header ads

សង្គម

អាម៉ាប៉ាប៉ាញ៉ូស

លោកស្រី ឱ វណ្ណឌីន មន្រ្តីនាំពាក្យក្រសួងសុខាភិបាលបានបញ្ជាក់នៅយប់ថ្ងៃទី៧តុលាថា ជន​ជាតិ​បារាំង​អាយុ២៧ឆ្នាំម្នាក់ មានអាយដ្ឋាននៅភូមិវត្តដំណាក់ សង្កាត់សាលាកំ​​​​​​​​​​​​​​​​​​រើក ក្រុង​សៀមរាប គឺ​បាន​ធ្វើ​ដំណើរ​ចេញក្រៅទៅកន្លែងមួយចំនួន ដូចជាទៅជួបមិត្តភក្តិ​ហូបអាហារជុំគ្នា និង​ទៅ​កន្លែង​ហែល​ទឹក​ជា​ដើម មុនបុរសនេះត្រូវបានធ្វើតេស្ដវិជ្ជមានជំងឺកូវីដ១៩នៅថ្ងៃទី៤តុលា ដែល​ជា​ថ្ងៃ​ទី​១៣​នៃ​ការ​ធ្វើ​ចត្តា​ឡី​ស័ក។

លោកស្រីថា៖«យើងបានខិតខំរកអ្នកប៉ះពាល់ជាមួយគាត់ទាំងផ្ទាល់និងប្រយោល មានចំនួន​​៣៦​នាក់ ប៉ុន្តែក្រោយមកទៀត យើងបានស្រាវជ្រាវឃើញមានព័ត៌មានបន្ថែមទៀត គឺគាត់​បាន​ទៅ​នេះ​ទៅ​នោះ ហើយយើងក៏ខិតខំធ្វើជាបន្តទៀត។ មកដល់ចុងក្រោយនេះ យើងរក​ឃើញ​ទាំង​អស់​៥៧​នាក់ ដែលជាអ្នកប៉ះពាល់ផ្ទាល់និងប្រយោល រួមមានអ្នកបម្រើការ មិត្តភក្ដិរបស់គាត់ អ្នក​ជួប​ប្រា​ស្រ័យ​ទាក់​ទង​ជាមួយគាត់ និងអ្នកពិសារអាហារជា​មួយ​​គាត់ ដោយសារគាត់​បាន​ធ្វើ​ដំណើរ​ទៅ​នេះ​ទៅ​នោះ ដូចជាកន្លែងហែលទឹកជាដើម»។

លោកស្រីបញ្ជាក់ថា ក្នុងចំណោមអ្នកប៉ះពាល់ទាំង៥៧នាក់នេះ គឺទទួលបាន​លទ្ធ​ផល​ធ្វើ​តេស្ដ​អវិជ្ជ​មាន​ទាំង​អស់ ខណៈអ្នកជិះយន្តហោះជាមួយជនជាតិបារាំងនេះ មានចំនួន​៩៧នាក់ទៀត ក៏​ត្រូវ​បាន​មន្រ្តី​សុខា​ភិ​បាល​រក​ឃើញ​ស្ទើរតែទាំងអស់ និងសុទ្ធធ្វើតេស្ដអវិជ្ជមាន។​​​​​​​​​​​​​​​​​​​​​​​​​​​​​​​​​

ជនជាតិបារាំងអាយុ២៧ឆ្នាំ គឺជាអ្នកដំណើរមកពីប្រទេសបារាំង ឆ្លងកាត់ប្រទេសសិង្ហបុរី និង​បាន​មក​ដល់​កម្ពុជា​កាលពីថ្ងៃទី២០កញ្ញា ហើយបន្ទាប់ពីធ្វើតេស្ដលើកទី១អវិជ្ជមាន បុរស​រូបនេះ បាន​ធ្វើ​ដំណើរ​តាមរថយន្តមួយគ្រឿងមានគ្នា៤នាក់ ចេញពីរាជធានីភ្នំពេញនៅថ្ងៃទី២២កញ្ញា ឆ្ពោះ​ទៅ​កាន់​ខេត្ត​សៀម​រាប និងបានទៅស្នាក់នៅក្នុងភូមិវត្តដំណាក់។

