សិល្បៈ
ថ្មីៗនេះមានការចាប់អារម្មណ៍ជាខ្លាំងក្រោយបានឃើញតារាកំប្លែង ខ្ញុង បាន បង្ហោះសាររៀបរាប់ថាកូនប្រុសវ័យ១៦ឆ្នាំរបស់នាងចង់ទៅបួសដែលធ្វើឱ្យនាង ស្រក់ទឹកភ្នែកដោយមិនដឹងខ្លួន។ការលើកឡើងរបស់តារាកំប្លែងសម្បូរវោហាស៍ រូបនេះបានធ្វើឱ្យអ្នកគាំទ្រមួយចំនួនលាន់មាត់សរសើរដល់កូនប្រុសរបស់តារាកំប្លែងរូបនេះដែលមានទឹកចិត្តចង់បួសទាំងវ័យក្មេង។
ថ្មីៗនេះតារាកំប្លែង ស្រេង សុកាន់ដា ហៅខ្ញុង បានបង្ហោះសារដែលមាន អត្ថន័យថា«មានកូនប្រុសអាយុ 16 ឆ្នាំម្នាក់សុខៗស្រាប់តែកូនសុំម្តាយទៅ បួស សួរនាំទៅថាមកពីអាណិតម៉ាក់ពេកមួយរយៈនេះឃើញម៉ាក់លំបាកខ្លាំងចង់សងគុណម៉ាក់បើជាបងប្អូនតើសប្បាយចិត្តទេអរចង់លួសព្រលឹងហើយលោកអើយអនុមោទនាកូនសម្លាញ់ ជាបុណ្យរបស់ម៉ាក់ណាស់ម៉ែរកនិយាយអ្វី មិន ចេញទេហូរទឹកភ្នែកដោយមិនបានដឹងខ្លួន»។
ការលើកឡើងរបស់តារាកំប្លែង ខ្ញុង បានធ្វើឱ្យមិត្តភក្តិនៅក្នុងបណ្តាញសង្គមមានការសរសើរដល់ នាងខ្ញុង ដែលមានកូនប្រុសល្អបែបនេះព្រោះដូចដឹងស្រាប់ហើយថាក្មេងៗសម័យនេះកម្រមានគំនិតដូច្នេះណាស់ ។ អ្នកគាំទ្រខ្លះថែមទាំងជម្រុញឱ្យនាង ខ្ញុង សម្រេច បំណងកូនប្រុសថែមទៀតផង ។
ថ្មីៗនេះតារាកំប្លែង នាងខ្ញុង ហាក់មានភាពស្រស់ស្រាយជាថ្មីក្រោយនាង បានចាប់ផ្តើមប្រឡូកអាជីពសិល្បៈឡើងវិញ។ ដោយឡែករបរអនឡាញរបស់ ខ្ញុងក៏ដំណើរការរលូនបើទោះមិនទាន់សងបំណុលគេរួចក៏ពិតមែន តែនាងក៏ ទទួលបានការគាំទ្រនិងលើកទឹកចិត្តពីសំណាក់មហាជនជាច្រើន។ថ្មីៗនេះនាង ខ្ញុង ថែមទាំងសម្រេចចិត្តសាងផ្នួស ៧ថ្ងៃជាការអរគុណដល់មហាជននិង ពុកម៉ែបងប្អូនដែលបានជួយលើកទឹកចិត្តនិងឧបត្ថម្ភជាទឹកប្រាក់ដល់រូបនាងជាហូរហែកន្លងមក៕
