(ព្រះវិហារ)៖ ជនសង្ស័យម្នាក់ដែលត្រូវជាប្ដី ត្រូវបានកម្លាំងនគរបាលស្រុកជាំក្សាន្ត ខេត្តព្រះវិហារ ចាប់ឃាត់ខ្លួនបញ្ជូនទៅតុលាការ នាល្ងាចថ្ងៃទី២៤ ខែកញ្ញា ឆ្នាំ២០២០ បន្ទាប់ពីរូបគេបានប្រើអំពើហិង្សាយ៉ាងឃោរឃៅទៅលើប្រពន្ធខ្លួនឯង បណ្តាលឲ្យស្ត្រីរងគ្រោះរងរបួសយ៉ាងដំណំលេីផ្ទៃមុខ និងស្ទេីរពេញខ្លួនប្រាណ។
ជនសង្ស័យជាប្តីដែលសមត្ថកិច្ចឃាត់ខ្លួននោះមានឈ្មោះ នាង សុជា អាយុ៤១ឆ្នាំ មុខរបរកសិករ។ ចំណែកជនរងគ្រោះជាប្រពន្ធមានឈ្មោះ តេង ម៉ៅ អាយុ៤០ឆ្នាំ រស់នៅភូមិអានសេះ ឃុំជាំក្សាន្ត ស្រុកជាំក្សាន្ត។
លោកវរសេនីយ៍ទោ ឱ សេង អធិការស្រុកជាំក្សាន្តបានបញ្ជាក់ទៀតថា ហេតុការណ៍ហិង្សានេះបានកេីតឡេីងនាថ្ងៃទី២៣ ខែកញ្ញា ឆ្នាំ២០២០ ដោយជនសង្ស័យជាប្តីបានទាត់ធាក់ ថែមទាំងវាយនឹងខ្សែភ្លើងយ៉ាងឃោរឃៅទៅលើប្រពន្ធ បណ្តាលឲ្យហើមពេញមុខមាត់ និងរលាត់ស្បែកបែកឈាមឆ្នូតៗ ឃេីញហេីយគួរឲ្យអាណិតអាសូរ។ លោកថា ក្រោមបញ្ជាពីលោកស្នងការឧត្តមសេនីយ៍ទោ សួស សុខដារ៉ា កម្លាំងនគរបាលរបស់លោកបានចុះទៅអន្តរាគមន៍ភ្លាមៗ រហូតឃាត់ខ្លួនជនដៃដល់ចាត់ការតាមច្បាប់។
លោកអធិការបានអះអាងថា ដេីមចមដែលបណ្ដាលឲ្យអំពេីហិង្សានេះកេីតឡេីង គឺដោយសារភ្លេីងប្រច័ណ្ឌដុតរោលពេញចិត្ត ខ្វះសតិគិតពិចារណាត្រឹមត្រូវ។
ក្រោយទទួលបានពាក្សបណ្តឹងពីស្ត្រីរងគ្រោះ កម្លាំងសមត្ថកិច្ចបានចុះទៅឃាត់ខ្លួនជនសង្ស័យជាប្តី និងបានរៀបចំកសាងសំណុំរឿងបញ្ជូនទៅស្នងការដ្ឋាននគរបាលខេត្តព្រះវិហារ ដើម្បីចាត់ការបន្តតាមនីតិវិធីច្បាប់៕
