សង្គម
អាម៉ាប៉ាប៉ាញ៉ូសលោកបណ្ឌិត អ៊ី លីម៉ា សាកលវិទ្យាធិការរងនៃសាកលវិទ្យាលចេនឡាបានលើកឡើងថា ការទទួលទានដំណេកបានត្រឹមត្រូវ និងស្កប់ស្កល់ពិតជាបានជួយដល់សុខភាពខ្លាំងណាស់ ទាំងរាងកាយ និងខួរក្បាល។ ប៉ុន្តែប្រសិនបើគេងមិនបានគ្រប់គ្រាន់នោះទេ អ្នកច្បាស់ជាមានអារម្មណ៍ល្ហិតល្ហៃសឹងតែគ្រប់ពេល រហូតដល់ថ្នាក់ឈឺថែមទៀតផង។
ទោះបីជាអ្នកបានញាំគ្រប់គ្រាន់ ឬក៏ហាត់ប្រាណបានគ្រប់គ្រាន់ក៏ដោយ ពេលនោះប្រព័ន្ធភាពសាំនៃរាងកាយនឹងចុះខ្សោយបន្តិចម្តងៗ ហើយបណ្តាលឱ្យអ្នកឡើងទម្ងន់ ទឹកនោមផ្អែម ស្ទះសរសៃឈាមបេះដូង និងជំងឺផ្សេងៗជាច្រើនទៀត។
ក្នុងអត្ថបទនេះ លោកបង្ហាញមូលហេតុ និងលើកយកនូវវិធីសាស្រ្តមួយចំនួន ដើម្បីធ្វើអោយអ្នកអាចទទួលទានដំណេកបានស្កប់ស្កល់ និងគ្រប់ម៉ោង។
ថ្វីបើការគេងមិនលក់ម្ដងម្កាល និងក្នុងរយៈពេលមួយទៅពីរថ្ងៃអាចជារឿងធម្មតា ដែលមនុស្សគ្រប់គ្នាអាចជួបប្រទះក៏ដោយក្ដី ក៏ការគេងមិនលក់ញឹកញាប់ និងក្នុងរយៈពេលយូរ ទាមទារឱ្យមានការពិគ្រោះ និងវាយតម្លៃឱ្យបានដិតដល់ ដើម្បីព្យាបាលពីគ្រូពេទ្យជំនាញទៅតាមមូលហេតុដែលនាំឱ្យគេងមិនលក់ ។ ការប្រើប្រាស់ថ្នាំងងុយគេងដោយចិត្តឯង មិនមែនជាជម្រើសល្អទេ ព្រោះការប្រើវាយូរៗទៅអាចបណ្ដាលឱ្យប្រើលែងមានប្រសិទ្ធភាពនិងត្រូវការប្រើថ្នាំកាន់តែច្រើនទៅៗ ។
ក. មូលហេតុសំខាន់ៗដែលអាចនាំឱ្យយើងគេងមិនលក់
ការគេងមិនលក់អាចបណ្ដាលមកពីមូលហេតុច្រើនយ៉ាងដូចជា៖
១.១. មូលហេតុផ្លូវកាយ៖ ក្រពះមិនរំលាយអាហារ លើសឈាម អ្នកមានជំងឺសួត ការឈឺចាប់លើរាងកាយ ជំងឺបេះដូង ជំងឺហឺត រលាកក្រពះ ដំបៅក្រពះ អ្នកមានជំងឺទឹកនោមផែ្អម ឈឺសសៃប្រសាទ ឈឺសន្លាក់ ឈឺកញ្ចឹងក ឈឺស្មា ឈឺចងេ្កះ រលាកឆ្អឹងជាដើម ។ល។
១.២. មូលហេតុផ្លូវចិត្ត៖ មានអារម្មណ៍តានតឹង ព្រួយបារម្ភច្រើន មានអារម្មណ៍ជ្រួលច្របល់ ខឹងសម្បា មានអារម្មណ៍សោកសៅ មានបញ្ហានៅកនែ្លងធ្វើការ មានបញ្ហាខ្វះខាតលុយកាក់ ឬមនុស្សខ្លះចេះតែព្រួយចិត្ត ទោះជាពុំមានរឿងអ្វីធំដុំ។
