សិល្បៈ
ប្រិយមិត្តចាំបានទៅកាលពីអំឡុងឆ្នាំ២០១៧ ក្មេងប្រុសម្នាក់ ឈ្មោះហ៊ឺទៀង គីមហុងដែលមានអាយុ ទើបតែ៧ឆ្នាំម្នាក់មានសមត្ថភាពខួរក្បាលខ្លាំង រហូតអាចរៀនដល់ថ្នាក់ទី ៦ ហើយអ្វីដែលកាន់តែអស្ចារ្យ ជាងនេះទៀតគឺអាចធ្វើលំហាត់ថ្នាក់ទី ១២បានល្អ ហើយត្រឹមត្រូវថែមទៀតផង។
មកដល់បច្ចុប្បន្ននេះ គីមហុងមាន អាយុ១៣ឆ្នាំហើយ និងទើបប្រឡងបាក់ឌុបរួចនៅថ្ងៃទី ៦ ធ្នូ ២០២២នេះ។ បើតាមការបញ្ជាក់ឱ្យដឹងពីឯកឧត្តម ឌួង តារា ជំនួយការផ្ទាល់សម្ដេចតេជោ ហ៊ុន សែន នៅលើបណ្ដាញសង្គមកម្សិលមិញនេះថា៖
«ពូពិតជាសប្បាយរីករាយនិងសូមអបអរសាទរក្មួយ ហ៊ឺ ទៀងគីមហុង ដែលបានខិតខំរៀនសូត្ររហូតឈានដល់ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡងថ្ងៃទី០៥ ធ្នូ ២០២២ ដែលទើបបានបញ្ចប់នៅថ្ងៃទី ០៦ ធ្នូ នេះ។ ផ្អែកលើសមត្ថភាពដ៏ពិសេសនេះ ពូសង្ឃឹមថាក្មួយនឹងប្រឡងជាប់ជាក់ជាមិខាន ។»
ឯកឧត្តមបានបន្ថែមឱ្យដឹងទៀតថា៖ «ខ្ញុំសូមអរគុណ ឯកឧត្តមបណ្ឌិត លី ឆេង អគ្គនាយកប៊ែលធី គ្រុប (Beltei) និងជាសាកលវិទ្យាធិការនៃសាកលវិទ្យាល័យប៊ែលធី អន្តរជាតិ ដែលបានផ្តល់អាហារូបករណ៍ដល់ក្មួយអោយទទួលបានការសិក្សានៅសាលាប៊ែលធីអន្តរជាតិរហូតមកទល់ពេលនេះ និងសូមអរគុណលោកគ្រូអ្នកគ្រូដែលបានយកចិត្តទុកដាក់អប់រំបង្ហាត់បង្រៀនក្មួយហុងអោយក្លាយជាកូនសិស្សល្អប្រកបដោយសមត្ថភាពខ្ពស់។»
«ខ្ញុំបាទសូមគោរពអរគុណ សម្តេចតេជោនាយករដ្ឋមន្រ្តី ដែលបានទំនុកបម្រុងឧបត្ថម្ភជម្រកស្នាក់នៅព្រមទាំងថវិកាឧបត្ថម្ភដល់ការសិក្សារបស់ក្មួយ គីមហុង និងក្រុមគ្រួសារនៅក្នុងរាជធានីភ្នំពេញ។ ពូមានជំនឿ និងសង្ឃឹមយ៉ាងមុតមាំលើសមត្ថភាពក្មួយ គីមហុង និងសូមជូនពរក្មួយឲ្យប្រឡងបានជាប់បាក់ឌុបជាស្ថាពរ។ យើងចូលរួមកសាងអំពើល្អដោយចិត្តជ្រះថ្លា!»
