សង្គម
ពិតជាមានហាងឆេងរីកទូលាយមិនធម្មតាសម្រាប់ចុងឆ្នាំនេះតារាចម្រៀងសំឡេងស្អកលោក ខេម មានឱកាសបានចេញទៅកើបប្រាក់ជាបន្តបន្ទាប់នៅក្រៅប្រទេស។ យ៉ាងណាមិញបន្ទាប់ ពីបញ្ចប់ការសម្តែងនៅសហរដ្ឋអាមេរិកភ្លាមតារាចម្រៀង ខេម បានបន្តចេញទៅសម្តែង នៅ ប្រទេស បារាំង ជាបន្តទៀត។
គួរបញ្ជាក់ថាគ្រាន់តែជំងឺកូវីដស្ងប់ភ្លាមតារាចម្រៀងប្រចាំផលិតកម្មហ្គាឡាក់ស៊ីក៏មានឱកាសបានចេញមកសម្តែងនៅប្រទេសកូរ៉េ និងបន្តមកសហរដ្ឋអាមេរិក។ អ្វីដែលកត់សម្គាល់គ្រាន់ តែបញ្ចប់ការសម្តែងនៅប្រទេសអាមេរិកភ្លាម តារាចម្រៀង ខេម បានបន្តមកសម្តែងនៅ ប្រទេសបារាំងជាបន្តទៀត ។
បើតាមរូបភាពរបស់នាយនាពេលកន្លងមកគេអាចសន្និដ្ឋានថា ការសម្តែងនៅប្រទេសអាមេរិករបស់លោក ខេម ទទួលបានជោគជ័យនឹងការគាំទ្រខ្លាំងពី សំណាក់បងប្អូនដែលរស់នៅទីនោះ ។
អ្វីដែលចាប់អារម្មណ៍សម្រាប់ការចេញទៅសម្តែងនៅបរទេសលើកនេះរបស់តារាចម្រៀង សំឡេងស្អកលោក ខេម ពិតជាមិនខុសបំណងទេព្រោះលោកបានរួមដំណើរជាមួយម្ចាស់ចិត្ត ដែលអាចនិយាយបានថាក្រៅពីការសម្តែងលោកអាចនិងគូស្នេហ៍ឈ្លៀតមកដើរកម្សាន្តដើម្បីរឹតបន្តឹងចំណងស្នេហ៍ឱ្យកាន់តែរឹងមាំថែមមួយកម្រិតទៀត។
ជាក់ស្តែងក្រៅពីសម្តែងនៅប្រទេសបារាំងលោក ខេម បាននាំគូស្នេហ៍បន្តមកដើរលេងនៅទឹកដីប្រទេសស្វីសជាបន្តទៀតដែល មើលទៅពិតជារីករាយជាខ្លាំង។ ក្នុងនោះក៏មានការលាន់មាត់ សរសើរថាចុងឆ្នាំនេះលោក ខេម ពិតជាមានយីអ៊ុនខ្ពស់ណាស់មានឱកាសមាសចេញមក កើប ប្រាក់ដុល្លារយ៉ាង រំភើយ តាមបណ្តារប្រទេសធំៗ។
ដ្បិតមិនមានវត្តមាននៅក្នុងស្រុក តែតារាចម្រៀង ខេម ក៏បានត្រៀមបទចម្រៀងពីរោះៗ សម្រាប់ ហ្វេន ហ្វេននៅក្នុងផលិតកម្មហា្គឡាក់ស៊ី មិនឱ្យខកចិត្តនោះទេ ។ គួរបញ្ជាក់ថា លោក ខេម ក៏ជាគ្រាប់ពេជ្រនៅក្នុង ផលិតកម្មរបស់អ្នកឧកញ៉ាវ័យក្មេង បន្ទាប់ពីតារាចម្រៀង ព្រាប សុវត្ថិ តន់ ចន្ទសីម៉ា ផងដែរ ៕
