សង្គម
AKP ព្រះសីហនុ ថ្ងៃទី២២ ខែកុម្ភៈ ឆ្នាំ២០២៣--ព្រឹកថ្ងៃពុធ ៣កើត ខែផល្គុន ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី២២ ខែមករា ឆ្នាំ២០២៣នេះ នាវាទេសចរណ៍បរទេស ០១គ្រឿង បាននាំភ្ញៀវទេសចរបរទេសចម្រុះជាតិសាសន៍ជាង ៥០០នាក់ ចូលចតកំពង់ផែស្វយ័តក្រុងព្រះសីហនុ ក្នុងគោលបំណងធ្វើទេសចរ នៅលើទឹកដីនៃព្រះរាជាណាចក្រកម្ពុជា ពិសេសនៅខេត្តព្រះសីហនុ ក្នុងដំណើរកម្សាន្តតាមឆ្នេរសមុទ្រ តាមតំបន់រមណីយដ្ឋាននានា និងទី ប្រជុំជនសំខាន់ៗ ក្នុងខេត្តព្រះសីហនុ។
តាមការឱ្យដឹងពីមន្ត្រីនគរបាលអន្តោប្រវេសន៍ ច្រកទ្វារកំពង់ផែស្វយ័តក្រុងព្រះសីហនុ បានឱ្យដឹងថា នាវាទេសចរណ៍បរទេស Nautica មានសញ្ជាតិ Marshall Island មានបណ្ដោយ ១៨០,៤៥ម៉ែត្រ ទទឹង ៣០,២៧ម៉ែត្រ និងជម្រៅទឹក ៦,២០ម៉ែត្រ ផ្ទុកភ្ញៀវទេសចរចម្រុះជាតិសាសន៍ចំនួន ៥៣៥នាក់ ស្រី ២៨៨នាក់ មាន ២៤សញ្ជាតិ និងមាននាវិកចំនួន ៤០៧នាក់ ស្រី ៦៩នាក់ មាន ៣៦សញ្ជាតិ បានចូលចតនៅកំពង់ផែស្វយ័តក្រុងព្រះសីហនុ កាលពីវេលាម៉ោង៨,៣០ ព្រឹកថ្ងៃទី២២ ខែកុម្ភៈ ឆ្នាំ២០២៣នេះ ។
តាមការគ្រោងទុកនាវា Nautica គ្រោងនឹងចាកចេញពីកំពង់ផែស្វយ័តក្រុងព្រះសីហនុ ឆ្ពោះទៅកាន់ប្រទេសវៀតណាម នៅវេលាម៉ោង ១៨ថ្ងៃដដែល ។
ភ្ញៀវទេសចរធ្វើដំណើរតាមនាវា Nautica ដែលមានសញ្ជាតិច្រើនជាងគេ មានដូចជា ជនជាតិអាម៉េរិក ចំនួន ៣៦០នាក់, កាណាដា ៨៧នាក់, និងអង់គ្លេស ៤៣នាក់ ក្រៅពីនោះមានសញ្ជាតិផ្សេងទៀត ។
សូមបញ្ជាក់ថា ការចូលចតរបស់នាវាបរទេស Nautica នៅកំពង់ផែស្វយ័តក្រុងព្រះសីហនុនាពេលនេះ បានបង្ហាញសញ្ញាថា កម្ពុជាជាប្រទេសមានសុវត្ថិភាព ក្នុងការគ្រប់គ្រងជំងឺកូវីដ-១៩បានល្អ បន្ទាប់ពីជំងឺនេះបានរាតត្បាតពាសពេញសកលលោក ហើយធ្វើឱ្យប្រទេសក្នុងពិភពលោក បានធ្វើការបិទប្រទេស។
ដោយសារគោលនយោបាយរបស់រាជរដ្ឋាភិបាលកម្ពុជា ជំរុញការចាក់វ៉ាក់សាំងកូវីដ-១៩ ដើម្បីបង្កើនភាពស៊ាំជូនប្រជាពលរដ្ឋ និងកុមារចាប់ពីអាយុ៣ឆ្នាំឡើង ដោយមិនគិតថ្លៃ ធ្វើឱ្យប្រទេសកម្ពុជាបានបើកប្រទេស និងសេដ្ឋកិច្ចឡើងវិញកាល ពីខែវិច្ឆិកា ឆ្នាំ២០២១មក ធ្វើឱ្យកម្ពុជាបើកទ្វារទទួលភ្ញៀវទេសចរឡើងវិញជាបន្តបន្ទាប់ រហូតមកដល់បច្ចុប្បន្ននេះ ហើយនៅដើមឆ្នាំនេះក៏មាននាវាទេសចរណ៍បរទេសបាននាំភ្ញៀវទេសចរបរទេសចម្រុះជាតិសាសន៍ ចូលចតនៅកំពង់ផែស្វយ័តក្រុងព្រះសីហនុ ជាបន្តបន្ទាប់ ៕ ដោយ ងូ សុមុនី
