![](https://blogger.googleusercontent.com/img/b/R29vZ2xl/AVvXsEhanC_TU_x85HESPXWfY_iFVU-kP8A-bpZaDIcugwRIyJ3pga6dcXRW6MQYD5GKUHek0VfqBwVYGIlr1C35K-JpJ8g02Z2JHdLRVL0LRL4Q7xcJZiQ78WGH7pAHu3YDy5LKPcQEZeedmKiHKqPhzbyDawTYpQu-JdeN6Xb8B9EXUC8rSaMLppInF0d7/s1600/Thumbnail.jpg)
សិល្បៈ
ភ្នំពេញ៖ និស្សិតឆ្នើមរបស់កម្ពុជាមួយរូប កញ្ញា អន ម៉ូនីតា កំពុងទទួលបានការកោតស្ងប់ស្ងែង ជាមួយនឹងសមត្ថភាពលេចធ្លោក្នុងវិស័យសិក្សា ដោយមកដល់ពេលនេះកញ្ញាទទួលបានសញ្ញាបត្រនិទ្ទេស A ព្រមទាំងទទួលបានមេដាយ និងពានរង្វាន់ពីការប្រកួតប្រជែងមិនតិចជាង៧០ច្បាប់នោះឡើយ ហើយកញ្ញាក៏មានស្នាដៃឆ្នើមក្នុងវិស័យកីឡា និងកិច្ចការសង្គមធម៌ជាច្រើនផងដែរ។
មោទនភាពនេះគឺជាការចូលរួមលើកកម្ពស់កិត្យានុភាពជាតិកម្ពុជា តាមរយៈការខិតខំអភិវឌ្ឍសមត្ថភាពឱ្យលេចធ្លោឡើងក្នុងចំណោមនិស្សិតអន្តរជាតិ ព្រមទាំងមជ្ឈដ្ឋានអន្តរជាតិខ្លះដែលបានដឹងបានឮពីសមត្ថភាពឆ្នើមរបស់កញ្ញា អន ម៉ូនីតា ដែលតែងនិយាយប្រាប់គេថាជនជាតិខ្មែរពេញៗមាត់។
![](https://blogger.googleusercontent.com/img/b/R29vZ2xl/AVvXsEge5IaNDxRj70zqvIGoeAdTDpxhndt7kHWpRXnzKMKDvNL0zh4aQQjO5W34sFvI-LnO7qc2qu1d-YKJPmXGjvOnNp1sElOhqMb_MiysgaV0YoAftgSNlexmZOlsjnrBXiCny4cKBsLmEOAT7e7hXEHsB2s5o0XzOG5NqWfiukoy8wOT-RrAR-l_v3hB/s1600/99%20%281%29.jpg)
បច្ចុប្បន្ន កញ្ញាកំពុងតែសិក្សានៅសាកលវិទ្យាល័យ គ្រប់គ្រងអាជីវកម្ម និងសណ្ឋាគារ (Business & Hotel Management) ជំនាញ Specialist Hospitality Management ដែលស្ថិតនៅទីក្រុង Luzern ប្រទេសស្វីស ជាប្រទេសដែលមានថ្លៃសិក្សាថ្លៃជាងគេ និងមានសន្តិភាពជាងគេនៅលើពិភពលោក។
និស្សិតខ្មែរដ៏ឆ្នើមរូបនេះបានបន្តថា ទាំងការសិក្សាក្នុងប្រទេសនិងក្រៅប្រទេស កញ្ញាតែងទទួលបានចំណាត់ថ្នាក់លេខ១ប្រចាំសាលា ពោលគឺបាននិទ្ទេស A គ្រប់មុខវិជ្ជា។ ម្យ៉ាងវិញទៀត កញ្ញាក៏តែងតែចូលរួមប្រកួតប្រជែងនិងទទួលបានមេដាយ និងពានរង្វាន់ផ្នែកភាសាអង់គ្លេស គណិតវិទ្យា អក្សរសាស្រ្ត ព្រមទាំងទទួលបានសញ្ញបត្រលេខ១ខាងចរិយាសម្បត្តិល្អប្រសើរថែមទៀតផង។
