CAMSOC-ភ្នំពេញ៖ កីឡាការិនីជឺជីតស៊ូជម្រើសជាតិកម្ពុជា Jessa Khan និងឪពុក ព្រមទាំងលោកយាយរបស់នាង បានមកដល់ប្រទេសកម្ពុជាហើយ នាព្រឹកថ្ងៃទី០៥ ខែឧសភា ដើម្បីចូលរួមជាមួយក្រុមកីឡាជម្រើសជាតិកម្ពុជា ទៅប្រកួតកីឡាស៊ីហ្គេម លើកទី៣១ ឆ្នាំ២០២២ នៅប្រទេសវៀតណាម។
Jessa Khan បានលើកឡើងក្នុងកិច្ចសម្ភាសន៍ដូច្នេះថា ៖«ខ្ញុំពិតជារីករាយដែលបានមកដល់ទីនេះ ហើយខ្ញុំអរគុណអ្នកគ្រប់គ្នាដែលបានគាំទ្រ។ វាមានរយៈពេល ៣ឆ្នាំហើយដែលខ្ញុំមកទីនេះលើកចុងក្រោយ ហើយខ្ញុំពិតជារីករាយក្នុងការវិលត្រលប់មកវិញ និងបានឃើញអ្នករាល់គ្នា»។
«ខ្ញុំតែងតែរួចរាល់សម្រាប់ប្រកួត។ វាគឺជាលើកទី៣ ដែលប្រកួតតំណាងកម្ពុជា ហើយជាលើកទី២ នៅស៊ីហ្គេម ដូច្នេះខ្ញុំពិតជារីករាយ។ ជាពិសេសឪពុករបស់ខ្ញុំដែលតែងតែនៅជាមួយខ្ញុំ និងបង្ហាត់ខ្ញុំ។ ពិតណាស់ ការប្រកួតចុងក្រោយរបស់ខ្ញុំគឺជើងឯក Pan Jiu-Jitsu នៅសហរដ្ឋអាមេរិកវាគឺជាពានរង្វាន់ដែលធំ ជឺជីតស៊ូ វាដូចជាក្នុងប្រភេទកីឡាអាស៊ី និងប្រភេទកីឡាអាស៊ីអាគ្នេយ៍ ហើយខ្ញុំឈ្នះព្រឹត្តិការណ៍ដ៏ធំកម្រិតពិភពលោកជាមួយខ្សែក្រវាត់ខ្មៅជាលើកដំបូង ប៉ុន្តែពេលនេះខ្ញុំរួចរាល់សម្រាប់ស៊ីហ្គេម»។ កីឡាការិនីវ័យ ២០ឆ្នាំរូបនេះបានបន្ថែម។
និយាយពីការរីកចម្រើននូវសមត្ថភាពបើប្រៀបធៀបទៅនឹងឆ្នាំមុនៗ Jessa បានឲ្យដឹងទៀតថា ៖«ខ្ញុំគិតថាជារៀងរាល់ឆ្នាំ គ្រប់គ្នាតែងតែមានការព្យាយាមដើម្បីបង្កើនសមត្ថភាព ហើយឆ្នាំនេះគឺជាឆ្នាំដ៏អស្ចារ្យ ហើយខ្ញុំគិតថា ពីឆ្នាំ២០១៩ ខ្ញុំពិតជាមានការប្រែប្រួលជាងនៅពេលនេះ ហើយពេលនេះខ្ញុំកាន់ខ្សែក្រវាត់ខ្មៅ ដូច្នេះខ្ញុំទទួលបានបទពិសោធជាច្រើន អ៊ីចឹងខ្ញុំកាន់តែត្រៀមខ្លួនបានល្អជាងមុន ហើយខ្ញុំពិតជារំភើបខ្លាំង»។
ដោយឡែក លោក Peter Khan ដែលជាឪពុក និងក៏ជាគ្រូបង្វឹករបស់កីឡាការិនី Jessa Khan ក៏បានបង្ហាញចំណាប់អារម្មណ៍ផងដែរថា ៖«ខ្ញុំពិតជារំភើប សម្រាប់ព្រឹត្តិការណ៍ស៊ីហ្គេមនេះ ដោយកូនស្រីរបស់ខ្ញុំតំណាងឲ្យកម្ពុជា ហើយសម្រាប់ខ្ញុំដែលមិនធ្លាប់ធ្វើបានល្អក្នុងនាមជាកីឡាករ ប៉ុន្តែពេលនេះកូនស្រីរបស់ខ្ញុំអាចក្លាយជាកីឡាការិនីតំណាងកម្ពុជា ច្រើនជាង២ដង ប៉ុន្តែ ៣ដងមកហើយ។ ខ្ញុំពិតជាមានកិត្តិយសដែលនាងបានធ្វើឲ្យគ្រួសារ ក៏ដូចជាកម្ពុជា មានមោទកភាព ហើយយើងកំពុងទន្ទឹងរង់ចាំជាមួយលទ្ធផលល្អប្រសើរ ដើម្បីឈ្នះមេដាយមាស»។
សូមបញ្ជាក់ថា ប្រភេទកីឡាជឺជីតស៊ូ ក្នុងស៊ីហ្គេម លើកទី៣១ នៅប្រទេសវៀតណាម នឹងប្រកួតនៅថ្ងៃទី១៤-១៥ ខែឧសភា ឆ្នាំ២០២២។
កីឡាការិនីខ្មែរ-អាមេរិករូបនេះ បានបង្កើតប្រវត្តិសាស្ត្រឲ្យកម្ពុជា ក្នុងការឈ្នះមេដាយមាសពីព្រឹត្តិការណ៍កីឡាទ្វីបអាស៊ី ឆ្នាំ២០១៨ នៅប្រទេសឥណ្ឌូណេស៊ី និងបានឈ្នះមេដាយមាសពីកីឡាស៊ីហ្គេម ឆ្នាំ២០១៩ នៅប្រទេសហ្វីលីពីន៕
ប្រភព៖ cambodia2023