សង្គម
អាម៉ាប៉ាប៉ាញ៉ូស
ម៉ាហ្គាវ៉ា( MAGAWA) ជាកណ្តុរហិតមីនរបស់អង្គការ អាប៉ូប៉ូ(APOPO) នឹងត្រូវចូលនិវត្តន៍នៅអាយុ៦ឆ្នាំ។
លោក Michael Heiman អ្នកគ្រប់គ្រងកម្មវិធីនៅក្នុងអង្គការអាប៉ូប៉ូប្រចាំកម្ពុជា បានប្រាប់សារព័ត៌មានខ្មែរណាស់តាមអ៊ីម៉ែលថា ជាទូទៅកណ្តុរហិតមីនទាំងអស់ ត្រូវចូលនិវត្តន៍នៅពេលពួកគេមានអាយុគ្រប់៦ឆ្នាំ ប៉ុន្តែក៏មានកណ្តុរមានអាយុ៦ឆ្នាំ២ទៅ៣ក្បាល នៅតែអាចបន្តការងារដែរ។
លោកបញ្ជាក់ថា កណ្ដុរម៉ាហ្គាវ៉ា នឹងចូលដល់អាយុ៦ឆ្នាំនៅខែវិច្ឆិកាខាងមុខនេះ ប៉ុន្តែវានៅតែមានកម្លាំងខ្លាំងក្លារ នឹងរំពឹងថានឹងអាចធ្វើការងាររហូតដល់ចប់ឆ្នាំ២០២០នេះ។ បន្ទាប់ពីចូលនិវត្តន៍ កណ្ដុរនេះ នឹងត្រូវផ្លាស់ប្តូរទៅនៅកន្លែងចូលនិវត្តន៍ ដែលវាអាចរស់នៅក្នុងកន្លែងធំទូលាយ និងមានកន្លែងលេងច្រើន។
សព្វថ្ងៃ អង្គការអាប៉ូប៉ូប្រចាំកម្ពុជា មានកណ្តុរហិតមីនសរុប៤៣ក្បាល រស់នៅក្នុងខេត្តចំនួន៣ រួមមានខេត្តសៀមរាប ខេត្តបាត់ដំបង និងខេត្តព្រះវិហារ។ អាប៉ូប៉ូ មានកម្មវិធីជាច្រើននៅជុំវិញពិភពលោក ហើយមានកណ្តុរកំពុងធ្វើការប្រមាណ២០០ក្បាល។
កណ្ដុរ ម៉ាហ្គាវ៉ា បានទទួលរង្វាន់មេដាយមាសដ៏មានកិត្យានុភាពមួយពីប្រទេសអង់គ្លេសកាលពីខែកញ្ញា សម្រាប់បេសកកម្មរុករកគ្រាប់មីននិងគ្រប់យុទ្ធភណ្ឌមិនទាន់ផ្ទុះ។ វាបានជួយដកយកគ្រាប់មីនចំនួន៣៩គ្រាប់ និងគ្រាប់យុទ្ធភណ្ឌមិនទាន់ផ្ទុះចំនួន២៨គ្រាប់នៅក្នុងខេត្តសៀមរាបនិងខេត្តព្រះវិហារ៕
