header ads

សង្គម

អាម៉ាប៉ាប៉ាញ៉ូស

មណ្ឌលគិរី ៖ ​វាលស្មៅ​លើ​កំពូលភ្នំ​ពណ៌​ខៀវស្រងាត់ ​និង​ដើម​ស្រល់​រាប់​លាន​ដើម ​ដែល​គ្របដណ្ដប់​លើ​ភ្នំ​តូចធំ​រាប់ពាន់​ភ្នំ ​ជា​ទេសភាពល្អ​ឯក​ដាច់​គេ​គ្មាន​ពីរ​ នៅ​កម្ពុជា ​កំពុង​ទាក់ទាញ​ចំណាប់អារម្មណ៍​ទេសចរ ​តែ​វា​ក៏​កំពុង​ស្ថិត​ក្នុង​ស្ថានភាព​នៃ​ការ​គំរាមកំហែង​ដោយ​បុគ្គល​ផងដែរ​ ​ដែល​កំពុង​ព្យាយាម​គ្រប់​មធ្យោបាយ ​ដើម្បី​យក​តំបន់​ទាំងនេះ​ជា​កម្មសិទ្ធិ​។

ខេត្តមណ្ឌលគិរី ដែនដី​ឦសាន នៃ​ប្រទេស​កម្ពុជា ប៉ុន្មាន​ឆ្នាំ​ចុងក្រោយ​នេះ បាន​ក្លាយ​ជា​គោលដៅ​ដំណើរ​កម្សាន្ត​ដ៏ ពេញ​និយម​របស់​ភ្ញៀវទេសចរ​ជាតិ​ស្ទើរតែ​ទូទាំងប្រទេស​។ ​យោងតាម​របាយ​ការណ៍​របស់​មន្ទីរ​ទេសចរណ៍​ខេត្ត ចំនួន​ទេស ចរ បាន​កើន​ឡើង​មិន​ឈប់ឈរ ​ធ្វើ​ឲ្យ​ខេត្តមណ្ឌលគិរី មានឈ្មោះ​ល្បី​ខ្លាំង​ឡើង ​ហើយ​កត្តា​ដែល​ធ្វើ​ឲ្យ​ខេត្ត​មួយ​នេះ​ល្បី ​ល្បាញ​យ៉ាង​ឆាប់រហ័ស​នោះ ​គឺ​ដោយ​សារតែ​អាកាសធាតុ​ត្រជាក់ និង​កត្តា​ចម្បង​មួយទៀត គឺ​ទិដ្ឋភាព​វាលស្មៅ​លើ​កំពូល ភ្នំ​ពណ៌​ខៀវស្រងាត់ និង​ដើម​ស្រល់​រាប់​លាន​ដើម ដែល​គ្របដណ្ដប់​លើ​ភ្នំ​តូចធំ​រាប់ពាន់​ភ្នំ ​ជា​ទេស​ភាពល្អ​ឯក​ដាច់​គេ​គ្មាន​ពីរ នៅ​កម្ពុជា​។

តំបន់​ដែល​មាន​ទេសភាព​វាល​ភ្នំ​លាតសន្ធឹង​ដាច់​កន្ទុយភ្នែក​អម​ជាមួយ​វាលស្មៅ ​និង​ដើម​ស្រល់ ដែល​កំពុង​ទាញ អ្នកទេសចរ​រាប់ម៉ឺន​នាក់​ ក្នុង​មួយឆ្នាំៗ គឺ​ស្ថិតនៅ​ចំណុច​ព្រំប្រទល់​ នៃ​ក្រុង​សែន​មនោ​រម្យ និង​ស្រុក​អូររាំង​។​ សេចក្ដី​រាយ ការណ៍​ជាច្រើន​ បានឱ្យដឹងថា​ ចំណុច​វាល​ភ្នំ​ស្មៅ​ទាំងនេះ រាប់ពាន់​ហិកតា ​កំពុង​ក្លាយជា​ទីតាំង​ក្ដៅ​គគុក​ពាក់ព័ន្ធ​នឹង​ជម្លោះ ដីធ្លី​។