កញ្ញា អន ម៉ូនីតា បានបញ្ជាក់ថា «មកដល់បច្ចុប្បន្ន កញ្ញាទទួលបានសញ្ញាបត្រឆ្នើម និងទទួលបានមេដាយនិងពានរង្វាន់សរុបជាង៧០ច្បាប់ហើយ»។
![](https://blogger.googleusercontent.com/img/b/R29vZ2xl/AVvXsEj1jBWrkMcA34IDs_beKZJhyn3VmKgSsX2vfuTv3orzIkwcfVhTkuN-O7Cdk9Iq_OB26NgaVvNNqoV7CYJQvZapWB8oV_FqsZpv4Q2yIj9hMbJBHODZQGPbwOcj0wPeeVk-q3XPpfG8fToeP9zjr1eyrqs3oX5YNkecDa2_O4OqAMHAqJrlmOEMmlzu/s1600/99%20%282%29.jpg)
គួរជម្រាបថា មិនត្រឹមតែពូកែឈ្លាសវៃក្នុងវិស័យសិក្សាប៉ុណ្ណោះទេ យុវតី អន ម៉ូនីតា ក៏មានរូបសម្បត្តិស្រស់សោភា ចរិយារមទម សមជានារីខ្មែរ ហើយថែមទាំងមានគុណធម៌ សីលធម៌ សុជីវធម៌ល្អសមរម្យផងដែរ។ គិតត្រឹមឆ្នាំនេះ ម៉ូនីតាមានអាយុ២១ឆ្នាំហើយ ដែលនេះមិនងាយនឹងពើបប្រទះឡើយចំពោះនារីដែលនៅវ័យក្មេង ទាំងល្អ ទាំងពូកែ គួរជាទីមោទនៈសម្រាប់ប្រជាជាតិខ្មែរយើង។
ក្រៅពីភាពលេចធ្លោក្នុងវិស័យសិក្សា យុវតីឆ្នើមរបស់កម្ពុជារូបនេះក៏ប្រសប់នឹងវិស័យកីឡាផងដែរ។ ម៉ូនីតាជាជើងឯករត់ម៉ារ៉ាតុង (Marathon) ដែលប្រកួតប្រជែងជាមួយសាលាល្បីៗ ដូចជា ISPP, Logos, Northbridge, CIA ដោយទទួលបានជ័យលាភីលេខ១, ផ្នែកកីឡាការ៉ាតេ ម៉ូនីតាទទួលបានចំណាត់ថ្នាក់លេខ៣ និងទទួលបានមេដាយពីការប្រកួតកីឡាជាច្រើនទៀត ជាពិសេសបាញ់កាំភ្លើង ជិះសេះ ហែលទឹក ជ្រមុជទឹក វាយកូនបាល់លើតុ និងការប្រណាំងទូកជាដើម។
![](https://blogger.googleusercontent.com/img/b/R29vZ2xl/AVvXsEgKZiK4s1kA5hdKD-J6_FHYwsdFYTQwMMwKsLzcyEKWaKPUk4c4w3Qwi630BTE2wMrBXi8sMdE8p50m-O0bIPXm3EJK2vzMaWc7zKFJRN0GmtoDUMNRX5U_rXIn6jx6BtG_lTB6Gqtk43iSRQ9fUsNB6s-eQTxTWPrPKUeJNKhr_xfmuqCBHDQOekqq/s1600/99%20%283%29.jpg)
ទោះបីមមាញឹកនឹងការសិក្សានិងកីឡាយ៉ាងនេះក្ដី កញ្ញា អន ម៉ូនីតា ក៏តែងតែចុះធ្វើសកម្មភាពសង្គមធម៌យ៉ាងផុសផុលផងដែរ។ ដោយសារតែហេតុនេះហើយទើបកញ្ញា អន ម៉ូនីតា បានក្លាយជាយុវជនគំរូនិងទទួលបានពានរង្វាន់អ្នកបង្កើតសន្តិភាពកាលពីឆ្នាំ២០២០ (Peace award Maker 2020) ដែលជាពានរង្វាន់សន្តិភាពសម្រាប់ប្រយោជន៍អ្នកដទៃប្រកបដោយចីរភាពដល់ពិភពលោក។