១.៣. មូលហេតុទាក់ទងនឹងរបៀបរបបនៃការរស់នៅ៖ ផឹកកាហ្វេ ឬតែច្រើន ផឹកស្រានៅពេលយប់ ហូបអាហារច្រើនពេកមុនចូលគេង ជក់បារីច្រើន ធ្វើការខ្លាំងមុនចូលគេង មិនសូវបានហាត់ប្រាណ គេងថ្ងៃច្រើន គេងមិនទៀងពេលជាដើម ។
១.៤. មូលហេតុទាក់ទងនឹងបរិស្ថាន៖ កន្លែងគេងមានសំឡេងរំខាន បរិយាកាសអាប់អួ កន្លែងគេងមានពន្លឺខ្លាំងពេក រស់នៅគ្នាច្រើនជាដើម ។
ខ. ទម្លាប់១១យ៉ាងដែលអ្នកគួរអនុវត្តដើម្បីឱ្យគេងយប់លក់ស្កប់ស្កល់
#១ប្រកាន់ខ្ជាប់នូវទម្លាប់ចូលគេងនិងភ្ញាក់ឱ្យបានទៀងទាត់
យើងត្រូវរៀបចំទម្លាប់នៃការចូលគេងទៅតាមម៉ោងពេល ដែលបានកំណត់ឱ្យបានច្បាស់លាស់។ ម្យ៉ាងទៀតទាក់ទងនិងការក្រោកពីដំណេកវិញ យើងក៏ត្រូវកំណត់ពេលវេលាឱ្យបានត្រឹមត្រូវដែរ សូម្បីតែថ្ងៃសំរាកចុងសប្តាហ៍ ក៏យើងមិនត្រូវដេកនៅលើគ្រែយូរពេកដែរ។ កំណត់ពេលវេលាយ៉ាងណាក៏ដោយគឺយើងត្រូវធានាឱ្យបានថា យើងដេកលក់បានជាមធ្យម៧ម៉ោងក្នុង១យប់។
#២ហាត់ប្រាណនៅពេលថ្ងៃ
ក្រោយពេលបញ្ចេញចលនារាងកាយសកម្មនៅពេលថ្ងៃរួចមក ជាធម្មតាវានឹងធ្វើឱ្យយើងមានអារម្មណ៍ថាអស់កម្លាំងពេលយប់។ សកម្មភាពទាំងនេះ ធ្វើឱ្យអ្នកហត់នឿយ និងជួយឱ្យអ្នកឆាប់គេងលក់។ក្រៅពីធ្វើលំហាត់ប្រាណដើម្បីឱ្យគេងលក់ស្រួល យើងក៏គប្បីហាត់ប្រាណដើម្បីថែរាងឱ្យមានសុខភាពល្អផងដែរ។ ការសម្រាកគ្រប់គ្រាន់នៅពេលយប់ និងហាត់ប្រាណពេលថ្ងៃបានត្រឹមត្រូវ អាចជួយឱ្យយើងរស់នៅមានសុខភាពល្អ។
#៣រៀបចំកន្លែងគេងឱ្យមានផាសុខភាព
មិនត្រូវបរិភោគ ធ្វើការ មើលទូរទស្សន៍ និយាយទូរសព្ទនៅលើគ្រែនោះទេ។ ចូររក្សាបន្ទប់គេងឱ្យមានពន្លឺតិចៗ ស្ងប់ស្ងាត់ ខ្យល់ចេញចូលគ្រប់គ្រាន់ គួរតែប្រើខ្នើយ ភួយ និងកម្រាលពូកដែលសមស្របផងដែរ។ ការជ្រើសរើសប្រើខ្នើយឱ្យត្រូវ អាចជួយអ្នកឱ្យមានអារម្មណ៍កាន់តែស្រួលខ្លួននៅពេលដាក់ខ្លួនគេងកើយទៅស្រួលក ក្បាល ស្មា និងឆ្អឹងកងខ្នងរបស់អ្នក។
ប្រសិនបើយើងឡើងលើគ្រែគេង១៥ទៅ២០នាទីហើយនៅតែគេងមិនលក់នោះ ចូរក្រោកឡើងធ្វើការងារផ្សេងដូចជា អានកាសែត ស្តាប់ចំរៀង រហូតទាល់តែងងុយគេងបានយើងចូលគេងជាថ្មីម្តងទៀត។
#៤កាត់បន្ថយការងារចុងម៉ោង
