សិល្បៈ
សិល្បករការិនីប្រុសស្រីជាច្រើនដួងបានបង្ហាញវត្តមាននៅក្នុងពិធីក្រុងពាលី រឿងអប្សរាមហាអង្គរដែលជាស្នាដៃផលិតរបស់ផលិតករដ៏ល្បីឯកឧត្តម ហ្វៃ សំអាង ។ គ្រាន់តែឃើញទិដ្ឋភាពរួមនឹងសម្រស់របស់តារាស្រីប្រុសជាច្រើនដួង នៅក្នុងកម្មវិធីក្រុងពាលីនេះក៏មានអ្នកគាំទ្រមិនតិចទេអន្ទះសារចង់ទស្សនាឆាប់ៗ ហើយរំពឹងថារឿងភាគបុរាណនេះនឹងផ្ទុះខ្លាំងក្រោយចាក់បញ្ចាំង ។
រឿងភាគបុរាណ អប្សរាមហាអង្គរ ត្រូវបានគេចាត់ទុគជារឿងភាគបុរាណខ្នាតធំ ព្រោះមានការចូលរួមពីសំណាក់តារាស្រីប្រុសជាច្រើនជំនាន់ ជាពិសេសមាន ការចូលរួមពីសំណាក់តារាជើងចាស់កាលជំនាន់ទស្សវតទី៨០ដែលមានដូចជាអ្នកស្រី អម្ពរ ទេវី និង នារី រ័ត្នគន្ធា ហើយក្រៅពីនេះក៏មានការចូលរួមពីសំណាក់ ស្រិស្អាតៗជាបវរកញ្ញាជាច្រើនជំនាន់ថែមទៀត ។
តារាស្រីដែលមានវត្តមាន នៅក្នុងរឿងភាគខ្នាតធំមួយនេះម្នាក់ៗសុទ្ធតែអះអាងថាបានហ្វឹកហាត់ជំនាញ បន្ថែមដែលមានដូចជាការរាំរបាំអប្សរាផងដែរ ។
ក្រោយបានឃើញទិដ្ឋភាពនៅក្នុងពិធីក្រុងពាលីនៅក្នុងថ្ងៃនេះអ្នកគាំទ្រជាច្រើនលើកឡើងថារឿងភាគមួយនេះអាចនឹងក្លាយជារឿងបុរាណខ្នាតធំនៅក្នុងឆ្នាំ ២០២៣ នេះព្រោះទាំងតួសម្តែងសុទ្ធសឹងតែជាតួល្បីឈ្មោះមានទាំងសម្រស់ និងសមត្ថភាព ។ មានការព្រលយថារឿងនេះក៏ចំណាយដើមទុនមិនតិច ឡើយអាចជាងកន្លះលានឬលើសពីនេះ៕
