សង្គម
អាម៉ាប៉ាប៉ាញ៉ូសកម្មករប្រមូលសំរាមរបស់ក្រុមហ៊ុនស៊ីនទ្រី បានបន្តធ្វើកូដកម្មនៅព្រឹកថ្ងៃទី ០៥ ខែតុលានេះ បន្ទាប់ពីថៅកែក្រុមហ៊ុន មិនទាន់មានដំណោះស្រាយតាមការទាម ទាររបស់ពួកគាត់។
ស្រ្តីកម្មករម្នាក់ក្នុងចំណោមកម្មករជាង ២០០០នាក់ ដែលសុំមិនបញ្ចេញឈ្មោះ បានលើកឡើងថា ការធ្វើកូដកម្មទាមទារនេះ គឺដើម្បីយកប្រាក់មកជួយផ្គត់ផ្គង់ជីវភាព ដែលកំពុងខ្វះខាតតែប៉ុណ្ណោះ។ អ្នកស្រីបន្តថា កម្មករក្រុមហ៊ុនស៊ីនទ្រីទាំងអស់ សុទ្ធតែជាអ្នកក្រ គ្មានលទ្ធភាពក្នុងការរស់នៅបានស្រួល ដូចពលរដ្ឋដែលមានជីវភាពសមរម្យឡើយ។
នៅថ្ងៃទី៥តុលា សាលារាជធានីភ្នំពេញ បានប្រកាសជ្រើសរើសកម្មករជាច្រើននាក់ ដើម្បីបំពេញការងារជាអ្នកប្រមូលនិងដឹកជញ្ជូនសំរាមនៅក្នុងរាជធានីភ្នំពេញ។ ការប្រកាសនេះ ធ្វើឡើងបន្ទាប់ពីក្រុមកម្មករក្រុមហ៊ុនស៊ីនទ្រី មិនបានធ្វើតាមការព្រមានរបស់សាលារាជធានីភ្នំពេញកាលពីថ្ងៃទី៣តុលា ដែលដាក់កំហិតឱ្យពួកគាត់ចូលធ្វើការធម្មតាវិញយ៉ាងយូរបំផុតនៅថ្ងៃទី០៥តុលា។
តំណាងសហជីបប្រចាំក្រុមហ៊ុនស៊ីនទ្រីលោក កែវ សុខវ៉ាត មិនខ្វល់ខ្វាយចំពោះការប្រកាសរបស់រដ្ឋបាលរាជធានីភ្នំពេញដើម្បីជ្រើសរើសបុគ្គលិកអនាម័យថ្មីនោះទេ ព្រោះលោកថា វាជារឿងធម្មតា អាជ្ញាធរដែនដីមានតួនាទីដោះស្រាយលើបញ្ហាកកស្ទះសំរាមនេះ។
លោកបន្តទៀតថា កម្មករមិនមានការព្រួយបារម្ហពីការបាត់បង់ការងារឡើយ ហើយពួកគាត់នៅតែប្តេជ្ញាមិនចូលធ្វើការវិញទេ រហូតខាងក្រុមហ៊ុមមានដំណោះស្រាយ ពីព្រោះពួកគាត់គិតថាប្រាក់អតីតភាព គឺចាសំខាន់ជាង។
លោកថា៖«កម្មការនីខ្លះ ធ្វើការតាំងពីក្មេងរហូតដល់ចាស់ មានរយៈពេល២០ទៅ៣០ឆ្នាំហើយ ដូច្នេះហើយបានពួកគាត់បន្តតវ៉ាចង់បានប្រាក់អតីតភាពរបស់ពួកគាត់ ដើម្បីយកទៅប្រកបមុខរបរសមរម្យដោយមិនប្រើកម្លាំងធ្ងន់»៕