មិនត្រូវធ្វើការងារណា ដែលនៅសេសសល់ក្នុងផ្ទះមុនពេលចូលគេង១ម៉ោងនោះទេ។ ផ្ទុយទៅវិញ យើងគួរតែធ្វើសកម្មភាពស្រាលៗដើម្បីឱ្យរាងកាយយើងហត់នឿយ និងជួយឱ្យអ្នកឆាប់គេងលក់។
#៥ងូតទឹកក្ដៅឧណ្ណៗ
ងូតទឹកក្ដៅឧណ្ណៗនៅពេលយប់ មិនត្រឹមតែជួយឱ្យរាង្គកាយធូរស្រាលប៉ុណ្ណោះទេ ថែមទាំងធ្វើឱ្យរាង្គកាយសម្របទៅនិងសីតុណ្ហភាពផងដែរ។ នៅពេលដែលអ្នកចេញពីបន្ទប់ងូតទឹកដែលក្ដៅឧណ្ណៗ ចូលក្នុងបន្ទប់គេងដែលត្រជាក់ សីតុណ្ហភាពក្នុងរាង្គកាយ ចង្វាក់បេះដូង និង ចង្វាក់ដង្ហើមធ្លាក់ចុះ ដែលជាសញ្ញាបង្ហាញថា ដល់ពេលគេងហើយ។
#៦មិនត្រូវទទួលទានកាហ្វេអ៊ីនឬតែច្រើននៅពេលល្ងាច
ប្រយោជន៍ល្អចំពោះសុខភាព ត្រូវបានគេកត់សម្គាល់ឃើញមានច្រើនចំពោះអ្នកចេះទទួលទានកាហ្វេ ក្នុងបរិមាណសមរម្យ។ ការទទួលទានកាហ្វេមុនពេលចូលគេងរំខានដល់ការសម្រាកនៃរាងកាយ ដែលមានពិបាកសម្របតាមពេលវេលានៃដំណេក និងអាចយ៉ាប់យ៉ឺនក្នុងការក្រោកពីដំណេកទៅវិញ។
#៧មិនត្រូវទទួលទានគ្រឿងស្រវឹងដែលមានជាតិអាល់កុលខ្ពស់ច្រើនពេលល្ងាច
ស្រាគឺជាសារជាតិពុលម៉្យាងដែលត្រូវបានផលិតចេញពីម្សៅមេ ហើយត្រូវបានគេប្រើប្រាស់យ៉ាងទូលំទូលាយ ព្រោះវាជាសារជាតិដែលមានឥទ្ធិពលដល់ចិត្តសាស្ត្រ និងធ្វើឱ្យមានការផ្លាស់ប្តូរផ្នែកអារម្មណ៍ដល់អ្នកប្រើប្រាស់ទៀតផង។
គេតែងមានការភ័ន្តច្រទ្បំថាសុរាជាសារជាតិដែលនាំឱ្យមានការភ្ញោចតែតាមពិតទៅសកម្មភាពទាំងនេះអាចកើតមាននៅពេលពួកគេពិសាវាក្នុងបរិមាណតិចប៉ុណ្ណោះ ដែលឥទ្ធិពលទាំងនោះមានដូចជា កាត់បន្ថយភាពតានតឹង ធ្វើឱ្យអារម្មណ៍ស្រាកស្រាន្ត និងសប្បាយរីករាយ។ ផ្ទុយមកវិញ សុរាគឺជាសារជាតិមួយនាំឱ្យមានការចុះខ្សោយដល់ប្រព័ន្ធប្រសាទកណ្តាល ដែលឥទ្ធិពលទាំងនោះស្ទើរតែទាំងអស់ប៉ះពាល់ទៅលើកោសិកា និងប្រព័ន្ធប្រសាទទាំងមូល នៅពេលដែលគេបង្កើនកំហាប់សុរាទៅក្នុងសរីរាង្គ។
ហូបស្រានៅពេលយប់ធ្វើឱ្យយើងគេងលក់ស្រួល ប៉ុន្តែពេលអស់ជាតិអាល់កុល វានឹងធ្វើឱ្យយើងភ្ញាក់ពាក់កណ្តាលយប់។
#៨ទទួលទានអាហារពេលល្ងាចឱ្យបានត្រឹមត្រូវ
