សង្គម
ក្រោយស្ពាយងារជាអ្នកមេម៉ាយជាង៦ ឆ្នាំតារាចម្រៀង ពេជ្រ សោភា បានសម្រេចភ្ជាប់ពាក្យ ទៅតាមប្រពៃណីខ្មែរជាមួយតារាសម្តែងលោក ឆឹម សក្កដា ក្រោយពីជានាគ្នាវិញ ។អ្វីដែល ចាប់អារម្មណ៍ទោះរៀបចំពិធីទៅតាមប្រពៃណីខ្មែរក៏ពិតមែន តែ ពេជ្រ សោភា និងលោក ឆឹម សក្កដា នៅមិនទាន់ប្រកាសពីពេលវេលានៅក្នុងការរៀបមង្គលការឡើ់យ។ សូម្បីតែពិធីមង្គល ស្លាដកកន្សែងរបស់នាងនិងលោក ឆឹម សក្កដា ក៏មិនមានអញ្ជើញមិត្តភក្តិសិល្បៈចូលរួមដែរ ។
ហាក់ខុសពីមិត្តរួមអាជីពដ្បិតរៀបចំពិធីទៅមង្គល ស្លាដកកន្សែងទៅតាមប្រពៃណីកាលពីថ្ងៃទី១១ ម្សិលមិញក៏ពិតមែន តែតារាចម្រៀង ពេជ្រ សោភា មិនបានអញ្ជើញមិត្តភក្តិនៅក្នុងសិល្បៈ ចូលរួមឡើយសូម្បីតែមិត្តជិតដិតរួមទ្រនំក៏មិនមានវត្តមាននៅក្នុងថ្ងៃពិសេសរបស់នាងដែរ ។
មួយវិញទៀតសូម្បីតែទីតាំងនៅក្នុងពិធីរបស់ ពេជ្រ សោភា និងលោក ឆឹម សក្កដា មិនមាន ការបង្ហាញឱ្យដឹង ខណៈផ្ទះរបស់នាងស្ងាត់ឈឹងកាលពីម្សិលមិញ។តែយ៉ាងណា ប្រភពខ្លះ ថាតារាចម្រៀង ពេជ្រ សោភា រៀបចំពិធីនៅខុនដូរបស់នាង តែមិនមានការទម្លាយថាខុនដូ នោះមានទីតាំងនៅទីណាឡើយ ។
អ្វីដែលចាប់អារម្មណ៍ទោះមិនបានចូលរួមនៅក្នុងកម្មវិធីពិសេសរបស់ ពេជ្រ សោភា និងលោក ឆឹម សក្កដា ក្តី តែមិត្តរួមអាជីពក៏ដូចជាអ្នកគាំទ្របានបង្ហាញការរីករាយនិងស៊ែររូបភាពរបស់ នាងនិងគូដណ្តឹងអមជាមួយនឹងពាក្យពេចន៍ជូនពរយ៉ាងច្រើនដល់នាងនិងលោក ឆឹម សក្កដា ។ ទាំងលោក ឆឹម សក្កដា និង ពេជ្រ សោភា សុទ្ធតែនិយាយថាកម្មវិធីនេះជាការថត MV មិត្ត ១០០ឆ្នាំវគ្គ២ មិត្តភាពយូរអង្វែង ។
លើសពីនេះ ពេជ្រ សោភា បានបន្ថែមទៀតថា«មិនបាច់ប្រាប់អ្នកណាថាយើងស្រលាញ់គ្នាប៉ុណ្ណា មិនបាច់ផ្គាប់ចិត្តអ្នកណាថាយើងស្គាល់គ្នាប៉ុណា្ណ មិនបាច់និយាយច្រើន សំខាន់អ្នកក្នុងផ្ទះដឹងច្រើន អរគុណដែលគោរពពាក្យសន្យា 11.11.2016 Pu Da: មីងអាចចាំខ្ញុំបានទេ 11.11.2022 Pu Da: សំខាន់មីងលែងមានអ្នកញ៉ែហើយ»។
បើគិតមកដល់ពេលនេះរយៈពេល៦ឆ្នាំ ដែល ពេជ្រ សោភា បានទំនាក់ទំនងជាមួយលោក ឆឹម សក្កដា នឹងបានសម្រេចភ្ជាប់ពាក្យនៅក្នុងថ្ងៃខួបដែលអ្នកទាំងពីរបានស្គាល់គ្នាក្រោយ ត្រូវរ៉ូវគ្នាវិញ។ ដោយសារធ្លាប់ចែកផ្លូវជាមួយអតីតស្វាមីជាអណិកជនរស់នៅ សហរដ្ឋអាមេរិកកាលពី ៦ឆ្នាំមុន ទើបតារាចម្រៀងបានបញ្ជាក់ខ្លីថា«រឿងរៀបការត្រូវគិតឱ្យ ច្បាស់ »។
ក្រោយភ្ជាប់ពាក្យរួចទាំងតារាចម្រៀង ពេជ្រ សោភា និងលោក ឆឹម សក្កដា នៅមិនទាន់ ប្រកាសពីពេលវេលាពិតប្រាកដនៅក្នុងថ្ងៃរៀបការឡើយ ខណៈមានការលើកឡើងផ្សេងៗគ្នាថា អ្នក ទាំងពីរអាចនឹងរៀបការនៅចុងឆ្នាំ នេះឬ ដើមឆ្នាំ ២០២៣ខាងមុខនេះ ៕
