ក្រោយទទួលរងការរិះគន់ស្ពឹកមុខគួរសមពេលនេះ បេក្ខភាពនៅក្នុងកម្មវិធីប្រលងចម្រៀង The Voice Cambodia រដូវកាលទីបី សុខុម រចនា បានចេញមុខសុំទោសដល់ លោក ជា ដេរីត ជាម្ចាស់បទនឹងបានសុំទោសដែលខ្លួនមិនបានរៀបចំពាក្យនិយាយឱ្យបានល្អគ្រប់ជ្រុងជ្រោយជាមុន ។
ប៉ុន្មានថ្ងៃនេះរឿងរ៉ាវរបស់បេក្ខភាពនៅក្នុងកម្មវិធីប្រលងចម្រៀង The Voice Cambodia រដូវកាលទីបី សុខុម រចនា នៅតែជាប្រធានបទក្តៅ។ ជាក់ស្តែងក្រោយទទួលបានការគោះប៊ូតុងពីសំណាក់គណកម្មាការទាំងបួនរូប សុខុម រចនា បានឱ្យគណកម្មាការទាំងបួនឡើងរាំបទ « How about now» ដោយរួបនាងជាអ្នកច្រៀង។ក្នុងនោះគណកម្មាការ ណុប បាយ៉ារិទ្ធ បាននិយាយថា«បើកុំតែច្រៀងបទហ្នឹងអត់ដឹងថាម្ចាស់បទនៅទីនេះទេ»ដោយឡែក ឱក សុគន្ធកញ្ញា ក៏បានបន្ថែមថា«មិនដែលស្គាល់ម្ចាស់បទឥលូវបានឃើញមុខហើយ ។តបជាមួយសម្តីគណកម្មាការទាំងពីរនេះ សុខុម រចនា បាននិយាយថា«អរគុណបងប្អូនសម្រាប់ការគាំទ្រ 30M Views»។
សម្តីរបស់ សុខុម រចនា ដែលជាបេក្ខនារីដែលមានវ័យត្រឹមតែ ១៨ឆ្នាំរូបនេះហាក់មានចេតនាតាំងខ្លួនជាម្ចាស់បទ« How about now» ពោលនាងមិនបានអរគុណដល់ម្ចាស់បទលោក ជី ដេវីត ឡើយ។ កាយវិការរបស់ សុខុម រចនា ដែលជាអ្នកCover បទចម្រៀងរបស់លោក ជី ដេវីត បានធ្វើឱ្យអ្នកទស្សនាក៏ដូចជាហ្វេន ហ្វេន របស់លោក ជា ដេវីត មានការរិះគន់ជាខ្លាំងដោយមានការលើកឡើងថា សុខុម រចនា មិនផ្តល់តម្លៃឱ្យម្ចាស់បទលោក ជា ដេវីត ។ ក្រោយទទួលបាននូវការរិះគន់ជាបន្តបន្ទាប់ប្រមាណជាបីថ្ងៃមក ពេលនេះបេក្ខភាព សុខុម រចនា បានចេញមុខសុំការអធ្យាស្រ័យពីលោក ជី ដេវីត ជាម្ចាស់បទ « How about now» ថា
«សូមអរគុណសម្រាប់ការស្រលាញ់គាំទ្រពីពុកម៉ែបងប្អូនទាំងអស់គ្នាដែលបានគាំទ្ររូបនាងខ្ញុំតាមរយ:បទcover “how About Now “ដែលជាបទម្ចាស់ដើមរបស់បងប្រុស ជី ដេវីត នាងខ្ញុំសូមអធ្យាស្រ័យចំពោះកំហុសខុសឆ្គង ដោយនិយាយពេលភ្លាមៗនៅលើឆាកនាងខ្ញុំមិនបានរៀបចំពាក្យនិយាយអោយគ្រប់ជ្រុងជ្រោយទេនឹងមិនបានតាំងខ្លួនជាម្ចាស់បទដែរ ខ្ញុំគ្រាន់តែសប្បាយរីករាយដែលទទួលបានលទ្ធផលល្អ នឹងអរគុណចំពោះបងប្អូនអ្នកទស្សនាបទcoverក្នុងយូធូបវីយូ30Mប៉ុណ្ណោះ។ ហើយក៏អរគុណបងប្អូនសម្រាប់ការបញ្ចេញមតិយោបល់ផងដែរ ។ ខ្ញុំពិតជាស្រលាញ់បងប្អូនខ្មែរទាំងអស់គ្នា ។ អរគុណខ្លាំង»។
គេជឿថាក្រោយការទទួលស្គាល់កំហុសរបស់ សុខុម រចនា អ្វីៗនឹងល្អប្រសើរឡើងវិញ ប៉ុន្តែយ៉ាងណាគេសង្កេតឃើញលោក ជី ដេវីត មិនបានចេញមុខប្រតិកម្មអ្វីឡើយ៕