សង្គម
តារាចម្រៀងពីររូបរបស់ផលិតកម្មហ្គាឡាក់ស៊ីបានទទួលពានសិល្បករការិនីដែលមានអ្នកស្តាប់ច្រើនជាងគេ នៅក្នុងកម្មវិធី PWA 2023 កាលពីប៉ុន្មានថ្ងៃមុន ។ ប៉ុន្តែអ្វីដែលធ្វើឱ្យអ្នកគាំទ្រមានការងឿងឆ្ងល់នោះតារាប្រុសស្រីទាំងពីរដួងនេះមិនបានបង្ហាញវត្តមានចូលរួមនៅក្នុងព្រឹត្តិការណ៍ដ៏ធំមួយនេះហើយសូម្បីបង្ហោះសារអរគុណក៏មិនឃើញមានដែរ ។
គួរបញ្ជាក់ថាព្រឹត្តិការណ៍ PWA 2023 នៅក្នុងឆ្នាំនេះបានប្រព្រឹត្តទៅយ៉ាងរលូនកាលពីថ្ងៃទី ១៨កន្លងទៅដោយមានការចូលរួមពីសំណាក់តារាស្រីប្រុសចាស់ថ្មីជាច្រើនដួង រួមទាំងការប្រគល់ ពានជាច្រើនដល់តារាប្រុសស្រីទាំងនោះទៀតផង ។ អ្វីដែលកត់សម្គាល់នៅក្នុងឆ្នាំនេះតារាចម្រៀងពីរដូងនៅក្នុងផលិតកម្មហា្គឡាក់ស៊ីគឺលោក ខេម និង តន់ ចន្ទសីម៉ា ក៏ទទួលបាន ពាននៅក្នុងកម្មវិធីមួយនេះ ។
បើតាមការបង្ហោះនៅក្នុងផេក Pleng បានឱ្យដឹងថា«តារាចម្រៀ ង ខេម ទទួលបានពានរង្វាន់ "សិល្បករស្ដាប់ច្រើនជាងគេ" ពីកម្មវិធី Pleng Music Awards 2023 ពិតជាស័ក្តិសម យើងពិតជាមានមោទនភាពចំពោះការខិតខំប្រឹងប្រែងយ៉ាងខ្លាំងរបស់គាត់ រហូតទទួលបានពានរង្វាន់មួយនេះ»។
ដោយឡែកមិនខុសគ្នាពីលោក ខេម តារាចម្រៀង តន់ ចន្ទសីម៉ា ក៏ត្រូវបានផេក Pleng បង្ហោះរូបភាពរួមនឹងសារថា« អបអរសាទរ idol ដ៏សែនខ្យូតសំឡេងឆ្វាច តន់ ចន្ទសីម៉ា ដែលបានក្លាយជាម្ចាស់ពានរង្វាន់ "សិល្បការិនីស្តាប់ច្រើនជាងគេ" ក្នុងកម្មវិធី Pleng Music Awards 2023»។ អ្វីដែលកត់សម្គាល់ដ្បិតទទួលបានពាន និងសារអបអរពីសំណាក់ផេកផ្លូវការ Pleng ក្តី តែគេមិនបានឃើញតារាចម្រៀងប្រុសស្រីទាំងពីរដួងនេះបង្ហាញអារម្មណ៍រីករាយឬថ្លែងអំណរគុណនៅក្នុងការទទួលបានពានរង្វាន់នៅក្នុងឆ្នាំនេះពីកម្មវិធី PWA2023 ឡើយ ។ ពួកគេបែរជាបង្ហោះរួបភាពនិងបទចម្រៀងថ្មីៗទៅវិញ។
គួររំឮកថាកាលពីឆ្នាំមុនតារាទាំងពីរដួងនេះបានចូលរួមនៅក្នុងព្រឹត្តិការណ៍មួយនេះ៕