កញ្ញា ម៉ូនីតា បានបន្ថែមថា មិនថារវល់យ៉ាងណា កញ្ញាតែងតែខិតខំអស់ពីកម្លាំងចិត្តជួយដល់កុមារក្រីក្រឱ្យទទួលបានចំណេះដឹង ជួយផ្ដល់ការអប់រំស្មារតីដល់អ្នកដទៃឱ្យដើរលើវិថីត្រឹមត្រូវប្រកបដោយគុណធម៌។ តាមរយៈកិច្ចការទាំងនេះហើយ កញ្ញា ម៉ូនីតា ក៏បានបង្កើតពាក្យស្លោកផ្ទាល់ខ្លួនមួយដែរថា «ប្រទេសជាតិមួយរីកចម្រើនបាន ចាំបាច់ត្រូវការមានធនធានមនុស្ស ប្រៀបដូចជាមនុស្សយើងអាចរស់នៅបាន ចាំបាច់ត្រូវការបច្ច័យ៤ គឺអាហារ ថ្នាំសង្កូវ ជម្រក និងសម្លៀកបំពាក់» ហើយតែងផ្សព្វផ្សាយពាក្យស្លោកនេះទៅកាន់មនុស្សម្នាជាច្រើន៕
![](https://blogger.googleusercontent.com/img/b/R29vZ2xl/AVvXsEiLhZRcIpyYvhOSWsbUHbDgGAZqIkzI8G8QJC91z9m8FET367N_GAEutOv4yQps6Tl0VxCizCyn7t2gJC74GSBOOkAMuqb1omgfLr5vqRSE3dz509s9l3v5orP-tTp4eVE6tZCiWs_zlrWF-DMJuxCRCn561odtQr5OYUo9I2w6EoZHTEfatB55JwN2/s1600/99%20%284%29.jpg)
![](https://blogger.googleusercontent.com/img/b/R29vZ2xl/AVvXsEgZBUxyKHKQ3HA7VtbIea-vLkE4Y_1KfKX0w7tTBgNWs3Yl_KAI4RKMpUQ7nlUNI3R9pvm7dPEFahFfyNEwp9F7WlDHSoqC-lOsXrbhGSBWkmN3LZdvjwDkzlu_D5iixgH6a43KVLyAlmzRE1o5teYkvv0TfECM7pyLkCxKbNQCJmsDuLL30SUhmchn/s1600/99%20%285%29.jpg)
![](https://blogger.googleusercontent.com/img/b/R29vZ2xl/AVvXsEhpj2Dmvl2lVDOHxCwhY70IIdBuVBWLrF0tqzFgW90UCovVWzBJ553NOmTvreaXHSaES6EQXmnImcilCcAbPw6NB5MnQrwRN2r7ztmy62T80hG6R7A1XrpigjTKNXF05XmEEqawU39_VL6PxSpI0aSAXuUGLGMqyKONnoP1-Vp6tNPH7QV-DKvCCRMX/s1600/99%20%286%29.jpg)
![](https://blogger.googleusercontent.com/img/b/R29vZ2xl/AVvXsEgVjN2dBEQGjXz7cbBkokXA_-uFsPRLIRPt5Krj1HY6961ELt5Z2dv0NrBYZwZM9L93Hoq-olAg_T_ObmkV50Qi6GDiLdtLdMlbJv8X3N3AB527BOVBvzHtHfauACx8eg8a8hPUiZNROnb2kpw9s26ez-Pu4U_hg8-gvELAsj92fYAVORoHcVIpuviY/s1600/99%20%287%29.jpg)
ប្រភព Fresh News