មន្ត្រីរដ្ឋបាល​ព្រៃឈើ​ខេត្តមណ្ឌលគិរី ​បាន​លួច​បង្ហើប​ថា ផ្ទៃដី​ចម្ការ​ស្រល់​ជា​កម្មសិទ្ធិ​រដ្ឋ ​រាប់រយ​ហិកតា ត្រូវបាន គ្រប់គ្រង​ដោយ​ឯកជន​។ អាជ្ញាធរខេត្ត​មណ្ឌលគិរី កំពុងមាន​វិធានការ​ដកហូត​តំបន់​ទាំងនោះ​មកវិញ ប៉ុន្តែ​មិនដឹងថា​ធ្វើ បាន ឬ​អត់​ទេ ព្រោះ​ដី​ទាំងនោះ​សុទ្ធ​ជា​ដី​របស់​អ្នកធំ​មានអំណាច ហើយ​បើ​ដកហូត​តែ​ដី​ប្រជាពលរដ្ឋ​តូចតាច មិន​យក​ដី អ្នកធំ គឺ​អយុត្តិធម៌​ណាស់​។

ប្រភព​ពី​ជនជាតិដើម​ភាគតិច​ព្នង ​នៅ​ក្រុង​សែន​មនោ​រម្យ ​បាន​បញ្ជាក់ថា ​ពី​ដើមឡើយ តាំងពី​ដូនតា​ពួកគេ ភ្នំ​វាល ស្មៅ ឬ​ហៅថា​ភ្នំ​ត្រងោល ​លាតសន្ធឹង​លើ​ផ្ទៃដី​ឃុំ​ដាក់​ដាំ ​ឃុំ​សែន​មនោ​រម្យ ​ស្រុក​អូររាំង​ និង​ក្នុង​សង្កាត់​ស្ពាន​មានជ័យ ​សង្កាត់​រម្យ​នា ​ក្រុង​សែន​មនោ​រម្យ មិន​មាន​មនុស្ស​រស់នៅ​ទេ និង​មិន​មាន​ម្ចាស់​កម្ម​សិទ្ធ​ទៀតផង ​ព្រោះ​តំបន់ភ្នំ​ធ្វើ​ចម្ការ ​មិនកើត គ្មាន​ប្រភពទឹក​ ​មិនអាច​រស់នៅ​បាន ដោយ​ជនជាតិភាគតិច​រស់នៅ​តាមតែ​ជ្រលង​អូរ ​និង​តំបន់​ដែល​មាន​ប្រភព​ ទឹក​ប៉ុណ្ណោះ​។ ក្រោយពេល​ដី​វាល​ភ្នំ​ស្មៅ​ទាំងនោះ​ ធ្លាក់​ចូល​ជា​កម្ម​សិទ្ធ​បុគ្គល ​គេ​បាន​កែច្នៃ​ដី ​និង​សង់​សំណង់​ផ្សេងៗ ដែល​បាន​ធ្វើ​ឲ្យ​ទិដ្ឋភាព​ដែល​ដុះ​ឡើង​ពី​ធម្មជាតិ​ដ៏​កម្រ ​បាត់បង់​សោភ័ណភាព ខូច​ទ្រង់​ទ្រាយ​ដើម ដែល​គួរ​ឲ្យ​សោកស្ដាយ បំផុត​។ ​ប្រជុំភ្នំ​ដែល​គ្រប​ដោយ​ស្មៅ​ខៀវស្រងាត់​ គឺ​មានតែ​ប៉ុន្មាន​ម៉ឺន​ហិកតា​ប៉ុណ្ណោះ ​ក្នុងភូមិ​សាស្ត្រ​ក្រុង​សែន​មនោ​រម្យ និង​ស្រុក​អូររាំង ​ប្រសិនបើ​មិន​មាន​ការទប់ស្កាត់​ទេ និង​បាត់បង់​សក្ដានុពល ​ដ៏​ល្អ​ប្រណីត​មួយ​របស់​ប្រទេស​កម្ពុជា​ ហើយ​អ្នកទេសចរ​ក៏​អាច​នឹង​ថយ​ចុះ​តាម​នោះដែរ​៕

@Amapapa.News
លោកអ្នកអាចបញ្ចេញមតិនៅទីនេះ!

Feature Ads

Previous Post Next Post