សិល្បៈ
មានការចាប់អារម្មណ៍ពីសំណាក់មហាជនក្រោយពីថ្មីៗនេះគេបានឃើញក្រុមកំប្លែង នាយ ពាក់មី ដែលស្ថិតនៅក្នុងក្រោមការដឹកនាំរបស់លោកតា វ៉ិចទ័រ នោះបានបង្ហាញវត្តមាននៅ ក្នុងកម្មវិធីកំប្លែងថ្មីរបស់ទូរទស្សន៍ស៊ីធីអិនឡើងវិញ ។ មានការងឿងឆ្ងល់ថាតើក្រុម នាយពាក់ មី វិលចូលទ្រនំចាស់វិញទៅបែបណា ? ខណៈកន្លងមកឃើញក្រុមកំប្លែងដ៏មានប្រជាប្រិយ ភាព រូបនេះបានចាកចេញទៅទ្រនំថ្មីមួយ ។
គេចាំបានថាកាលពីប៉ុន្មានខែមុនក្រុមកំប្លែង នាយពាក់មី ដែលដឹកនាំដោយលោក សុវណ្ណ ឬទ្ធី ហៅលោកតា វ៉ិចទ័រ បានចាកចេញទៅទូរទស្សន៍ភីអិនអិន ដោយមានការទទួលយ៉ាងកក់ ក្តៅពីសំណាក់ទ្រនំថ្មីនោះ ។ ក្រុមកំប្លែងនេះក៏បានបង្ហាញមុខនៅក្នុងកម្មវិធីសំណើចរបស់ ទូរទស្សន៍ភីអិនអិនជាហូរហែរ។
ប៉ុន្តែថ្មីៗនេះគេបែរជាឃើញវត្តមានក្រុមកំប្លែងមួយនេះបានលេចមុខនៅក្នុងកម្មវិធីសំណើចនៅទ្រនំស៊ីធីអិនជាទ្រនំចាស់ដែលមានដូចជាកម្មវិធី«តុកឡុក»និង«ឪក្មេកប្អូនកូនប្រសារបង» ជាដើម ។ មានការលើកជាសំណួរថាតើក្រុមកំប្លែង នាយពាក់ មី វិលមកទ្រនំចាស់វិញឬបែបណា ?
បើតាមប្រភពដែលគួរឱ្យទុកចិត្តមួយបានបង្ហើបថាមូលហេតុឃើញក្រុមកំប្លែង នាយពាក់មី លេច មុខជាថ្មីនៅទ្រនំចាស់បែបនេះដោយសារសព្វថ្ងៃក្រុមកំប្លែងដែលដឹកនាំដោយលោកតា វ៉ិចទ័រ ស្ថិតនៅក្នុងផលិតកម្ម 9Colors ។ អាចនិយាយថាផលិតកម្ម 9Colors មានសិទ្ធ លក់កម្មវិធីសំណើចថ្មីៗរបស់ក្រុមកំប្លែងនេះទៅស្ថានីយទូរទស្សន៍នានាបានជាធម្មតា ៕
