ស្នងការរាជធានីភ្នំពេញ បំភ្លឺថា អ្នកបើកបរនៅតាមដងផ្លូវ គ្មានផ្លាកលេខសមត្ថកិច្ចមានសិទ្ធឃាត់ដើម្បីធ្វើការសាកសួរ ពិនិត្យឯកសារ

(ភ្នំពេញ)៖ ក្រុមការងារព័ត៌មាន​ និងប្រតិកម្មរហ័សនៃស្នងការរាជធានីភ្នំពេញ​ បានប្រកាសច្រានចោលទាំងស្រុងចំពោះការផ្សាយរបស់ចាងហ្វាង វីអេ ញូស ធីរី ដែលបានលើកឡើងថា  «អត់ឯកសណ្ឋាន ជិះម៉ូតូអត់មួកសុវត្ថិភាព អត់កញ្ចក់ អត់បណ្ណសម្គាល់ខ្លួន អត់ដីកាពីតុលាការ នាំគ្នាមកកាក់ម៉ូតូប្រជាពលរដ្ឋតាមដងផ្លូវ តើនេះឬជាវិជ្ជាជីវៈការងាររបស់សមត្ថកិច្ច ដែលមានតួនាទីបម្រើប្រជាពលរដ្ឋ?»។

សេចក្តីបំភ្លឺរបស់ក្រុមការងារព័ត៌មាន​និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ បានឱ្យដឹងថា ការចេញផ្សាយនេះជារឿងមិនពិត ដោយក្រុមការងារព័ត៌មាន​អះអាងថា រឿងនេះពាក់ព័ន្ធនឹងករណីកាលពីថ្ងៃទី០៣ ខែមេសា ឆ្នាំ២០២៣ វេលាម៉ោង ១២:៤០នាទីថ្ងៃត្រង់ កម្លាំងនគរបាលនៃប៉ុស្តិ៍នគរបាលរដ្ឋបាលទំនប់ទឹក សហការជាមួយកម្លាំងនគរបាលព្រហ្មទណ្ឌនៃអធិការដ្ឋាននគរបាលខណ្ឌបឹងកេងកង ចុះធ្វើការល្បាតក្នុងមូលដ្ឋាន ដើម្បីស្វែងរកមុខសញ្ញាលួច និងឆក់នាពេលកន្លងមក ក៏ប្រទះឃើញម៉ូតូមានការសង្ស័យមួយគ្រឿង ម៉ាក Honda Dream C125 ពណ៌ខ្មៅ គ្មានផ្លាកលេខ ទើបធ្វើការកាក់ឃាត់ដើម្បីសាកសួរ ប៉ុន្តែមានបុរសម្នាក់ដែលជាគ្នារបស់ម្ចាស់ម៉ូតូ និងជាអ្នកសារព័ត៌មានចេញមកស្រែកឆោឡោទៅកាន់សមត្ថកិច្ច។ ក្រោយពីការសាកសួរ និងដោយមានការសុំទោស សមត្ថកិច្ចបានអនុញ្ញាតឱ្យម្ចាស់ម៉ូតូធ្វើដំណើរបន្ត។

ស្នងការបន្ថែមថា អ្នកសារព័ត៌មានមួយចំនួនតូចតែងតែមកតាំងខ្លួនជាមន្ត្រីអនុវត្តច្បាប់ ដូច្នេះស្នងការស្នើឱ្យកុំធ្វើអ្វីលើសពីតួនាទីភារកិច្ចរបស់ខ្លួន ហើយអ្នកសារព័ត៌មានក៏គ្មានសិទ្ធមកប្រើប្រាស់ម៉ូតូអត់ពន្ធ ឬអត់ផ្លាកលេខនោះទេ។ ម្យ៉ាងវិញទៀត អ្នកបើកបរនៅតាមដងផ្លូវ គ្មានផ្លាកលេខសមត្ថកិច្ចមានសិទ្ធឃាត់ដើម្បីធ្វើការសាកសួរ ពិនិត្យឯកសារ និងធ្វើការផាកពិន័យតាមច្បាប់ ដោយមិនចាំបាច់មានដីកាដូចអ្នកសារព័ត៌មានបាននិយាយនោះទេ៕