អ្វីដែលអ្នកត្រូវធ្វើឱ្យប្រាកដ គឺទទួលទានប្រភេទអាហារក្នុងបរិមាណត្រឹមត្រូវ ពិសេសនៅពេលទទួលទានអាហារពេលល្ងាច។ សូមចៀសវាងការទទួលទានអាហារច្រើនពេក ហិរពេក ឬអាហារដែលមានជាតិជូរខ្លាំងពេក ព្រោះវាអាចបណ្ដាលឱ្យរលាកបេះដូង និងពិបាកកិនរំលាយនៅពេលអ្នកជិតចូលដំណេក។ អ្នកក៏គួរតែកាត់បន្ថយរបបអាហារផ្ទុកជាតិស្ករ និងស្ករសុទ្ធដូចជានំប៉័ង បាយ និង មី គុយទាវ ជាដើម ព្រោះវាអាចបណ្ដាលឱ្យស្មារតីយើងស្វាង មិនងងុយគេង។
#៩គិតអ្វីសរសេរដាក់លើក្រដាស
ការគិតច្រើនជ្រុល គឺជាកត្តាបង្កើតនូវបញ្ហាជាច្រើនដល់មនុស្ស ទោះបីជាមិនមានបញ្ហាអ្វីផងក៏ដោយ។ មិនទាន់ហួសពេលឡើយ ប្រសិនបើអ្នកចង់គ្រប់គ្រង ឫកាត់បន្ថយការគិតច្រើនហួសប្រមាណនៅពេលចូលគេងនោះ គឺយើងក្រោកចេញពីគ្រែរួចសរសេរលើក្រដាសនូវអ្វីដែលយើងកំពុងគិត វាគឺជាវិធីសាស្រ្តមួយដែលអាចកាត់បន្ថយនៃការគិតក្នុងខួរក្បាលរបស់យើងបានយ៉ាងមានប្រសិទ្ធិភាព។
#១០កុំគេងពេលថ្ងៃច្រើនពេក
ប្រសិនជាយើងគេងមិនគ្រប់គ្រង ឬមានអារម្មណ៍ហត់ចង់សម្រាក គេងថ្ងៃជាវិធីមួយអាចជួយយើង បាន។ ប៉ុន្តែការគេងថ្ងៃខុសពេល ឬគេងយូរពេកអាចផ្តល់ផលប៉ះពាល់ច្រើន។ ដូចនេះយើងគួរដឹងថាគេថ្ងៃយ៉ាងម៉េចដើម្បីផ្តល់ប្រយោជន៍ដល់រាងកាយ។ដើម្បីឱ្យយើងកេងលក់ស្កប់ស្កល់នៅពេលយប់នោះ យើងគួរតែគេងពេលថ្ងៃយ៉ាច្រើនត្រឹមតែ៣០នាទីបានហើយ។
#១១ការគិតបែបវិជ្ជមានចំពោះមនុស្សនៅជុំវិញខ្លួនយើងនិងស្តាប់ភ្លេងដែលមានចង្វាក់ភ្លេងស្រាលៗ
បុគ្គលដែលទទួលបានភាពជោគជ័យក្នុងជីវិត រមែងតែងតែមានការគិតបែបវិជ្ជមានគ្រប់ៗរូប ឯអ្នកដែលបរាជ័យ ព្រោះតែគំនិតអវិជ្ជមានស្ថិតនៅក្នុងខ្លួនរបស់ពួកគេ។សរុបមកវិញ អានុភាពនៃគំនិតវិជ្ជមាន នឹងជួយជម្រុញឱ្យលោកអ្នកទទួលបាននូវភាពជោគជ័យយ៉ាងធំធេងក្នុងជីវិត។ មនុស្សដែលមានគំនិតវិជ្ជមានរមែងទទួលបាននូវសម្បត្តិមហាសាលទាំងបួនយ៉ាងដូចជា៖ ផ្លូវចិត្តជ្រះថ្លា ទំនាក់ទំនងដ៏ប្រសើរ រាងកាយមាំមួន និងប្រាជ្ញាឈ្លាសវៃ។
ដោយឡែភ្លេងគឺជាបញ្ហាមួយដ៏អស្ចារ្យ ដែលមានផលប្រយោជន៏ជាច្រើន ដូច្នេះយើងគួរជ្រើសរើសយកភ្លេងណាដែលមានចង្វាក់យឺតល្មម ប្រហែល៦០ទៅ៨០ក្នុង១នាទីនោះវានឹងជួយធ្វើឱ្យយើងអាចគេងលក់យ៉ាងស្កប់ស្កល់៕