សមាគមនិកាយចិនទៀជីវ បានចូលសម្តែងការគួរសម និងសំណេះសំណាល ទាក់ទងនឹងការងារសមាគម ព្រមទាំងសកម្មភាពនៃការសាងសង់សកលវិទ្យាល័យ ទួនហ្វាថ្មី ជាមួយថ្នាក់ដឹកនាំ ក្រុមហ៊ុន ប៉េង ហួត គ្រុប នាការិយាល័យកណ្តាលរបស់ក្រុមហ៊ុន កាលពីថ្ងៃទី១២ ខែកញ្ញា ឆ្នាំ២០២០ កន្លងទៅថ្មីៗនេះ។
ក្នុងជំនួបនេះផងដែរ ថ្នាក់ដឹកនាំ ក្រុមហ៊ុន ប៉េង ហួត គ្រុប បានឧបត្ថម្ភទឹកប្រាក់ចំនួន ២០ ម៉ឺនដុល្លារសហរដ្ឋអាមេរិកដល់សមាគមនិកាយចិនទៀជីវ ក្នុងការសាងសង់ អគារសកលវិទ្យាល័យទួនហ្វា។ តំណាងសមាគមនិកាយចិនទៀជីវ បានថ្លែងអំណរគុណយ៉ាងជ្រាលជ្រៅ ចំពោះថ្នាក់ដឹកនាំក្រុមហ៊ុន ប៉េង ហួត គ្រុប ដែលបានឧបត្ថម្ភសម្រាប់ការសាងសង់អគារសកលវិទ្យាល័យនេះ ដែលស្តែងអោយឃើញពីការគិតគូរ ចូលរួមចំណែកបណ្តុះបណ្តាលធនធានមនុស្ស ដែលវិស័យមួយជួយជំរុញដល់ការអភិវឌ្ឍប្រទេសឲ្យកាន់តែរីកចំរើននាពេលអនាគត។
តំណាងសមាគមនិកាយចិនទៀជីវ បានរៀបរាប់បន្ថែមផងដែរថា សកលវិទ្យាល័យទួនហ្វា សាសង់លើផ្ទៃដីជាង ១៣០០០ម៉ែត្រការ៉េ ដើម្បីបម្រើអោយសកម្មភាពសមាគមនិកាយចិនទៀជីវ និងការបណ្ដុះបណ្ដាលធនធានមនុស្សនៅក្នុងសាលាទួនហ្វា ហើយសាលានេះនឹងសាងសង់អគារ កំពស់៦ជាន់ (២អគារ) សាងសង់អគារសំរាប់សិស្សានុសិស្សក៏ដូចជាលោកគ្រូ ស្នាក់នៅ មានកំពស់ ៨ជាន់ផងដែរ។
សូមបញ្ជាក់ផងដែរថាកន្លងមក ក្រុមហ៊ុន ប៉េង ហួត គ្រុប បានចូលរួមយ៉ាងសកម្ម ជាមួយនឹងការងារសង្គមជាច្រើនដូចជា បរិចា្ចគថវិកា ទៅដល់កាកបាទក្រហមកម្ពុជា មន្ទីរពេទ្យគន្អបុប្ផា ជារៀងរាល់ឆ្នាំ សាងសង់ សាលារៀន មន្ទីរពេទ្យ ព្រះវិហារ ផ្លូវថ្នល់ ដែលនេះជាទស្សនវិស័យ របស់ថ្នាក់ដឹកនាំ ក្នុងការចិត្តទុកដាក់និងរួមចំណែកជាមួយរាជរដ្ឋាភិបាល ក្នុងការកាត់បន្ថយភាពក្រីក្រនិងអភិវឌ្ឍសង្គមជាតិ។
