគ៌ា​សំ​ដៅទៅរកទិសដៅនៃការអភិវឌ្ឍតាមបែបប្រជាធិបតេយ្យរបស់ខ្លួន ដោយបញ្ចូល​កម្លាំង​យុវជនជាសសរទ្រូង។ ខ្ញុំ​ទន្ទឹង​រង់​ចាំ​នឹង​ជួប​ពិភាក្សា​យ៉ាង​ស្មោះអស់ពីចិត្តជាមួយ​សម្តេចអគ្គសេនាបតីតេជោ ហ៊ុន សែន នាយករដ្ឋមន្រ្តី និងឯកឧត្តម ប្រាក់ សុខុន ឧបនាយក​រដ្ឋមន្រ្តី និងជារដ្ឋមន្រ្តីក្រសួងការបរទេស ដើម្បី​បន្ត​ភាព​ជា​ដៃ​គូ​យុទ្ធ​សាស្ត្រ​របស់​ប្រទេស​យើង​ទាំង​ពីរ​កាន់ តែរីកចម្រើនថែមទៀត»។

សារបស់លោករដ្ឋមន្រ្តីការបរទេសជប៉ុននេះ ត្រូវផ្សព្វផ្សាយដោយស្ថានទូតជប៉ុន​នៅ​កម្ពុជានៅថ្ងៃទី២១សីហានេះ និងស្របពេលលោកមក​បំពេញ​ទស្សន​កិច្ច​នៅ​ព្រះ​រាជា​ណា​ចក្រ​កម្ពុជា ពីថ្ងៃទី២១ ដល់ថ្ងៃទី២៣ ខែសីហា ឆ្នាំ​២០​២០ ដើម្បីស្វែងរកការពង្រឹង​កិច្ច​សហ​ប្រតិ​បត្តិ​ការ​បន្ថែម​ទៀត​រវាង​ប្រទេសទាំងពីរ។

លោកបន្ថែមថា ប្រទេសទេសកម្ពុជាស្ថិតនៅទីកណ្តាល​នៃច្រករបៀង​សេដ្ឋ​កិច្ភាគ​ខាង​ត្បូង ដែលតភ្ជាប់​តំបន់​មេ​គង្គ និងពាក់កណ្តាលនៃចំនួនប្រជាជនជាយុវជនវ័យក្មេង​និង​ស្វា​ហាប់អាយុក្រោម២៥ឆ្នាំ ដែល​នេះ​ជា​សក្តា​នុ​ពល​ធ្វើ​ឲ្យ​ទំនាក់​ទំនងទ្វេភាគីមានភាព​កាន់​តែស៊ីជម្រៅថែមទៀត។

លោកក៏កើតសរសើរដល់ប្រទេសកម្ពុជាដែលកំពុងគ្រប់គ្រងបាននូវការឆ្លងរាលដាលជំងឺកូវីដ១៩ ដោយ​បញ្ជាក់​ថា​ប្រទេសជប៉ុនកំពុងចូលរួមចំណែកជួយដល់កម្ពុជា តាមរយៈ​ការផ្តល់សម្ភារៈពេទ្យ ដូច​ជាអាវ​ពេទ្យ​សម្រាប់​ការ​ពារ និងស្រោមដៃជាដើម ការផ្តល់​បរិក្ខារ​វេជ្ជសាស្រ្ត បញ្ជូនក្រុមវេជ្ជបណ្ឌិតជនជាតិជប៉ុនមួយចំនួន ដើម្បី​បំពេញ​ការ​ងារ​ការវះកាត់បន្ទាន់ និងព្យាបាលជម្ងឺជូនប្រជាជនកម្ពុជាផងដែរ។

លោកថា៖«ចំណាត់ការលើវិធានការកូវីដ១៩ទាំងនេះ ក៏បានធ្វើឲ្យទំនាក់ទំនងរវាង​ប្រទេស​ទាំងពីរ​​កាន់​តែ​មាន​ភាព​រឹង​មាំ​ផងដែរ។ ដើម្បីពង្រឹងទំនាក់ទំនងនេះបន្ថែមទៀត យើងនឹងបន្តកិច្ចពិភាក្សាជាមួយរាជរដ្ឋាភិបាល​កម្ពុជា​ដើម្បី​បើកឡើងវិញនូវ​ការ​ផ្លាស់​ប្តូររវាងប្រជាជន និងប្រជាជនក្នុងវិស័យធុរកិច្ចតាម​លក្ខណៈ​សម​ស្រប​នឹង​ការ​ការ​ពារ​ការឆ្លង​រាលដាលសារជាថ្មីនៃកូវីដ១៩។ ម៉្យាងវិញទៀត ខ្ញុំក៏មានបំណងជម្រុញ​នូវ​សាមគ្គី​​ភាព​ឆ្ពោះ​​ទៅ​រក​ការ​ស្តារសេដ្ឋកិច្ច និងការអភិវឌ្ឍក្រោយពេលដែលការរីក​រាល​ដាល​កូវីដ១៩នេះត្រូវបានបញ្ចប់ផងដែរ»។

@Amapapa.News
លោកអ្នកអាចបញ្ចេញមតិនៅទីនេះ!

Feature Ads

Previous Post Next Post