កាលពីថ្ងៃទី៧តុលាការ កាសែតខ្មែរថាមស៍បានចុះផ្សាយដែរថា នៅអំឡុងធ្វើចត្តាឡីស័ក​១៤​ថ្ងៃ ជន​ជាតិ​បារាំងនេះ បានចេញពីកន្លែងស្នាក់នៅទៅចូលរួមក្នុងកម្ម​វិធី​ជប់​លៀង​អាង​ហែល​ទឹក​ទ្រង់​ទ្រាយ​ធំ​មួយ​ក្នុងព្រឹត្តការណ៍​តន្ត្រី​មួយ​ដែល​ត្រូវបាន​ប្រារព្ធ​ធ្វើឡើង​នៅ​ឯ Navutu Dreams Resort​​​​​​​​​​​​​​​​​​​​​​​​​​​​​​​​​​​​​​​​​​​​​​​​។

ទោះជាយ៉ាងណាលោកស្រី ឱ វណ្ណឌីន បានលើកឡើងថា ការចុះផ្សាយ​របស់​កាសែត​ខ្មែរ​ថាមស៍​​នេះ គឺជាព័ត៌មានមួយដែលពិបាកទទួលយក ដោយសារលោកស្រីបញ្ជាក់ថា ក្រុមគ្រូពេទ្យ​ឆ្លើយ​តប​បន្ទាន់ បានខិតខំធ្វើការងារទាំងយប់ទាំងថ្ងៃ ដើម្បីស្រាវជ្រាវនិងស្វែង​រកអ្នកប៉ះពាល់​ទៅ​តាម​លទ្ធ​ភាព​ដែល​ធ្វើ​បាន ហើយមិនអាចរកឃើញ អ្នកប៉ះពាល់ជាមួយជន​ជាតិបារាំងនេះ​ទាំង​អស់​ត្រឹម​រយៈ​១​ទៅ​២​ម៉ោង​នោះទេ​​​​​​​​​​​​​​​​​​​​​​​​​​​​​​​​​​​​​​​​។

កាលពីពេលថ្មីៗនេះ នៅក្នុងខេត្តសៀមរាប ក៏មានបុរសជនជាតិហុងគ្រីម្នាក់ បានធ្វើដំណើរ​​ចេញ​ក្រៅ​ផ្ទះ​នៅ​អំឡុងពេលកំពុងធ្វើចត្តាឡីស័ក១៤ថ្ងៃ ដើម្បីទៅទិញផ្ទាំងគំនូរនៅ​គ្រឹះ​ស្ថានអង្គរដែរ ហើយ​ក្រោយមក បុរសនេះ ត្រូវបានធ្វើតេស្ដវិជ្ជមាននៅថ្ងៃទី១៣នៃការធ្វើចត្តាឡីស័ក។​​​​​​​​​​​​​​​​​​​​​​

ករណីទាំងនេះកើតឡើង ស្របពេលក្រសួងសុខាភិបាល បានណែនាំជាច្រើនលើកឱ្យអាជ្ញា​ធរ​តាម​រាជ​ធានី​ខេត្ត ដាក់ពង្រាយមន្រ្តីសមត្ថកិច្ចតាមឃ្លាំងមើលកន្លែងធ្វើចត្តាឡីស័កទាំង​អស់ ទាំងមណ្ឌល​ចត្តា​ឡី​ស័ក និងអ្នកធ្វើចត្តាឡីស័កនៅតាមសណ្ឋាគារនិងតាមផ្ទះ៕

@Amapapa.News
លោកអ្នកអាចបញ្ចេញមតិនៅទីនេះ!

Feature Ads

Previous Post Next Post